Numera 8 - Intas Etipup

Nuarin tas alupas 8.

1 Nedo ura par atni lamp. 5 Nati vaig u ilpu mapoi Livai. 23 Niji mesese ira ra im nopan u nauritai ura.

¹ IS tas a Ihova ehele Moses, um ika,

² Namu tas aiek ehele Eron, um ika ehelen, Nau wit atni lamp aiek, etmu ere lamp et seven an nuarin uhup u nitai atijai incap alahala iran.

³ Is ago is uce a Eron; is atni lamp iji ehki aien an nuarin uhup u nitai atijai incap alahala iran, is idivaig is asaig a Ihova ehele Moses.

⁴ Eris ago nitai atijai incap alahala iran irai colt ipjin, is lep colt ipjin inhus o un, im intisian: is ago nitai atijai incap alahala iran aien, is idivaig nitai asjaaicnaig is ehvaig a Ihova ehele Moses.

⁵ Is tas a Ihova ehele Moses, um ika,

⁶ Namu iknipagki ilpu mapoi Livai aiek irai up Isreel, um ago adicinadicin ra.

⁷ Ago adicinadicin ra an nedo inigki: Ohai ra irai wai er upene vaig, erumu lep ucsei nohura asega ara, um yiri apelumai ura, um ago adicinadicin ra.

⁸ Erumu lep leh kurimatau atamaig takuras ara, im nitai ahlap an nitai caig, nikavaig, flaur upene er aplamod an narakei, im lep kurimatau atamaig takuras et eche par itai ahlap va nedo has.

⁹ Ja par imiapan ilpu mapoi Livai an nuhup u neom er asjapicnaig o un: um lep asjapicnaig nup Isreel asega:

¹⁰ namu imiapan ilpu mapoi Livai aiek an nuhup u Ihova: erumu lep ikni nikmara ijinies irai ilpu mapoi Livai a nup Isreel:

¹¹ etmu lep ikni ilpu mapoi Livai a Eron an nuhup u Ihova, nitai ahlap u nup Isreel, mika eri auanaheca u Ihova ara.

¹² Erumu ikni ikmara a ilpu mapoi Livai ijinies irai kurimatau erahki: uhmu ahlap iran yi ethi nitai ahlap va nedo has, im lep iran yi ethi nitai ahlap atnamud vai Ihova, par adahpoi nedo has u ilpu mapoi Livai.

¹³ Namu ikni ilpu mapoi Livai aiek an nuhup u Eron im lep an nuhup a ilpu hal o un, um ikni ra par itai ahlap vai Ihova.

¹⁴ Namu iknipagki ilpu mapoi Livai aiek et uce irai up Isreel: erupu unyak a ilpu mapoi Livai.

¹⁵ Ja erumu apan a ilpu mapoi Livai um auanaheca an neom er asjapicnaig o un: namu ago adicinadicin ra aiek, um ikni ra par itai ahlap.

¹⁶ Eris idim ikni ra imi nyak irai up Isreel; kis lep lucsei ra ainyak, par isjeupigmoig ra sji igki er uhup um apos ra, inmeto asega marom irai up Isreel.

¹⁷ Era unyak a inmeto asega irai up Isreel, natimi im niji itai eklim edo irai pece: kis imiitap ra ainyak vai nyak an nadiat iyehki kis auud inmeto asega ainyak an pece Ijipt.

¹⁸ Kis lep lucsei ilpu mapoi Livai ainyak par isjeupigmoig inmeto asega irai up Isreel.

¹⁹ Kis tup ahtai ilpu mapoi Livai ainyak imi Eron im ilpu hal o un irai up Isreel, par auanaheca u nup Isreel an neom er asjapicnaig o un, um ahlap va nup Isreel: vai yi jim yetpam inmas irai up Isreel, Eru wit apan an nuarin itap a nup Isreel.

²⁰ Eris ago irai ilpu mapoi Livai a Moses im Eron, im nup Isreel asega, is idivaig intas asega u Ihova ehele Moses vai ilpu mapoi Livai, eris idim ago ira ra a nup Isreel.

²¹ Eris ago upene ilpu mapoi Livai, eris lep yiri apelumai ura ara; ja is ikni ra a Eron par itai ahlap an nuhup u Ihova; is lep ahlap vai ra a Eron mika eri upene ara.

²² Ja eris par apan a ilpu mapoi Livai par ago nauritai ura an neom er asjapicnaig o un an nuhup u Eron, im lep an nuhup u ilpu hal o un: eris ago irai ilpu mapoi Livai is idivaig intas o Ihova ehele Moses.

²³ Is tas a Ihova ehele Moses, um ika,

²⁴ Intas alep vai ilpu mapoi Livai nigki: erumu apau natimi iji ig et eteuc inmesese et twente faiv ira ra um eled, um aminjinaig nauritai an neom er asjapicnaig o un:

²⁵ Erumu lep udei nauritai iran ara etu wit eteuc inmesese et fifte ira ra, um eti lep auritai:

²⁶ ja erumu auanaheca ara ehele ilpu etwara an neom er asjapicnaig o un, um aminjinaig itai, jam eti auritai. Inyi uce vai ilpu mapoi Livai im nauanaheca ura.