Numera 35 - Intas Etipup

Nuarin tas alupas 35.

1 Er ikni inmaliyum, et forte eet vai ilpu mapoi Livai im lep niji uari obohtan marehed mihtag, im nasjaaicnaig iran. 6 Er ikni inmaliyum et siks irai ra sji ehki par ahapan iran. 9 Intas alep va natgei atmas. 31 Eri jim leh tah nimtan va natgei atmas.

¹ IS tas a Ihova ehele Moses irai uari marara Moab u nofowai Jortan ubutpotet pan Jeriko, um ika,

² Asaig ehele nup Isreel, mika eri atcijaig imi ilpu mapoi Livai niji maliyum par amen iran an pece era ohuun ara; akumu lep atcijaig imi ilpu mapoi Livai aijaua niji uari obohtan et arehed irai iji maliyum ura.

³ Inyi eteuc ira ra niji maliyum mika eri amen iran ara; ja inyi uarin amen u kurimatau ura, im niji itai eklim edo irai pece asega ura, im hal itai ura, nuari obohtan iji ehki et arehed.

⁴ Akumu atcijaig imi ilpu mapoi Livai niji uari obohtan aijaua irai iji maliyum, um ahes an nathatahau an maliyum um yetpan itac kubit inyi wun dausant um arehed mihtag.

⁵ Akumu asjaaicnaig irai kubit et tu dausant aijaua an nahaijin maliyum an ridjai o un aijaua, im lep kubit et tu dausant an nahaijin maliyum an nuarin inig et ahes nuritoga iran, im lep kubit et tu dausant an nahaijin maliyum an nete o un, um iep kubit et tu dausant an nahaijin maliyum an nuarin inig et ahes narutu iran; ja etmu uarin amen u atimi juju: niji uari obohtan imi ra nigki irai iji maliyum.

⁶ Akumu lep anvai inmaliyum atpuh iran inyi siks aijaua irai maliyum iji ig, akumu atcijaig imi ilpu mapoi Livai aijaua, va natimi atgei atmas, mika yi ahapan eahki aien: akumu lep atcijaig imi ra aijaua niji maliyum inyi forte tu.

⁷ Akumu atcijaig imi ilpu mapoi Livai inmaliyum inyi forte eet aijaua: im lep niji uari obohtan et arehed iran.

⁸ Akumu atcijaig imi ra inmaliyum iji igki aijaua an pece u nup Isreel: erumu atcijaig inyi ahinag ara et ahinag ura; erumu lep atcijaig inyi eti elpat ara et eti elpat ura: erumu atcijaig imi ilpu mapoi Livai niji maliyum imi ra natimi asega et idivaig et tau ira ra.

⁹ Is tas a Ihova ehele Moses, um ika,

¹⁰ Namu tas aiek ehele nup Isreel, um ika ehele ra, Aku wit algauwaig nofowai Jortan aijaua, um apan an pece Kenan;

¹¹ akumu anvai niji maliyum imi caua aijaua par atpuh iran; va etpu ahapan eahki natimi atgei atmas et auahas tah aien, jam eti ethetiknaig.

¹² Inyi maliyum atpuh iran imi caua va natimi eijejei atmas; vai yi jim mas a natimi atgei atmas um imihum pan an nopan iyehki uhpu tas alep vai yin an nuhup u atimi.

¹³ Inyi maliyum atpuh iran inmaliyum inyi siks, irai maliyum iji igki akumu atcijaig imi ra aijaua.

¹⁴ Akumu atcijaig inmaliyum inyi dri an nahaijin nofowai Jortan igcapam, um lep atcijaig inmaliyum inyi dri an pece Kenan, inyi maliyum atpuh iran ji igki.

¹⁵ Inyi maliyum atpuh iran inmaliyum et siks iji igki imi nup Isreel, im nup urai taka pece, im ilpu alaig unyimia: vai erupu ahapan eahki a ilpu atimi atgei atmas jam eti ethetiknaig.

¹⁶ El et atcei tah aien an tah nitai aiurn el et mas aien, et atimi atgei atmas aien: uhmu idim atgei natimi atgei atmas.

¹⁷ El et lep asji tah aien an hat mika yi mas aien, el et mas aien, et atimi atgei atmas aien: uhmu idim atgei natimi atgei atmas.

¹⁸ El et lep auud yin aien an tah nauincai an nikman, mika yi mas aien, el et mas aien, et atimi atgei atmas aien: uhmu idim atgei natimi atgei atmas.

¹⁹ Etmu atgei natimi atgei atmas a natimi eijejei atmas: etu wit ecet yin aien, etmu atgei yin aien.

²⁰ Ja el et ahcai yin aien va nedemda o un, ka atpaijinaig yiu, um asji yin, va etpu mas aien;

²¹ ka atcei yin an nikman va namcel vai yin, va etpu mas aien: uhmu idim atgei yin is atgei atmas aien: et atimi atgei atmas aien: etmu atgei natimi atgei atmas a natimi eijejei atmas, etu wit ecet yin aien.

²² Ja el et auroauro aien um ahcai yin jam eti amcel vai yin, ka asji yin au tah nitai, jam eti atpaijinai yin,

²³ ka an tah inhat, et mas vaig aien, ka asji yin an tah nitai va etpu mas aien, jam eti ecet yiu, um eti edemda vai yin, um eti merit, nauahas yin vaig:

²⁴ erumu tas alep a ilpu atimi asjapicnaig va natimi atgei atmas im natimi eijejei atmas, et idivaig intas alep iji igki:

²⁵ erumu lep imialep natimi atgei atmas a ilpu atimi asjapicnaig va natimi eijejei atmas, erumu lep imiapan yin a ilpu natimi asjapicnaig an maliyum atpuh iran o un, is ahapan eahki aien: etmu amen eahki aien um imihum pan an nopan iyehki, etpu mas a natimi esjilid an nahlap eris aspi yin an narakei itap.

²⁶ Ja el et lep apan itac an maliyum iyehki is ahapan iran a natimi atgei atmas;

²⁷ el et ecet yin itac a natimi eijejei atmas au maliyum atpuh iran, el et atgei yin a natimi eijejei atmas; eri jim aru iran vai inmas o un:

²⁸ vaig inig nikavaig, eris idim ika yi amen aien an maliyum atpuh iran, um imihum pan an nopan iyehki etpu mas a natimi esjilid an nahlap: ja etu wit mas a natimi esjilid an nahlap, etmu adumoij pan an maliyum o un a natimi atgei atmas.

²⁹ Intas alep imi caua ji igki im ilpu mapomia irai iji uarin amen unyimia.

³⁰ El et atgei atmas tah, uhmu lep atgei yin vai intas u ilpu atimi asuptecnaig: ja inyi eti mas tah vai intas asuptecnaig u natimi yi ethi ache.

³¹ Akumu jim lucsei nimtan aijaua mika yi umoh a natimi atgei atmas, et upene mika yi mas aien: uhmu idim atgei yin.

³² Um jim lucsei nimtan va natimi inig et ahapan aien an maliyum atpuh iran, mika yi lep apan aien um amen an pece, um imihum pan an nopan iyehki etpu mas a natimi esjilid an nahlap.

³³ Va aki jim auahas inpece aijaua eka amen iran aijaua: et auahas inpece natgei atmas: inyi upene inpece va natgei atmas iran, vai inmas o un ache is atgei atmas aien.

³⁴ Akumu jim auahas inpece inig aijaua akupu amen iran aijaua, ek amen iran ainyak: ek amen ehele nup Isreel ainyak Ihova.