Numera 5 - Intas Etipup

Nuarin tas alupas 5.

1 Eh iknipagki ilpu atimi et eteuc tah inhas ira ra an nuarin amen iran u atimi. 5 Eri aru um ikni itai um alupai atimi eris ago nedo has vai ra. 11 Nedo ahilek va noporei o un tah.

¹ IS tas a Ihova ehele Moses, um ika,

² Asaig ehele nup Isreel mika eri iknipagki an nuarin amen u atimi ilpu atimi lepros asega, im ra asega et ared nida ira ra, im ra asega era has ara va nohui ilpu atimi emesmas:

³ akumu ikni pan itac ilpu atamaig im ilpu takata aijaua, akumu iknipagki ra aijaua an nuarin amen u atimi; va eri jim auahas niji uarin amen ura ara, ek amen iran ainyak.

⁴ Eris ago nedo inigki a nup Isreel, um iknipagki ra an nuarin amen u atimi: eris ago a nup Isreel is idivaig is asaig a Ihova ehele Moses.

⁵ Is tas a Ihova ehele Moses, um ika,

⁶ Namu asaig ehele nup Isreel aiek, um ika, Etu wit ago tah nedo has u atimi tah natamaig ka tah intakata, um imipalea intas u Ihova, et lep amen nedo has iran;

⁷ erumu asuptecnaig nedo has ura ara: etmu lep ago neruvaig asega aien, um ati nahaijin fiftd pan iran, um alupai yin is ago nedo has vai yin aien.

⁸ Ja el et eti eteuc natimi ehpan irai natimi iyehki par aru imi yin va nedo has, uhmu ago neruvaig imi Ihova, irai natimi ahlap; uhmu lep ahlap irai siip atamaig nitai adahpoi nedo has o un.

⁹ Etmu lep ohuun niji itai ahlap asega irai iji itai itap asega u nup Isreel a natimi ahlap, era imiapan ehelen ara.

¹⁰ Etmu ohuun niji itai itap u atimi asega aien: etmu ohuun nitai iji igki aien era alupai yin natimi.

¹¹ IS tas a Ihova ehele Moses, um ika,

¹² Namu asaig ehele nup Isreel aiek, um ika, El et ahnag a ehgan tah natimi, um ago nedo ahnag vai yin,

¹³ el et amen ehelen tah natamaig, jam eti ato a natamnyu un, el er auahas yin, um ateri, el et ti natimi asuptecnaig vai yin, um eti ecet yin tah;

¹⁴ el et aktaktai has aien, um oporei vai ehgan, eris wat auahas yin: ka el et lep aktaktai has aien, um oporei vai ehgan, ja is eti has aien:

¹⁵ etmu imiapan ehgan aien ehele natimi ahlap, um lep imiapan nitai ahlap vai yin, nahaijin tend irai ifa u flaur barle; inyi eti atladwi narakei iran aien, um eti ati nide nitai auanipin upene iran; nitai ahlap va noporei nigki, nitai ahlap imiehva, par imiehva nedo has.

¹⁶ Etmu imiapan yin ubutpotet a natimi ahlap, um ati yin an nuhup u Ihova:

¹⁷ etmu lep leh inwai itap a natimi ahlap an nipjinitai obohtan; etmu lep leh inmah an nobohtan anliin neom itap a natimi ahlap, um atise an wai:

¹⁸ etmu lep ati intakata iyehki an nuhup u Ihova a natimi ahlap, um atipagki nitai adahpoi nidjinin, um ati nitai ahlap imiehva an nikman, nitai ahlap va noporei iyehki: etmu lep amen an nikmai natimi ahlap inwai acen er has vaig:

¹⁹ etmu tas a natimi ahlap ehele intakata mika yi asan tas aktit o un aien, um ika, EI is eti amen ehelum tah natamaig, el is lep eti ahnag aiek, um ago nedo has ehelen tah, is ti natamnyu unyum aien, namu umoh aiek vai inwai inigki er has vaig:

²⁰ ja el is ahnag aiek im intak atimi, is ti natamnyu unyum aien, el et has aiek, el is amen ehelum tah natamaig is ti natamnyu unyum aien.

²¹ Etmu asan tas ahlaijaig aktit ehele intakata a natimi ahlap, etmu lep ika ehele intakata a natimi ahlap, Etmu ati euc a Ihova mika an itai has aiek im nitai amcel vaig an nuhup u atimi, etu wit ika a Ihova yi mutit neduom, um lep atop nipjinetgan!;

²² etmu asuol inwai inigki er has vaig ira auitum, etmu lep atop nipjinetgan! vaig, um lep mutit neduom. Etmu ika intakata, Emen, emen.

²³ Etmu lep aged intas ahlaijaig iji igki an nitaasviitai a natimi ahlap, etmu ohpodohpod an wai acen aien:

²⁴ etmu alumai intakata inwai acen aien er has vaig: etpu asuol inwai er has vaig an nipjinetgan, ja par acen.

²⁵ Etmu lep leh nitai ahlap va noporei a natimi ahlap an nikmai intakata, um ohaig an nuhup u Ihova, um ahlap iran an natau:

²⁶ etmu leh nahaijin nitai ahlap an nikman a natimi ahlap, par itai imiehva, um atnamud ijinies an natau, ja etmu apitac a intakata um umnyi inwai.

²⁷ Etu wit aluman inwai aien, el is has aien, um ago nedo ahnag vai natamnyu un, etpu asuol inwai er has vaig an nipjinetgan, ja par acen, etpu atop nipjinetgan, um lep mutit neduon: etpu has a intakata an nuhup u atimi.

²⁸ Ja el is eti has a intakata, jam upene; etpu umoh aien, um asvalav.

²⁹ Intas alep va noporei nigki, etu wit udei natamnyu un a ehgan, um apan ehele intak atimi, um has;

³⁰ ka etu wit lep aktaktai has aien, um lep oporei vai ehgan, um ati intakata an nuhup u Ihova, etmu ago nedo asega iran a natimi ahlap an tas alep inigki.

³¹ Inyi eti amen nedo has an natamaig, ja etpu lucsei nimtan nedo has o un a intakata inigki.