Saam 102 - Intas Etipup

SAAM 102.

1 Et alaigaheni a naprofeta um asan tas ehti. 12 Et aktaktai aien mika et amen naiheuc u Atua irai iji mesese, ja par eropse inliinmopon. 18 Et upene par aged nedo aiheuc u Atua. 23 Et ago emda inliinmopon aien, vaig inig nikavaig, et eti eche a Atua.

¹ AK Ihova, namu atahaijeg intas alaigaheni unyak aiek; etmu lep yetpam ehelum nahlaig unyak.

² Namu jim adenaig nesganimtam vai nyak aiek; namu atgeig pam intikgam aiek ehelek an nopan ohocred unyak: namu auroauro aiek um adai intas unyak an nadiat inig ekpu ahlaig vai euc ainyak.

³ Et mun idim tiih niji adiat irak et idivaig nadran cap; et cas niji eduok et idivaig incap an mun uum.

⁴ Er auud inliinmopok, et lep imlai um idivaig nefelelicai; ek mun idim eti imiehva ainyak inhag vaig.

⁵ Et apol an narasik niji eduok va naunyauwaig unyak.

⁶ Et idivaig inman an namasacen ainyak: ek idivaig nalidmot ainyak irai imnim ahyuahyu.

⁷ Ek aiji lahlah ainyak, um idivaig inman haklin et echim ateuc ijinies an neom.

⁸ Era mun imiafakahcil nyak a ilpu atimi tak atimi irak an nadiat asega; era lep asan tas itap vai nyak ara sji igki era atavaitap alupas vai nyak ara.

⁹ Ek mun idim caig nohpa ainyak et idivaig nareto, um umnyi inwai pelaig an nidiimtak,

¹⁰ va nedemda unyum im intavaitap unyum: na mun idim leh nyak aiek um ethaig pan nyak.

¹¹ Et tup tiih nadiat irak et idivaig nalmuitai et wat tiih; ek lep imlai ainyak et idivaig nefelelicai.

¹² Ja napu amen aiek irai iji mesese, ak Ihova; uhpu lep imiehva euc um yetpan irai iji opan asega.

¹³ Napu atidai aiek, um aiheuc vai nup u Saion: etu wit yetpam nopan aiheuc vai ra, nopan marom eris upyi asaig.

¹⁴ Eru wit imiacitak niji hat iran a ilpu aheca unyum, um merit vai nobohtan iran.

¹⁵ Erupu lep imtitai nidai Ihova a nup urai iji pece; erupu lep ecen va natimi alupas unyum a ilpu atimarid asega an nobohtan.

¹⁶ Vaig inig nikavaig, et mun actaig ehni Saion a Ihova; et mun ehcohos pan aien an natimi alupas o un.

¹⁷ Et mun ahidaig pam yin aien u nalaigaheni u ilpu ihki atimi, um eti amcel vai nalaigaheni ura.

¹⁸ Uhpu aged intas inigki va atimi an taka opan: erupu lep imiahpas Ihova natimi iji ig uhpu lep apos ra.

¹⁹ Et mun idim ias sepam aien an nuarin itap o un ijinies; et mun amen an nohatag a Ihova um ahnoi uobohtan;

²⁰ par atahaijeg naunyauwaig u ilpu atimi eris arore ra; um ahiyi ra sji igki eris asaig inmas ura;

²¹ mika eri asuptecnaig nidai Ihova Saion, um imiahpas yin Jerusalem;

²² eru wit asjapicnaig nup urai iji pece, im nup urai iji elcau, par aheca u Ihova.

²³ Et mun atipagki nemda unyak aien an nefalaig; et mun ika aien inyi eti elpat nadiat irak.

²⁴ Ekpu ika ainyak, Ak Atua unyak, namu jim atipagki nyak aiek an takuras unyak: na idim amen aiek irai iji mesese.

²⁵ As ati aktit nededuon nobohtan aiek itu acen: et lep auritai u ikmam nohatag.

²⁶ Etpu tiih nitai iji igki, ja napu amen aktit aiek: etpu idim mohtan nitai iji igki asega et idivaig napelumai; napu iknipagki ra aiek et idivaig napelumai, uhpu idim iknipagki ra:

²⁷ jai na eti eche aiek, inyi eti lep ti inmesese iram.

²⁸ Erupu amen aktit a ilpu hal u ilpu aheca unyum, uhpu ikni aktit ilpu mapora an nuhup unyum.