Saam 103 - Intas Etipup

SAAM 103.

1 Er ahugni atimi mika eri imiahpas Atua va naiheuc o un, 15 im lep va namen aktit iran.

¹ EKMU imiahpas Ihova ainyak: etmu lep imiahpas nidan upene inliinmopok asega ainyak.

² Ekmu imiahpas Ihova ainyak, um jim ahnag an nedo aiheuc asega o un:

³ et iknipagki nedo has asega unyum aien, um ago cehcehe euc va nemehe asega unyum;

⁴ et imiatamai euc aien va nehpanitai; et atijai iram aien nedo aiheuc im nedo upene o un;

⁵ et alupai euc niji itai upene et ahinag aien; et ika aien nai lep takuras aiek, um emda, et idivaig inmeijcop alupas.

⁶ Et ago nedo atoh im nedo upene a Ihova vai ilpu atimi asega er ehcerucai ra; et lep ago neruvaig vai ra aien.

⁷ Is asuptecnaig nedo o un ehele Moses aien, im niji auritai o un ehele nup Isreel.

⁸ Et eti eriss irai ilpu atimi o un a Ihova, ja et aiheuc vai ra aien; et eti fi auroauro aien um atavaitap, ja et esjilid naiheuc o un.

⁹ Inyi eti imiisjis ehele atimi um yetpan irai iji opan aien: inyi eti lep edemda aien irai iji mesese.

¹⁰ Et mun eti ago iraija aien is idivaig nedo has uja; um eti aru iraija is idivaig nedo acalacal uja.

¹¹ Et idim ijinies nohatag an nobohtan; et idim uco, et esjilid naiheuc o un vai ra era imtitai yin ara.

¹² Et idim itac acen inridjai o un va nete o un; et idim uco, et mun ikni itac acen vai caija nedo imipalea uja aien.

¹³ Et idim aiheue vai ilpu ha, o un a etmara; et idim uco, et aiheuc vai ra sji igki a Ihova era imtitai yin ara.

¹⁴ Et idim ato nago iraija aien, et imiehva aien mika inta obohtan akaija.

¹⁵ Et idivaig nefelelicai niji adiat, ira atimi: era idivaig intisiaicai an nobohtan natimi an numumoh ura.

¹⁶ Et yetpan nimtinjap iran, um lep tiih; er eti lep ecetai an nuarin o un.

¹⁷ Ja et amen naiheuc u Ihova vai ra sji igki era imtitai yin ara ahes itu acen um yetpan irai iji mesese, im lep nedo atoh o un irai ilpu mapora;

¹⁸ nikavaig, irai ra sji igki era apos intas etipup o un ara, um lep ra sji igki era imiehva intas alep o un, um imiaiji.

¹⁹ Is ati aktit natimi alupas o un an nohatag a Ihova; et lep atimarid aien irai iji itai asega.

²⁰ Akumu imiahpas Ihova aijaua, ak ilpu agelo o un, et esjilid nemda unyimia, eka imiaiji intas o un aijaua, um atahaijeg nohran tas o un.

²¹ Akumu imiahpas Ihova aijaua, ak nup uran nohatag asega; ak ilpu aheca o un, eka ago nitai merit o un aijaua.

²² Akumu imiahpas Ihova aijaua, ak niji auritai asega o un, irai iji uarin asega an nelcau o un: ak nesgak, namu imiahpas Ihova aiek.