Numera 6 - Intas Etipup

Nuarin tas alupas 6.

1 Intas alep vai ilpu Nasari. 22 Intas par acis yi alwai atimi vaig.

¹ IS tas a Ihova ehele Moses, um ika,

² Namu tas aiek ehele nup Isreel, um ika ehele ra, El et athai tah natamaig ka tah intakata, ura asaig intas aktit u ilpu Nasari, nikavaig, yi itap vai Ihova:

³ inyi itap vai yiu waina im kava, etmu jim umnyi vinecar irai waina aien, ka vinecar irai kava, um jim umnyi tah nide vaine, um jim caig nohwai vaine mat, ka mese.

⁴ Etmu jim eaig tah nitai aien irai vaine er ago waina iran, kit nupsin ka narasin irai iji adiat asega an nitap o un.

⁵ Inyi eti yetpan an nidjinin tah nitai ucsei numrin, irai iji adiat asega et amen intas aktit u ilpu Nasari iran: etmu itap aien, etmu lep heto numri nidjinin, um yetpan an nopan iyehki etpu ti pan itac niji adiat an nitap o un.

⁶ Etmu jim apan o un tah natimi mas aien irai iji adiat an nitap o un vai Ihova.

⁷ Etmu jim auahas nitap o un aien vai etman, ka risin, ka etwan, ka natahig iran, era wit emesmas ara: et idim amen nitap o un vai Atua iran.

⁸ Et itap aien vai Ihova irai iji adiat asega et amen nitap o un iran.

⁹ El et auroauro um mas tah natimi ubutpotet pan ehelen, el et lep auahas nitap o un aien; etmu ucsei numri nidjinin aien an nadiat er ago upene yin, etmu ucsei aien an nadiat sevend.

¹⁰ Etmu lep imiapam nucip inyi ero aien, im inhakli nalaupa inyi ero, ehele natimi ahlap, an neucse neom er asjapicnaig o un an nadiat eetd:

¹¹ etmu ahlap iran yi ethi a natimi ahlap par itai ahlap va nedo has, im lep yi ethi par itai ahlap atnamud, um ahlap vai inhas o un va natimi mas, etmu lep itap nidjinin an nadiat iyehki.

¹² Etmu itap vai Ihova niji adiat an nitap o un, etmu lep imiapam inhakli siip yi ethi aien et eteuc inmesese et ethi iran par itai ahlap va nedo ahnag: ja eri eti esvi nadiat iji ehki uhup, va nauahas vaig nitap o un.

¹³ Intas alep va ilpu Nasari nigki, etu wit ti pan itac niji adiat u nitap o un: uhmu imiapan yiu an neucse neom er asjapicnaig o un:

¹⁴ etmu ahlap vai Ihova aien an nitai ahlap o un, inhakli siip yi ethi et eteuc inmesese et ethi iran, um ti nitai has iran, par itai ahlap atnamud, im inhakli siip atahig yi ethi et eteuc inmesese et ethi iran, um ti nitai has iran, par itai ahlap va nedo has, im siip atamaig yi ethi, et ti nitai has iran, par itai ahlap naaurinig,

¹⁵ im incat et amen iran nareto et ti leven iran, im nareto apalapal irai flaur upene er atise narakei iran, im biskit er aspi an narakei, im nitai ahlap ura an nitai caig, im nitai ahlap ura an nitai umnyi.

¹⁶ Etmu imiapan an nuhup u Ihova a natimi ahlap, um ahlap an nitai ahlap o un va nedo has, im nitai ahlap atnamud o un:

¹⁷ etmu ahlap aien irai siip atamaig par itai ahlap naaurinig vai Ihova, pan irai areto et ti leven iran an cat: etmu lep ahlap a natimi ahlap au nitai ahlap o un an nitai caig, im nitai ahlap o un an nitai umnyi.

¹⁸ Etmu ucsei nidjinin a Nasari va nitap o un an neucse neom er asjapicnaig o un, um lep leh numri nidjinin an nitap o un, um atise an cap itlian nitai ahlap naaurinig.

¹⁹ Etmu leh nikmai siip atamaig eris atho a natimi ahlap, im nareto apalapal yi ethi an cat et ti leven iran, im biskit inyi ethi, um ikni ijinies an nikmai Nasari, eris wat ucsei numri nidjinin va nitap o un:

²⁰ etmu ohaig a natimi ahlap par itai ahlap ohaig an nuhup u Ihova: inyi itap nitai inig vai natimi ahlap, im lep inritin er ohaig, im nikman er asjaig jipe: ja etmu apitac a Nasari um umnyi nide vaine.

²¹ Intas alep vai Nasari nigki et mun asan tas aktit o un aien, im lep vai nitai ahlap o un vai Ihova va nitap o un, im lep nitai iji igki et lucsei aien: etmu ago nitai iji igki aien et asan tas aktit o un aien, et idivaig intas alep va nitap o un.

²² Is tas a Ihova ehele Moses, um ika,

²³ Namu tas aiek ehele Eron im ilpu hal o un, um ika, Akumu acis yi alwai nup Isreel aijaua inyi uce, um ika ehele ra,

²⁴ Etmu acis yi alwai caua a Ihova, um aminjinaig caua:

²⁵ Etmu lah nesganimtai Ihova iramia, etmu lep aiheuc vai caua aien:

²⁶ Etmu ahidaig pam nesganimtan ehelemia a Ihova, um alupai caua nigpa.

²⁷ Erumu lep ati nidak irai up Isreel ara; ekpu lep acis yi alwai ra ainyak.