Saam 101 - Intas Etipup

SAAM 101.

Et asan tas etipup a Tevit, um ika yi ago nedo ecen va Atua aien.

¹ EKPU acesaces nohranitai ainyak va nedo aiheuc im nedo atoh unyum: ak Ihova, ekpu acesaces nohranitai ainyak vai euc.

² Ekpu ago nedo arapakau ainyak; etpu upene asega nedo unvak. Napu apam ehelek aiek an nahopan? ekpu atga ainyak an liinmopok inveijec an nuhup u ilpu hal unyak.

³ Inki eti ati tah intas has ainyak an nuhup unyak: ek amcel vai nedo acalacal ainyak; inyi eti apol irak.

⁴ Ekpu atcijaig inliinmopok imipalea ainyak: inki eti ato nedo has ainyak.

⁵ Ekpu auahas natimi inig ainyak et asan tas auatitai vai etwan aien jam ateri: ek esjum ainyak vai natimi inig et ijinies nedo o un, um lep aktaktai has an liinmopon.

⁶ Etpu amen nesganimtak irai ilpu atimi inveijec an pece, va erupu amen ehelek ara: etpu aheca unyak aien et upene asega nedo o un.

⁷ Inyi eti amen an nimnim unyak aien et ago nedo efaifa aien: inyi eti amen aktit an nuhup unyak aien et asan tas ahcil aien.

⁸ Ekpu auahas ilpu atimi auatatimi asega au pece ainyak an nuhialeg; mika ki auahas ilpu atimi ago nedo has asega ainyak an maliyum u Ihova.