Numera 4 - Intas Etipup

Nuarin tas alupas 4.

1 Niji mesese im nopan u nauritai u ilpu mapoi Livai. 4 Niji itai eri apos a ilpu mapoi Kohad, era wat alcapdicraig neom itap a ilpu atimi ahlap. 16 Naminjinaig itai u Eliesar. 17 Nauritai u ilpu atimi ahlap. 21 Niji itai eri apos a ilpu mapoi Cerson. 29 Niji itai eri apos a ilpu mapoi Mererai. 34 Nisjipicnaig u ilpu mapoi Kohad, 38 u ilpu mapoi Cerson, 42 u ilpu mapoi Mererai.

¹ IS tas a Ihova ehele Moses im Eron, um ika,

² Arumu esvi ilpu mapoi Kohad aijaurau irai ilpu mapoi Livai, nikavaig, ilpu etmara im ilpu eteuc ira ra,

³ um ahes ira atimi et eteuc inmesese et dirte ira ra, um yetpan ira atimi et eteuc inmesese et fifte ira ra, ra asega era emda ara par auanaheca, um ago nauritai anliin neom er asjapicnaig o un.

⁴ Nauritai u ilpu mapoi Kohad nigki an neom er asjapicnaig o un, irai iji itai itap acen,

⁵ Eru wit ika natimi eri atga, erumu ham a Eron im ilpu hal o un, um atipagki napelumai adahpoi, um adahpoi nelcau et amen intas alep iran:

⁶ um ati ijinies iran nitai adahpoi ira arasi kuri amen an jap, um algei ijinies napelumai emilmat asega, um ikni inceen iran.

⁷ Erumu lep algei napelumai emilmat ara an nefata uri nareto er ehvaig, um ikni nipjiitai iran, im nipjispoon, im nipjiheson, im niji itai atapnes par atapnes: etmu lep amen iran nareto irai iji adiat:

⁸ erumu lep algei napelumai cap ijinies iran ara, um adahpoi an nitai adahpoi ira arasi kuri amen an jap, um ikni inceen iran.

⁹ Erumu lep leh napelumai emilmat ara, um adahpoi nitai atijai incap alahala iran, im lamp urin, im niji itai ehtiti urin, im nipjiitai er ikni niji itai ehtiti iran, im nipjiitai uri narakei era ago itai iran ara:

¹⁰ erumu aso ara im lep niji itai asega urin an nitai adahpoi ira arasi kuri amen an jap, um ati ijinies an nitai apos.

¹¹ Erumu lep algei napelumai emilmat ara ijinies an natau colt, um adahpoi an nitai adahpoi ira arasi kuri amen an jap, um ikni inceen iran:

¹² erumu lep lucsei niji itai asega ara er ago itai iran, era ago itai iran ara an nuarin itap, um ikni an napelumai emihnat, um adahpoi an nitai adahpoi ira arasi kuri amen an jap, um ati ijinies an nitai apos:

¹³ erumu lep atipagki nohpa an natau ara, um algei napelumai umjigumjig iran:

¹⁴ erumu ikni ijinies iran niji itai asega urin, era ago itai iran ara, nikavaig, nipjiitai er atnamud itai iran, im fork, im suvel, im nipjibeson, niji itai asega uri natau; erumu algei nitai adahpoi ijinies iran ara ira arasi kuri amen an jap, um ikni inceen iran.

¹⁵ Erumu adahpoi nuarin itap a Eron im ilpu hal o un, im niji itai asega uri nuarin itap, va natga u atimi; ja erumu apitac a ilpu mapoi Kohad um ham um apos: ja erumu jim ubli tah nitai itap ara, va eri jim emesmas ara. Nitai apos u ilpu mapoi Kohad ji igki an neom er asjapicnaig o un.

¹⁶ Etmu aminjinaig narakei urin cap alahala a Eliesar inhal u Eron natimi ahlap, im lep nitai auanipin upene, im nitai ahlap irai itai hegaig irai iji adiat, im narakei aspi, etmu aminjinaig neom itap asega aien, im niji itai asega iran, an nuarin itap, im niji itai asega urin.

¹⁷ Is tas a Ihova ehele Moses im Eron, um ika,

¹⁸ Arumu jim iknipagki ilpu mapoi Kohad aijaurau ehele ilpu mapoi Livai:

¹⁹ jam ago nedo inigki vai ra, va erupu umumoh ara, um eti emesmas, eru wit apan ara ubutpotet u itai itap acen: erumu apan a Eron im lep ilpu hal o un, um anvai ehele ra athiathi nauritai ura im nitai apos ura:

²⁰ ja erumu jim apan ara anliin neom par almoi, uhu wit adahpoi niji itai itap, va eri jim emesmas ara.

²¹ Is tas a Ihova ehele Moses, um ika,

²² Esvi ilpu mapoi Cerson, irai ilpu etmara, im ilpu eteuc ira, ra;

²³ namu esvi ra aiek um ahes ira atimi et eteuc inmesese et dirte ira ra, um yetpan ira atimi et eteuc inmesese et fifte ira ra; ra asega era apan ara par auanaheca, um ago nauritai anliin neom er asjapicnaig o un.

²⁴ Nauritai u ilpu mapoi Cerson nigki, im niji itai apos ura ji igki:

²⁵ erumu apos napelumai uri neom itap ara, im neom er asjapicnaig o un, im nitai adahpoi urin, im nitai adahpoi ira arasi kuri amen an jap ijinies iran, im napelumai atapin neucse neom er asjapicnaig o un,

²⁶ im napelumai atapin nokoro, im napelumai atapin neucse nah, ubutpotet pan neom itap, um ubutpotet pan natau, um arehed mihtag, im niji jaula urin, im niji itai asega er ago itai iran, im niji itai asega eris ago vaig: etmu uce nauanaheca ura.

²⁷ Erumu tas a Eron im ilpu hal o un va nauritai asega u ilpu mapoi Cerson, im niji itai apos asega ura, im nauanaheca asega ura: akumu anvai ehele ra aijaua niji itai apos ura.

²⁸ Nauritai u ilpu mapoi Cerson nigki an neom er asjapicnaig o un: etmu aminjinaig nauritai ura a Idamar inhal u Eron natimi ahlap.

²⁹ Namu lep esvi ilpu mapoi Mererai aiek, nikavaig, ilpu etmara im ilpu eteuc ira ra;

³⁰ esvi ra um ahes ira atimi et eteuc inmesese et dirte ira ra, um yetpan ira atimi et eteuc inmesese et fifte ira ra, ra asega era apan ara par auanaheca, um ago nauritai an neom er asjapicnaig o un.

³¹ Nitai apos ura ji igki, im nauritai asega ura an neom er asjapicnaig o un; nuaricai an neom itap, im nakaukau urin, im nauicai aduwi urin, im inpai itai urin,

³² im nauicai aduwi uri nokoro um arehed mihtag, im niji itai ipjilai urin, im niji neel urin, im niji jaula urin, im niji itai asega urin, im niji itai asega er auritai iran: esvi idai niji itai asega eri apos ara.

³³ Nauritai u ilpu mapoi Mererai nigki, im nauanaheca ura an neom er asjapicnaig o un, etmu aminjinai ra a Idamar inhal u Eron natimi ahlap.

³⁴ Eris esvi ilpu mapoi Kohad a Moses im Eron im ilpu atimi alupas u atimi, nikavaig, ilpu etmara im ilpu eteuc ira ra,

³⁵ um ahes ira atimi is eteuc inmesese is dirte ira ra, um yetpan ira atimi is eteuc inmesese is fifte ira ra, ra asega eris apan ara par auanaheca, um ago nauritai an neom er asjapicnaig o un:

³⁶ eris tu dausant seven huntret im fifte (2,750) ara sji ehki eris esvi ra ira ra.

³⁷ Eris esvi ra sji igki irai ilpu mapoi Kohad, ra asega eri ago nauritai ara an neom er asjapicnaig o un, erus esvi ra a Moses im Eron is idivaig intas alep u Ihova irai Moses.

³⁸ Eris esvi ilpu mapoi Cerson, nikavaig, ilpu etmara im ilpu eteuc ira ra,

³⁹ um ahes ira atimi is eteuc inmesese is dirte ira ra, um yetpan ira atimi is eteuc inmesese is fifte ira ra, ra asega era apan ara par auanaheca, um ago nauritai an neom er asjapicnaig o un,

⁴⁰ eris tu dausant siks huntret im dirte (2,630) ara sji igki eris esvi ra, irai ilpu eteuc ira ra, im ilpu etmara.

⁴¹ Eris esvi ra sji igki irai ilpu mapoi Cerson, ra asega eri ago nauritai ara an neom er asjapicnaig o un, erus esvi ra a Moses im Eron is idivaig intas alep u Ihova.

⁴² Eris esvi ilpu mapoi Mererai, nikavaig, ilpu etmara im ilpu eteuc ira ra,

⁴³ um ahes ira atimi is eteuc inmesese is dirte ira ra, um yetpan ira atimi is eteuc inmesese is fifte ira ra, ra asega era apan ara par auanaheca, um ago nauritai an neom er asjapicnaig o un,

⁴⁴ eris dri dausant im tu huntret (3,200) ara sji igki eris esvi ra irai ilpu eteuc ira ra.

⁴⁵ Eris esvi ra sji igki irai ilpu mapoi Mererai, erus esvi ra a Moses im Eron is idivaig intas alep u Ihova irai Moses.

⁴⁶ Eris esvi ilpu mapoi Livai a Moses im Eron im ilpu atimi alupas u nup Isreel, nikavaig, ilpu eteuc ira ra, im ilpu etmara,

⁴⁷ um ahes ira atimi is eteuc inmesese is dirte ira ra, um yetpan ira atimi is eteuc inmesese is fifte ira ra, ra asega eris apan ara par auanaheca, um apos itai an neom er asjapicnaig o un,

⁴⁸ eris eet dausant faiv huntret im eete (8,580) ara sji igki eris esvi ra.

⁴⁹ Is esvi ra a Moses is idivaig intas alep u Ihova, ra asega im nauritai ura, im nitai apos ura: is esvi ra a Moses is idivaig is asaig ehelen a Ihova.