Saam 108 - Intas Etipup

SAAM 108.

1 Et ahugni yin a Tevit mika yi imiahpas Atua aien. 5 Et ugyi Atua aien mika yi atau imi yin aien, et idivaig intas upyi asaig o un. 11 Et asgeig ira Atua aien, mika yi atau imi yin.

¹ AK Atua, et amen aktit inliinmopok ainyak, et idim amen aktit inliinmopok; ekpu acesaces nohranitai ainyak, um imiahpas euc an nipjineucsek.

² Ekpu acesaces nohranitai ainyak irai saltere im harp: ekpu aiji lahlah ainyak an nathut u nadiat.

³ Ak Ihova, ekpu ago naaurinig vai euc ainyak an nuhup u nup urai iji elcau: ekpu imiahpas euc ainyak an nuhup u nup urai iji pece.

⁴ Et idim esjilid naiheuc unyum um ijinies an nohatag: et ahlaujai nedo inveijec unyum irai apat an nohatag.

⁵ Ak Atua, na idim esjilid aiek an nohatag: etmu lep esjilid natimi alupas unyum an nobohtan asega;

⁶ va uhpu imiatamaig ilpu atimi unyum et aiyu inliinmopom aiek vai ra: namu imiatamaig cama aiek an matam, um atahaijeg intas unyima.

⁷ Is ika a Atua an tas itap o un, Va nitai inigki, ekpu imiacitak ainyak, ekpu ahaig Sikem ainyak, um akaro sjipe niskanse Sukod.

⁸ Ek ohuun inpece Cileat ainyak; et unyak inpece Manasi; era lep emda esjilid unyak a nup Ifreem; era ilpu atimi asan tas alep unyak a nup u Juta;

⁹ erupu aheca unyak a nup u Moab; ekpu tas alep ainyak ehele nup Itom; ekpu esjilid irai nup u Filistia ainyak um cediaig vai ra.

¹⁰ Etpu imiapan nyak an maliyum emda et eteuc nathatahau iran a di et atau irak a di par apan an pece Itom?

¹¹ Aiek marom, ak Atua, aiek aigki, na mun atcijaig cama aiek; ak Atua, napu atau irai ilpu eucsupo unyima aiek an nedoa, ka oʼo?

¹² Namu atau imi cama aiek va nohocred unyima: era idim auatialidi natimi par atau imi cama.

¹³ Ecrupu emda aijama vai euc, ak Atua: napu auwihise ilpu atimi ehcerucai cama aiek.