Saam 105 - Intas Etipup

SAAM 105.

1 Er ahugni atimi mika eri imiahpas Atua, um ahilek niji auritai o un. 7 Intas va nedo o Atua ehele Ebraham, 16 im Josef, 23 im Jekob an pece Ijipt, 26 im Moses an nimicoho nup Isreel o un, 37 im lep ehele nup Isreel, is wat imiatamai ra an pece Ijipt a Atua, um alaa ra nitai hegaig an namasacen, um ikni ra an pece Kenan.

¹ AKUMU ago naaurinig vai Ihova aijaua; arohwai nidan: asuptecnaig ehele nup urai iji pece niji auritai o un.

² Akumu acesaces nohranitai vai yin aijaua, um imiahpas yin: akumu aktaktai niji auritai imiali asega o un aijaua.

³ Akumu imiacitak nidan itap aijaua: etpu imiacitak inliinmopoi ra sji igki era ahilek Ihova ara.

⁴ Akumu ahilek Ihova aijaua im nemda o un: akumu ahilek nesganimtam aijaua irai iji idiat.

⁵ Akumu imiehva nauritai imiali iji ehki aijaua is ago aien, im nedo imiali o un, im intas alep asega an nipjineucsen;

⁶ ak ilpu mapoi Ebraham, naheca o un; ak ilpu mapoi Jekob, is ikni caua aien.

⁷ Et Ihova aien Atua uja: er ato nedo ated atimi o un an nobohtan asega.

⁸ Is imiehva intas etipup o un aien irai iji mesese; intas iyehki is asaig aien ehele ilpu atimi o un, um yetpan irai iji opan asega;

⁹ intas o un iyehki is upyi asaig ehele Abraham aien, im intas o un is asig yi aktit aien ehele Aisak;

¹⁰ is lep ati aktit ehele Jekob aien, mika yi tas alep imi yin; im lep ehele Isreel, mika yi tas etipup imi yin irai iji mesese;

¹¹ um ika, Ekpu alupai euc inpece Kenan ainyak, mika aki ohuun aijaua:

¹² eris wat eti elpat ara; um eti ahinag, um tak atimi iran.

¹³ Eris wat ahes ara an pece is ethi, um apan an taka pece; um lep ahes an nelcau is ethi, um apan ehele nup urai taka pece;

¹⁴ is acaiji atimi asega aien, va eri jim ehcerucai ra ara: is lep ated ilpu atimarid aien vai ra;

¹⁵ um ika, Akumu jim atcei pan ilpu atimi itap unyak aijaua, um jim ago tah nedo has vai ilpu profeta unyak.

¹⁶ Is lep ika aien yi umlaig has inpece: is atipagki nitai asjiraig nohu atimi asega aien.

¹⁷ Is abrai natimi is ethi aien mika yi uhup ira ra, Josef marom, eris ahtai yin mika yi aheca aien:

¹⁸ eris ika etpu emda neduon vai wau: eris ati natau hat iran:

¹⁹ um imihum pan an nopan iyehki eris ehneijid intas o Ihova, is ahilek inliinmopon intas iyehki.

²⁰ Is abra atimi a natimarid par ahiyi yin; natimarid u nup uran pece marom, um atcijai yin.

²¹ Is ati yin aien, mika yi esjilid aien an nimnim o un, um atimi aminjinaig padiaig asega o un:

²² par arore ilpu atimi alupas o un, is wat upene iran; um esege narapakau imi ilpu atimi tas alep o un.

²³ Is lep yetpan an pece Ijipt a Isreel; eris lep amen a ilpu mapoi Jekob an pece u ilpu mapoi Ham.

²⁴ Is ika aien eri asvalav alupas a ilpu atimi o un; is lep ika aien eri emda ara um esjilid irai ilpu atimi ehcerucai ra.

²⁵ Is lep ahidaig inliinmopora aien, mika eri amcel vai ilpu atimi o un ara, um ago nedo efaifa vai ilpu aheca o un.

²⁶ Is abrai Moses aien, mika yi aheca o un aien; im Eron iyehki is ati yin aien.

²⁷ Erus asuptecnaig intas o un ehele ra arau, um ehvai itai asjaaicnaig o un, im nedo imiali o un, an pece u ilpu mapoi Ham.

²⁸ Is ati inmehcim aien, um ika yi apat; ja eris eti imipalea intas o un ara.

²⁹ Is ika aien yi ja niji wai ura; is atgei niji mu ura aien.

³⁰ Is amen inmopmop an wai is ahinag an pece ura, im lep iraili eom umjeg u ilpu atimarid ura.

³¹ Is tas aien, ja is ehcohos niji pak irai lag, im nicet irai iji uari pece ura.

³² Is ati vai ra incopda hat aien va incopda, im incap alaume an pece ura.

³³ Is lep auahas vaine ura aien, im niji ateg ura, um ahtasvi niji cai irai iji uari pece ura.

³⁴ Is tas aien, is um ehcohos niji heled, im niji imyeuv haklin, is elika nesvi ra vaig;

³⁵ um ahtahni inceslum asega an pece ura, um caig nohwai itai ira ahopol ura.

³⁶ Is lep atgei ilpu halav inmeto asega aien an pece ura, inmeto an nemda asega ura marom.

³⁷ Is iknipagki ra aien; eris lucsei colt im silver ara: is lep eti amen tah natimi auatialidi irai eteuc ira ra.

³⁸ Eris imiacitak a nup Ijipt va napan ura: eris idim imtitai ra ara.

³⁹ Is elgelgei napat aien mika yi aiyu vai ra; im incap mika yi lah an nepig.

⁴⁰ Eris ugyi itai natimi, is lep imiapam inman aien; eris geije ara va nitai caig is ahes an nohatag.

⁴¹ Is asalgei inhehteuc aien, is lep ahlau ohua inwai iran; is yah irai amasacen is idivaig nofowai.

⁴² Vaig inig nikavaig, is imiehva intas etipup upene o un aien ehele Abraham naheca o un.

⁴³ Is iknipagki ilpu atimi o un aien, eris cediaig ara; im ilpu atimi iji ig is ikni ra aien, eris imiacitak ara:

⁴⁴ is alupai ra niji pece u ilpu atimi tak atimi ira ra aien: eris ohuun nauritai u nup urai iji pece ara;

⁴⁵ va erupu imiaiji niji tas asuptecnaig o un ara, um apos niji tas alep o un. Akumu imiahpas Ihova aijaua.