Saam 109 - Intas Etipup

SAAM 109.

1 Et asan tas ehti a Tevit vai hos tas u ilpu atimi tak atimi iran, et ika aien era idivaig Jutas ara, um asaig neruvaig imi ra. 16 Et asuptecnaig nedo has ura aien. 21 Et tas taigtaig aien va namen has o un, um ugyi Atua mika yi atau imi yin. 29 Et ika aien yi ago naaurinig va Atua aien.

¹ AK Atua, ek imiahpas euc ainyak, namu jim eucsup aiek;

² era mun idim asalgei nipjineucsera vai nyak a ilpu atimi auatatami im ilpu atimi efaifa: era mun asan tas ahcil vai nyak ara.

³ Era mun lep arehed irak ara irai tas edemda ura; era mun lep ispara ago nedoa vai nyak ara.

⁴ Ek aiheuc vai ra ainyak, ja era tak atimi irak ara: ja ek alaigaheni vai euc ainyak.

⁵ Era mun aru nedo upene unyak ara an nedo has, um lep aru naiheuc unyak an nedemda ura.

⁶ Namu ati tah natimi auatatimi aiek mika yi esjilid iran: etmu lep aiji an matan tah natimi edemda vai yin.

⁷ Uhu wit ahilek nedo o un, uhpu aru nedo has o un: etpu lep idivaig nedo has nalaigaheni o un.

⁸ Etmu eti elpat nadiat iran; etmu isjeupigmoig yin intak atimi par aminjinaig itai.

⁹ Erumu umnij a ilpu hal o un; etmu takata echim amen a ehgan.

¹⁰ Erumu amen ehcid a ilpu halav atamaig o un, um ugyi itai irai iji adiat: erumu ahilek nitai caig incara ara ahes irai iji imnim ahyuahyu ura.

¹¹ Etmu lucsei niji itai asega o un a natimi ago nedo ipjin; erumu lep atoraliak nohwai itai o un a nup urai taka pece.

¹² Etmu jim aiheuc vai yin tah: etmu jim ago nedo upene vai ilpu umnij o un tah.

¹³ Erumu atiih a ilpu mapon; uhmu ohpodohpod nidara an taka opan.

¹⁴ Etmu imiehva nedo has u ilpu retpon a Ihova; uhmu jim ohpodohpod nedo has u risin.

¹⁵ Etmu amen nedo has ura an nuhup u Ihova irai iji adiat, mika yi ika aien eri eti imiehva ra an nobohtan.

¹⁶ Va nedo o un, nikavaig, is eti imiehva aien par ago nedo aiheuc va atimi; ja is atmas aien vai natimi inig is ohocred aien um ihkin natimi, mika yi atgei natimi inig aien eris auahas inliinmopon.

¹⁷ Is merit vai intas ahlaijaig aien, ja et mun yetpam iran: is eti imiacitak intas acis yi alwai aien, ja et mun itac acen vai yin.

¹⁸ Is aso yin aien an tas ahlaijaig et idivaig an napelumai, ja et mun yetpam anliin nipjinetgan et idivaig inwai, um lep idivaig narakei anliin niji eduon.

¹⁹ Etmu amen iran et idivaig napelumai inig et aso yin iran aien, im nitai ahid et ahid aien irai iji adiat.

²⁰ Etmu uce neruvaig u Ihova irai ilpu atimi tak atimi irak, im lep ira ra era asan tas has vai nyak ara.

²¹ Ja namu aiheuc vai nyak aiek, ak Ihova Natimarid, va nidam: namu imiatamaig nyak aiek, vaig inig nikavaig, et upene naiheuc unyum.

²² Ek idim ohocred ainyak um ihkin natimi, er lep ahcai inliinmopok.

²³ Ek apan ainyak et idivaig nalmuitai et wat tiih: er ahlaadaig sjipe nyak et idivaig inheled.

²⁴ Et auatialidi nijin neduok va natwakam unyak; ek lep erek ainyak.

²⁵ Era mun imiafakahcil nyak ara sji igki era alum nyak ara; era auhohaig nidjinira ara.

²⁶ Namu atau imi nyak aiek, ak Ihova Atua unyak: namu imiatamaig nyak aiek et idivaig naiheuc unyum:

²⁷ va erupu ato ara, mika nikman nigki; na mun ago aiek, ak Ihova.

²⁸ Erupu asan tas ahlaijaig vai nyak ara, ja napu asan tas acis yi alwai nyak aiek: era mun atidai ara, ja erupu ehcamai ara; etpu lep imiacitak a naheca unyum.

²⁹ Erupu ehcamai alupas a ilpu atimi tak atimi irak; erupu aso ra ara an nehcamai ura et idivaig napelumai.

³⁰ Ekpu ago naaurinig alupas vai Ihova ainyak an nipjineucsek; ekpu idim imiahpas yin ainyak an nuhup u atimi et ahinag.

³¹ Etpu idim aiji aien an matai nihki natimi, par imiatamaig yin vai ilpu atimi asan mas o un.