Saam 106 - Intas Etipup

SAAM 106.

1 Et ahugni atimi a naprofeta mika eri imiahpas Atua ara. 4 Et ugyi Atua aien, mika yi atipagki neruvaig nedo has o un aien, et idivaig is ago aien vai ilpu retpora. 7 Intas va nedo imipalea u atimi, im nedo aiheuc u Atua. 47 Et alaigaheni aien, um imiahpas Atua, ja par ago ehni.

¹ AKUMU imiahpas Ihova aijaua. Akumu ago naaurinig vai Ihova aijaua; et idim upene aien: et idim amen naiheuc o un irai iji mesese.

² Et, emda a di par asuptecnaig niji auritai esjilid u Ihova? etpu imiapaahni nimiahpas o un asega a di?

³ Era mun ahesmoij ara sji igki, era imiaiji intas alep o un ara; im lep ra sji igki era ago nedo atoh ara irai iji opan asega.

⁴ Ak Ihova, namu imiehva nyak aiek an naiheuc inig na ago aiek vai ilpu atimi unyum: namu ateghe nyak aiek, um imiatamaig nyak;

⁵ mika ki almoi ainyak namen upene u ilpu atimi iji ig as ikni ra aiek, um imiacitak va nimiacitak u nup uran pece unyum, um cediaig ehele ilpu atimi unyum.

⁶ Ecris ago nedo has aijama im lep ilpu retpoma, ecris ago nedo acalacal aijama, ecris ago nedo auatatimi aijama.

⁷ Eris eti ato nedo imiali unyum a ilpu retpoma an pece Ijipt; eris eti imiehva nedo aiheuc unyum is ahinag acen ara; ja eris imipalea ara u injap, Injap cap marom.

⁸ Ja is imiatamaig ra aien va nidan, va uhpu ato nemda o un.

⁹ Is lep acaiji Injap cap aien, is um ame: is lep atau ira ra aien irai iji uarin ubo, et idivaig an namasacen.

¹⁰ Is imiatamaig ra aien va nikmai natimi amcel vai ra, um imiaras ra va nikmai natimi tak atimi ira ra.

¹¹ Is ataluopni pam ilpu atimi tak atimi ira ra injap: is eti amen tah ra.

¹² Ja eris par imiisjis ninveijec intas o un ara; eris lep acesaces nohranitai vai yin ara.

¹³ Eris auroauro ara um ahnag irai iji auritai o un; eris eti aitgaig intas o un ara;

¹⁴ eris ahvig emda itai an namasacen ara, um auahas inliinmopoi Atua an tup auun.

¹⁵ Is alupai ra itai aien eris ugyi ara; ja is ika aien yi auatialidi inliinmopora ara.

¹⁶ Eris lep auatitai vai Moses ara an nuarin amen u atimi, im lep vai Eron natimi itap u Ihova.

¹⁷ Is asalgei nipjineucsen nobohtan, um atleg Tedan, um ataluopni pam inpak ira atimi eris leh imi Abairam.

¹⁸ Is cas incap an nibla atimi eris asjapicnaig ara; is atnamud ilpu atimi auatatimi iji ehki nalaume u incap.

¹⁹ Eris ago inhakli kurimatau ara Horeb, um atpuse an nuhup u natmasimai hat iyehki;

²⁰ um ika, eri isjeupigmoig Ihova natimi alupas tira nalmui kurimatau et caig nefelelicai.

²¹ Eris ahnag ira Atua ara is imiatamaig ra aien, is lep ago nedo emda Ijipt aien;

²² nikavaig, niji auritai imiali an pece u ilpu mapoi Ham, im nedo eris imtitaig vaig u Injap cap.

²³ Is lep ika aien, etpu auahas ra aien, ja is aiji a Moses, natimi eris ati yin, an nuhup o un, au nuarin eris alcapdicraig, par atapnes nedemda o un, vai yi jim auahas ra aien.

²⁴ Eris lep amcel van pece upene ara, eris eti eteuc an tas o un ara:

²⁵ ja eris tas upoupo ara iraili eom atga ura, um eti atahaijeg intas o Ihova.

²⁶ Va nitai inigki, is asig yi aktit intas aien vai ra, par atgei ra an namasacen:

²⁷ um lep par atgei ilpu mapora irai iji elcau, um imiterimterim ra irai iji pece.

²⁸ Eris lep apol irai Beal-pior ara, um caig niji itai ahlap eris ahlap iran vai ilpu atmas.

²⁹ Eris auahas inliinmopon ara an nedo has ura: is lep yetpan ira ra nemehe has.

³⁰ Ja is par atidai a Finehas, um aru nedo has ura: is lep tiih nemehe has.

³¹ Eris ika is atoh nedo o un, um yetpan irai iji opan asega.

³² Eris lep auahas inliinmopoi Atua ara ui wai Meriba; is lep leh nohocred a Moses vai ra:

³³ eris idim auahas inliinmopon ara; va nitai inigki, is asan tas maumau an nipjineucsen aien.

³⁴ Eris eti auahas nup urai pece iji ehki ara, is aniv ra ehele ra a Ihova:

³⁵ ja eris ehramen ara im nup urai pece; eris leh nedo ura ara.

³⁶ Eris lep aheca u ilpu atmas ura ara: is itai oop ra nigki.

³⁷ Eris lep ahlap ara irai ilpu halav atamaig ura im ilpu halav atahig ura vai tiapolo;

³⁸ eris atgei ilpu halav upene ura ara; maiya, eris atgei ilpu halav atamaig ura ara, im ilpu halav atahig ura; eris ahlap ira ra ui ara vai ilpu atmas u nup u Kenan; is has inpece ura va natgei atmas iran.

³⁹ Eris lep auahas ra ara va niji auritai ura; eris alaigaheni vai ilpu atmas ara, um ago nedo maumau esjilid.

⁴⁰ Va nitai inigki, is ehcohos nedemda u Atua vai ilpu atimi o un, is lep amcel va atimi iji ehki aien is ikni ra aien.

⁴¹ Is atcijai ra aien an nikmai nup urai iji pece; eris esjilid ira ra a ilpu atimi amcel vai ra.

⁴² Eris lep ehcerucai ra a ilpu a atimi tak atimi ira ra; eris lep apakapak ara an nuhup ura.

⁴³ Is ecahinag imiatamaig ra aien; ja eris auahas inliinmopon ara va naktaktai ura; eris lep ilpu ihki atimi ara va nedo has ura.

⁴⁴ Ja is almoi nohocred ura aien, is wat ahgei intaig ura aien:

⁴⁵ is imiehva vai ra intas etipup o un aien, um ika, yi eche inliinmopon aien, et idivaig naiheuc esjilid o un.

⁴⁶ Is lep ika aien eri aiheuc vai ra ara sji ehki asega eris imiapan ra irai taka pece ara.

⁴⁷ Namu imiatamaig cama aiek, ak Ihova Atua unyima, um asjapicnaig cama ehele nup urai iji pece, mika ecri ago naaurinig aijama vai nidam upene, um imiacitak par imiahpas euc.

⁴⁸ Uhmu naaurinig vai Ihova Atua u nup Isreel, ahes itu acen um yetpan irai iji mesese asega: erumu lep ika natimi asega, Emen. Akumu imiahpas Ihova aijaua.