Saam 107 - Intas Etipup

SAAM 107.

1 Et ahugni ilpu atimi iji ig a naprofeta, u imiatamai ra a Atua, mika eri almuktit nedo acheiachei u Ihova, an nimiahpas Atua ura, 4 vai ilpu atimi ahced inpece, 10 im ilpu atimi eris arore ra, 17 im ilpu atimi emehe, 23 im ilpu atimi aheled, 33 im lep ilpu atimi et acheiachei namen ura.

¹ AGO naaurinig vai Ihova aijaua, et idim upene aien: et eteuc naiheuc o un irai iji mesese.

² Etmu uce intas o ilpu atimi iji ig et mun imiatamaig ra a Ihova, is imiatamaig ra aien va nikmai ilpu atimi tak atimi ira ra;

³ um asjapicnai ra ahes irai iji pece; ahes an ridjai o un, um ahes an nete o un, um ahes a nord, um lep ahes an jap.

⁴ Eris ahnag ara an namasacen is ti nefalaig iran; eris eti ecetai tah inmaliyum ara par amen iran.

⁵ Is ehtele ra ara, um lep ahvig wai; is auatialidi inliinmopora ara.

⁶ Ja eris par ahlaig vai Ihova ara an nohocred ura; is lep imiatamaig ra aien va namen has ura.

⁷ Is atau ira ra aien an nefalaig atoh, va erupu apan ara an maliyum eris amen iran natimi.

⁸ Erumu imiahpas Ihova natimi va naiheuc o un, im lep nauritai imiali o un is ago aien va atimi!

⁹ Et mun ika aien eri ehginwai a ilpu atimi ahvig wai, um lep eri geije irai iji itai upene a ilpu atimi ehtele ra.

¹⁰ Et mun ai itai aien vai ra era amen an mehcim ara im napat ahtu, era lep ohocred ara va narore ra ira atau hat;

¹¹ va nedo ura, nikavaig, eris imipalea intas o Atua emda acen ara, um amcel vai intas alep o un et esjilid acen aien:

¹² va nitai inigki, is ika aien yi upoupo inliinmopora ara an nohocred; eris epihtau ara, is ti tah par atau imi ra.

¹³ Ja eris par ahlaig vai Ihova ara an nohocred ura; is lep imiatamaig ra aien va namen has ura.

¹⁴ Is imialau ijo ra aien vai inmehcim im napat ahtu, um ahtamud niji itai arore ra.

¹⁵ Erumu imiahpas Ihova natimi va naiheuc o un, im nauritai imiali o un is ago aien va atimi!

¹⁶ Vaig inig nikavaig, is auahas niji itai atapnes ebras aien, um ahtaldei sjipe naui aiurn.

¹⁷ Era ohocred a ilpu atimi ahnag va nedo imipalea ura, im lep nedo has ura.

¹⁸ Et esjum vai nitai caig asega inliinmopora ara; era ubutpotet u inmas ura ara.

¹⁹ Ja era ahlaig vai Ihova ara an nohocred ura; et lep imiatamaig ra aien va namen has ura.

²⁰ Et asan tas o un aien, um ago cehcehe ra, um imiatamaig ra va niji itai auahas ra.

²¹ Erumu imiahpas Ihova natimi va naiheuc o un, im lep niji auritai imiali o un et ago aien va atimi!

²² Erumu ahlap ara irai iji itai ahlap naaurinig, um asuptecnaig niji auritai o un um acesaces nohranitai.

²³ Ara, era atga an jap ara irai elcau, um ahilek itai ijinies an tupahuahau alupas;

²⁴ eris almoi nauritai o Ihova ara sji igki, im lep nedo imiali o un an tupahuahau.

²⁵ Is asaig aien, jais par ucjum pam nehio; is imiaridjai nepeau iran aien.

²⁶ Era aridjai an nohatag ara, um lep asuol irai uarin ubo: et ehioehio alupas inliinmopora ara va nohocred ura.

²⁷ Eris ateuc molmol ara, um atga autatautat; is tiih lelra ara.

²⁸ Ja eris par ahlaig vai Ihova ara an nohocred ura; is lep imiatamaig ra aien va namen has ura.

²⁹ Et ika aien yi esjaig nimtinjap, et lep eropse injap.

³⁰ Era imiacitak ara mika et mun igpa; et lep atau ira ra aien an nafaiava inig era merit vaig ara.

³¹ Erumu imiahpas Ihova natimi va naiheuc o un, im lep niji auritai imiali o un et ago aien va atimi!

³² Erumu lep asan tas upene vai yin ara an nasjapicnaig u atimi, um imiahpas yin au nasjapicnaig u ilpu atimi tas alep.

³³ Et ika aien yi ame niji ofowai, um lep ika yi ucdamesei nuarin is eteuc niji imtaiwai iran;

³⁴ um ika, yi acen nobohtan aiyu, va nedo has ura era amen iran ara.

³⁵ Et lep ika aien, yi eteuc netpenwai an namasacen, um lep ika, yi ahlau ohua jai inwai an nobohtan ucdamesei.

³⁶ Et mun ika aien, eri amen eahki a ilpu atimi ehtele ra; era mun ago inmaliyum eahki ara, mika eri amen iran;

³⁷ Um ahapol irai uari obohtan, um ahwaig okoro vaine, um ika yi oho upene.

³⁸ Et mun lep asan tas upene vai ra aien; era ahinag ara um emda; et lep ika aien yi ahinag niji itai eklim edo irai pece ura.

³⁹ Eris eti elpat ara va nedo ehcerucai ra, im nohocred ura, im nehtigtaig ura, eris ilpu ihki atimi ara.

⁴⁰ Et amcel vai ilpu atimarid aien, um ika eri ahnag ara an na-masacen, et ti nefalaig iran.

⁴¹ Ja et imiatamaig ilpu ihki atimi aien va nohocred ura, um ika eri idivaig inpak irai siip a ilpu hal ura.

⁴² Erupu almoi a ilpu atimi upene um imiacitak: erupu eucsup a ilpu atimi auatatimi asega.

⁴³ Erupu aktaktai nitai iji igki a ilpu atimi arapakau; erupu lep almoi nedo aiheuc u Ihova.