Saam 104 - Intas Etipup

SAAM 104.

1 Intas va nemda alupas u Atua, 7 im niji auritai imiali o un. 31 Inyi eti tiih natimi alupas u Atua. 33 Et asan tas etipup a naprofeta, um ika, yi imiahpas Atua aien irai iji opan asega.

¹ AK nesgak, namu imiahpas Ihova aiek. Ak Ihova Atua unyak, na esjilid acen aiek; na aso euc aiek an nimiahpas im natimi alupas.

² Na aso euc aiek an lah et idivaig an napelumai: um elgelgei nohatag et idivaig napamas:

³ et ago niji uarin eom ijinies o un aien irai wai: et ika aien yi jariot o un napat: et ae aien an nehpan nimtinjap:

⁴ et ika aien eri agelo o un niji imtinjap; um lep aheca o un niji cap alaume:

⁵ is ati nededuon nobohtan aien, va yi jim amaamai irai iji mesese.

⁶ As adahpoi an jap aiek, et idivaig napelumai: is ataluopni lola edoon inwai.

⁷ Is achadaliyek inwai an nobohtan van tas alep unyum: is auroauro um tiih va nohran natciteuc u unmunuka unyum.

⁸ Et aridjai irai iji edoon niji wai; et lep asuol niji wai irai iji iskanse, um yetpan an nuarin inig as ati vai ra aiek.

⁹ As ati natcai aiek, vai yi jim atijai injap um ahtaregdei, um ataluopni nobohtan.

¹⁰ Is ika aien yi ahlau ohua inwai irai iji iskanse, et lep yah irai iblai edoon.

¹¹ Era umnyi niji itai eklim edo irai pece asega: era lep ehginwai niji togke aleg.

¹² Era amen ithan niji man an nauanohatag; era laav ara irai rai cai.

¹³ Et ohwaig niji edoon aien, ahes irai iji uarin amen ijinies o un: et geije niji itai an nobohtan irai ohwai itai na ago aiek.

¹⁴ Et ika aien yi ededel nefelelicai incai niji itai eklim edo irai pece, im inceslum mika eri ahwaig natimi: um ika yi ededel niji itai hegaig an nobohtan.

¹⁵ Et imiacitak inliinmopoi atimi va nide vaine, mika yi naunau nesganimtara, um esjilid irai narakei; et lep asjiraig nohu atimi nitai caig.

¹⁶ Et ededel upene niji cai u Ihova; niji cai sitar Lebanon marom is ahwaig aien;

¹⁷ era ago nasiom ura iran niji man haklin; ja et uarin amen niji man alupas niji eijiv.

¹⁸ Et uarin amen u niji anin aleg niji lola au ijinies; era atpuh irai mai ij niji cedo.

¹⁹ Is ati inmohoc aien par asjaaicnaig niji opan: et ispun ato nopan ete o un nagesega.

²⁰ Na ago napat aiek, et um epig: era edo sjipe iran niji itai eklim edo irai pece aleg asega.

²¹ Era aunyauwaig va nitai caig incara niji laion emda, um ahilek nitai caig incara ehele Atua.

²² Et aridjai nagesega, era asjapicnaig ara, um asjeuc irai kakwaikuri ura.

²³ Era apan natimi u nauritai ura, im lep u itai era ago ara, um yetpan an jupura.

²⁴ Ak Ihova, et ahinag um acheiachei niji auritai unyum! as ago niji itai asega aiek an narapakau unyum: et ohua niji itai upene unyum an nobohtan;

²⁵ im lep injap esjilid inigki, et alupas um marara; et amen iran niji itai atga et ehka nesvi vaig, niji itai umumoh haklin um alupas.

²⁶ Et atga iran niji elcau: et lep amen iran niji yau, as ago ra aiek mika eri aliaujai iran.

²⁷ Era aitgai euc nitai iji igki asega; va apu alaa ra nitai caig aiek incara irai iji opan ehtele ra.

²⁸ Era asjapicnaig nitai iji igki ara na alupai ra aiek: na asalgei nikmam aiek, era geije ara va niji itai hegaig.

²⁹ Na adenaig nesganimtam aiek, era ohocred ara: na atipagki nitai umoh iran ura aiek, era emesmas ara, um adumoij pan an nobohtan.

³⁰ Na abrai Nesgam aiek, um ago ra: na lep ago upene narasin nobohtan aiek.

³¹ Etmu amen natimi alupas u Ihova irai iji mesese: etmu imiacitak niji auritai o un a Ihova.

³² Et ias pam an nobohtan aien, et um amaamai: et atcei pan niji edoon aien, et lep ahes nadran cap iran.

³³ Ekpu acesaces nohranitai vai Ihova ainyak an numoh unyak: ekpu acesaces nohranitai ainyak, um imiahpas Atua unyak an namen unyak an nobohtan asega.

³⁴ Ekpu aktaktai yin ainyak an liinmopok upene: ekpu imiacitak Ihova ainyak.

³⁵ Uhmu auahas ilpu atimi ago nedo has an nobohtan; erumu lep tiih a ilpu atimi auatatimi. Ak nesgak, namu ago naaurinig vai Ihova aiek. Akumu imiahpas Ihova aijaua.