Numera 9 - Intas Etipup

Nuarin tas alupas 9.

1 Et aketo a Atua um tas alep mika eri aminjinaig nasjapicnaig u nahtaregdei atimi. 6 Er ati nahtaregdei atimi sekunt va atimi eris auahas nitap ura im natimi an taka uarin. 15 Et asjaaicnaig irai up Isreel napat mika eri atga im lep mika eri atumop.

¹ IS tas a Ihova ehele Moses an namasacen Saine, an mohoc uhup an mesese sekunt an nahes ura an pece Ijipt, um ika,

² Erumu aminjinaig nasjapicnaig va nahtaregdei atimi a nup Isreel an nopan eris ati.

³ Akumu aminjinaig aijaua an nopan eris ati, an mohoc inigki an nadiat fortiind an jupura: akumu aminjinaig aijaua et idivaig intas alep asega vaig, im nedo asega iran.

⁴ Is tas a Moses ehele nup Isreel, mika eri aminjinaig nasjapicnaig va nahtaregdei atimi ara.

⁵ Eris aminjinaig nasjapicnaig iyehki ara an mohoc uhup an nadiat fortiind an jupura an namasacen Saine: eris ago niji itai asega a nup Isreel, is asaig a Ihova ehele Moses.

⁶ Eris has hal atimi va nohun natimi mas is ethi, is ehka vai ra naminjinaig vaig nahtaregdei atimi an nadiat iyehki: eris apan ara an nuhup u Moses, im lep an nuhup u Eron an nadiat iyehki:

⁷ eris ika ehelen natimi iji ehki, Ecra mun auahas nitap unyima aijama va nohun natimi mas: er a uri par atapnes cama, mika ecri jim ahlap aijama Vai Ihova an nitai ahlap pan irai up Isreel an nopan eris ati?

⁸ Is ika a Moses ehele ra, Eklim erop, ekpu atahaijeg intas o Ihova ainyak vai caua.

⁹ Is tas a Ihova ehele Moses, um ika,

¹⁰ Namu tas aiek ehele nup Isreel, um ika, El et auahas nitap o un tah caua ka tah ilpu mapomia va nohun natimi mas, ka atga an taka uarin, etmu aminjinaig nahtaregdei atimi va Ihova aien.

¹¹ Erumu aminjinaig ara an mohoc sekunt an nadiat fortiind an jupura, um caig pan ira areto et ti leven iran im inceslum acen.

¹² Erumu jim udei tah nuarin ara um yetpan an nuhialeg um jim asvi tah neduon: erumu aminjinaig nahtaregdei atimi ara et idivaig nedo asega iran.

¹³ Ja natimi inig et upene aien, um eti atga an taka uarin, jam eti aminjinaig nahtaregdei atimi, uhmu atipagki natimi inig ehele ilpu atimi o un: etpu amen nedo has irai natimi inig, va nedo o un, nikavaig, is eti imiapam nitai ahlap vai Ihova aien an nopan eris ati.

¹⁴ El et amen ehelemia tah natimi an taka pece, um ika yi aminjinaig nahtaregdei atimi vai Ihova; etmu ago aien et idivaig intas alep vai nasjapicnaig iyehki im lep idivaig nedo iran: inyi tup ethi ache intas alep va atimi an taka pece, im lep nup uran pece.

¹⁵ Is ataluopni neom itap napat an nadiat iyehki eris athai neom itap, nikavaig, neom atga is amen intas alep iran: is wat jupura is amen ijinies an neom itap nitai is idivaig incap um yetpan an nuhialeg.

¹⁶ Is lep uce irai iji adiat: is ataluopni neom itap napat an nadiat, im nitai is idivaig incap an nepig.

¹⁷ Eris atipagki napat ijinies an neom itap, ja eris par atga a nup Isreel: eris lep athai eom atga ura a nup Isreel an nuarin is amen napat iran.

¹⁸ Eris atga a nup Isreel vai intas o Ihova, eris lep atumop ara vai intas o Ihova: eris atumop ara iraili eom atga ura an namen asega u napat ijinies an neom itap.

¹⁹ Is wat amen napat ijinies an neom itap ira adiat is ahinag, eris imiaiji intas o Ihova a nup Isreel, um eti atga.

²⁰ Is wat lep amen napat ijinies an neom itap ira adiat is eti elpat; eris amen iraili eom atga ura ara vai intas o Ihova, eris lep atga ara vai intas o Ihova.

²¹ Is wat lep amen napat an jupura um yetpan an nuhialeg, el eris atipagki napat, an nuhialeg eris atga ara: eris wat atipagki napat an nadiat ka an nepig eris atga ara.

²² El is amen aktit napat ijinies an neom itap ira adiat is ero, ka inmohoc is ethi, ka inmesese is ethi, eris amen a nup Isreel iraili eom atga ura ara, um eti atga: ja eris wat atipagki napat eris atga ara.

²³ Eris amen iraili eom atga ura ara vai intas o Ihova, eris lep atga ara vai intas o Ihova: eris imiaiji intas o Ihova ara, is idivaig is asaig a Ihova irai Moses.