Numera 36 - Intas Etipup

Nuarin tas alupas 36.

1 Intas alep vai ilpu atahig era ohuun nuari obohtan, 5 eri ehgai ilpu atimi au nahaijin pece ura ache, 7 vai uhpu jim atipagki nuarin nobohtan ura um atcijaig imi nup an nelcau et eche. 10 Era ehgai ilpu halav atamaig u ilpu etwai etmara a ilpu halav atahig u Silofehat.

¹ ERIS apan a ilpu etmara esjilid irai ilpu mapoi Cileat inhal u Mekir, inhal u Manasi, irai ilpu mapoi ohwat hal u Josef, um tas an nuhup u Moses, im lep an nuhup u ilpu atimi alupas, ilpu atimi alupas esjilid irai up Isreel:

² um ika, Is asaig a Ihova ehelum, ak natimi alupas unyima, mika eri atcijaig imi nup Isreel nuarin obohtan irai itai asjaaicnaig: is lep ika a Ihova ehelum, ak natimi alupas unyima, eri atcijaig imi ilpu halav atahig u Silofehat etwama nuarin nobohtan o un.

³ Ja el era ehgai ilpu halav atamaig ara irai tah nahaiji nup Isreel et eche, uhpu atipagki nuarin nobohtan ura an nahaijin pece u ilpu retpora, um ehcilpun an nahaijin pece era apan iran ara: uhpu idim atipagki an nahaijin pece unyima.

⁴ Etu wit lep yetpam inmesese imiacitak u nup Isreel, uhpu ehcilpun nuarin nobohtan ura an nahaijin pece era apan iran ara: uhpu idim atipagki nuarin nobohtan ura an nahaijin pece u ilpu retpoma.

⁵ Is asaig a Moses ehele nup Isreel is idivaig intas o Ihova, um ika, Et upene intas o ilpu mapoi Josef.

⁶ Intas o Ihova nigki vai ilpu halav atahig u Silofehat, nikavaig, Erumu ehgai natimi iji igki era merit vai ra ara; ja erumu lucsei ilpu atamnyura ara era merit vai ra ara an nahaijin pece ura.

⁷ Erumu jim ohuun jipe niji uari obohtan a nup urai iji elcau u nup Isreel: erumu lep apol irai uari obohtan u ilpu retpora a nup Isreel asega.

⁸ Erumu ehgai ilpu atamaig an nahaijin pece ura irai up Isreel a ilpu atahig asega et eteuc nuari obohtan ura, va erupu ohuun nuari obohtan u ilpu retpora a nup Isreel asega.

⁹ Erumu jim ohuun jipe nobohtan a nup urai iji elcau; ja erumu apol irai uari obohtan ura a nup Isreel asega.

¹⁰ Eris ago a ilpu halav atahig u Silofehat is idivaig is asaig a Ihova ehele Moses:

¹¹ eris ehgai ilpu halav atamaig u ilpu etwai etmara, a Mala, im Tirsa, im Hocla, im Milka, im Noa:

¹² eris ehgai ilpu mapoi Manasi inhal u Josef ara, is lep amen nobohtan ura ehele ilpu ahrei ilpu retpora.

¹³ Intas alep im intas asuptecnaig ji igki, is asaig a Ihova ehele nup Isreel irai Moses irai uari marara Moab u nofowai Jortan ubutpotet pan Jeriko.