Saam 10 - Intas Etipup

SAAM 10.

1 Et asuptecnaig ehele Atua a Tevit nedemda u ilpu atimi auatatimi. 12 Et ugyi Atua aien mika yi aru nedo ura. 16 Et ika aien et imiisjis ninveijec aien.

¹ AK Ihova, na a uri aiek par amen itac acen? na a uri aiek par adenai euc irai opan ohocred unyima?

² Era atmas vai ilpu atimi upene a ilpu atimi auatatimi an liinmopora ijinies; ja uhpu apro ra an nedo efaifa eris aktaktai ara.

³ Vaig inig nikavaig, era tas emda vai inmerit u inliinmopora a ilpu atimi auatatimi, um acis yi alwai ilpu atimi has ira ra itai et amcel vai ra a Ihova.

⁴ Era eti ahilek Atua a ilpu atimi auatatimi va nijinies u inliinmopora, era idim eti aktaktai Atua ara.

⁵ Era amen upene ara irai iji adiat; et elika vai ra nato vaig neruvaig unyum; era lep amcel vai ilpu atimi tak atimi ira ra asega ara.

⁶ Era aktaktai an liinmopora ara, um ika, Intupu eti amaamai akaija: inyi eti yetpam iraija tah nohocred nai iji mesese.

⁷ Et ohua intas ahlaijaig, im intas efaifa, im intas ehcerucai atimi an nipjineucsera, era asan tas ohocred vaig ara, im intakitai irai ohrara.

⁸ Erupu ateuc ara irai iji uarin atpuh iran nai iji maliyum: erupu atgei ilpu atimi et ti nedo has ura ara irai iji uarin adenaig: erupu atpaijinai ilpu atimi ohocred ara.

⁹ Erupu atpuh ara an nuarin atpaijina atimi, um imiiris atimi, et idivaig laion et amen aien a kakwaikuri o un; era atpaijinaig ilpu atimi ohocred ara, miki eri arop ira ra; era anai ilpu atimi ohocred ara an nopoig ura, ja par arop ira ra.

¹⁰ Erupu atga auopauop ara um atpuse; era eropropse a ilpu atimi ohocred vai ilpu eucsupo ma.

¹¹ Et ika inliinmopora ara, Et eti imiehva itai a Atua: et adenaig nesganimtan aien; inyi eti lep alum caija aien irai iji mesese.

¹² Ak Ihova, namu atidai aiek; ak Atua emda acen, namu adaigjai nikmam aiek; jim ahnag nai ilpu atimi ohocred aiek.

¹³ Era a uri a ilpu atimi auatatimi par amcel vai Atua? et mun ika inliinmopora ara, Napu eti ahilek nedo unyima aiek.

¹⁴ Na mun ecetai aiek, nikavaig, na mun almoi nehcerucai atimi ura aiek, im lep nedemda ura, mika an aru an nikmam aiek: era asgeig iram a ilpu atimi ohocred; na atau imi ilpu umnij aiek.

¹⁵ Namu asvi nikmai ilpu atimi auatatimi aiek; napu ahilek nedo has u ilpu atimi ago nedo has aiek, um yetpan an nopan tivaig o un.

¹⁶ Et Atimarid a Ihova irai iji mesese: era idim tiih a ilpu atimi apat an pece o un.

¹⁷ Ak Ihova, na mun atahaijeg inmerit u ilpu atimi upoupo aiek: napu ago emda inliinmopora aiek: napu atgeig pam intikgam aiek, um atahaijeg intas ura;

¹⁸ mika an aru atoh ilpu umnij im ilpu atimi ohocred aiek, va erupu eti lep imiisjis ehele Atua natimi era ahes an nobohtan ara.