Obataia 1 - Intas Etipup

1 Er ika uhpu auahas nup Itom, 3 va nijinies u inliinmopora, 10 va nedo ipjin ura vai ilpu mapoi Jekob. 17 Er ika uhpu imiatamaig ilpu mapoi Jekob, erupu lep esjilid ira atimi ara.

¹ NITAI inig is ahuumtidec, iran a Obataia nigki. Et ika a Ihova Natimarid vai nup Itom; Ecra mun atahaijeg intas o Ihova et ethi aijama, er abrai natimi leh intas et ethi par apan ehele nup urai iji pece, um ika, Atidai aijaua, ti ago nedoa vai ra akaija.

² Ek mun idim ika ainyak eka takitai aijaua ehele nup urai iji pece: er amcel alupas vai caua.

³ Et imiahnag caua nijinies u inliinmopomia, ak ilpu atimi amen ijinies irai mai ij, et ijinies nuarin iji ig eka amen iran aijaua; et ika inliinmopomia aijaua, Et emda a di par imiasuol caija an nobohtan?

⁴ Et ika a Ihova; El et ijinies nuarin amen iran unyimia um idivaig nuarin amen iran u inmeijcap alupas, el eka ago niji asiom imi caua aijaua irai iblai moijeuv an nohatag, ekpu imiasuol caua ainyak eahki.

⁵ El eris ham ehelemia a ilpu atimi ehnegitai, im ilpu atimi atoraliak itai an nepig, (kaiheuc vai caua, er auahas caua!) el eris ehnegitai ara is upene ira ra ache; el eris ham ehelemia a ilpu atimi aldei ohwai vaine, el eris udei hal igai vaine ara.

⁶ Er idim ahilek niji itai adenaig u ilpu mapoi Isa! er idim ato upene niji uarin adenaig ura!

⁷ Era mun ahau caua um yetpan an tid an pece unyimia a ilpu atimi asega eris apol iramia ara: era mun ahiyek caua a ilpu atimi tup ethi ache pan iramia, um lep esjilid iramia; era mun ati nitai apro itai ithamia a ilpu atimi caig nitai caig unyimia: et ti naktaktai itai ehelemia.

⁸ Et ika a Ihova, An nadiat, iyehki ekpu idim auahas ilpu atimi arapakau irai up Itom ainyak, um lep auahas ilpu atimi ato itai irai ilpu mapoi Isa.

⁹ Ak nup u Timan, erupu imtitaig a ilpu atimi emda unyimia, mika eri atgei ehni atimi asega an nedoon u ilpu mapoi Isa.

¹⁰ Akupu ehcamai alupas aijaua va natgei atmas unyimia, im nedo ipjin unyimia, vai ilpu mapoi Jekob, ilpu etwamia marom, akupu lep atiih ehni aijaua irai iji mesese.

¹¹ An nadiat iyehki akis wat aiji aijaua um idivaig ilpu atimi tak atimi ira ra, an nadiat iyehki marom eris wat lucsei pan niji ira atimi ura a nup urai taka pece, eris wat atga irai eucse athatahau ura a ilpu atimi an taka uarin, um ago itai asjaaicnaig irai up u Jerusalem, akis idim idivaig hal ra aijaua.

¹² Is eti upene vai caua par tup almoi ilpu etwamia an nadiat ohocred ura, an nadiat iyehki eris wat ika eri ilpu ohna ara; is lep eti upene vai caua par imilaav nup u Juta an nadiat iyehki eris auahas ra iran; is lep eti upene vai caua par asaig intas ijinies an nadiat ohocred ura.

¹³ Is eti upene vai caua par apan an neucse nathatahau u ilpu atimi unyak an nadiat ohocred ura; is eti upene vai caua par tup almoi nehtigtaig ura an nopan ohocred ura; is lep eti upene vai caua par lucsei itai ura an nopan ohocred ura;

¹⁴ is lep eti upene vai caua par aiji an nihtag u efalaig, par atgei ilpu atimi ura eris aha ara; is lep eti upene vai caua par atcijaig imi nup urai iji pece ilpu ahrira an nadiat ohocred ura.

¹⁵ Et idim ubutpotet nadiat u Ihova vai nup urai iji pece asega eri ago iramia et idivaig nedo unyimia akis ago aijaua: etpu adumoij pam iramia nedo inig akis ago aijaua.

¹⁶ Akis umwig aijaua an nedoon itap unyak, et idim uco, erupu lep umwig a nup urai iji pece asega yi itu ira ra, erupu idim umwig ara, um umwig alupas, ja erupu idivaig atimi iji ig ara era atiih ehni ara.

¹⁷ Ja erupu amen an nedoon Saion ara sji igki erupu aha ara, erupu lep itap ara; erupu lep ohuun niji uari pece ura a ilpu mapoi Jekob.

¹⁸ Erupu idivaig incap a ilpu mapoi Jekob, erupu idivaig incap alaume a ilpu mapoi Josef, ja erupu idivaig inceen hwiit a ilpu mapoi Isa, erupu atnamud ra ara, um auahas ehni ra; inyi eti amen tah nahri ilpu mapoi Isa; is idim asaig a Ihova.

¹⁹ Erupu ohuun nedoon u ilpu mapoi Isa a ilpu atimi amen an nuarin inig et ahes nuritoga iran; erupu ohuun inpece u nup u Filistia a nup an nuarin marara: erupu ohuun inpece u nup Ifreem ara, im lep inpece u nup u Sameria; erupu lep ohuun inpece Cileat a ilpu mapoi Benjamin.

²⁰ Ja erupu ohuun niji maliyum an pece iyehki et ahes nuritoga iran a ilpu ohua u nup Isreel, era amen ehele nup u Kenan ara, um yetpan an maliyum Sarefad, im lep ilpu ohna u nup u Jerusalem, era amen an pece Sefarad ara.

²¹ Erupu ehcohos pam an nedoon Saion a ilpu atimi imiatamaig atimi, mika eri almaijidjid nup an nedoon Itom; etpu ohuun nelcau a Ihova.