Numera 32 - Intas Etipup

Nuarin tas alupas 32.

1 Era ugyi Moses a ilpu mapoi Ruben im ilpu mapoi Cat va niji uarin obohtan ura an nahaijin Jortan igcapam. 6 Et acaiji ra a Moses. 16 Era ika ara eri ago nedo inig et upene iran. 33 Et ati imi ra nobohtan ura a Moses. 39 Era atoraliak nobohtan iyehki ara.

¹ ERIS ahinag acen kurimatau u ilpu mapoi Ruben im ilpu mapoi Cat: eris wat almoi inpece Jeser ara, im inpece Cileat, mika is upene vai kurimatau;

² eris apan a ilpu mapoi Cat, im ilpu mapoi Ruben, um tas ehele Moses, im Eliesar natimi ahlap, im ilpu atimi alupas u atimi, um ika,

³ Et upene vai kurimatau nuarin pece Atarod, im Taibon, im Jeser, im Nimra, im Hesbon, im Eliali, im Sibam, im Nibo, im Bion,

⁴ inpece asega marom is auud atimi iran a Ihova an nuhup u nup Isreel; ja et eteuc kurimatau u ilpu aheca unyum:

⁵ va nitai inigki aiheuc vai cama aiek, um alupai ilpu aheca unyum inpece inigki, mika ecri ohuun aijama, um jim imialgauwaig cama an nofowai Jortan.

⁶ Is ika a Moses ehele ilpu mapoi Cat im ilpu mapoi Ruben, Erupu apan u nedoa a ilpu etwamia, ja akupu amen igcaki aijaua, ka oʼo?

⁷ Eka a uri aijaua par auahas inliinmopoi nup Isreel va eri jim apan ara an pece inig is alupai ra a Ihova?

⁸ Eris ago nedo inigki a ilpu retpomia, kis wat abrai ra Ketes-barnea ainyak, mika eri apan ara um almoi inpece.

⁹ Eris wat apan ara an niskanse Eskol par almoi inpece, eris auahas inliinmopoi nup Isreel ara, va eri jim apan ara an pece inig is alupai ra a Ihova.

¹⁰ Is atavaitap a Ihova an nopan iyehki, is tas aktit aien, um ika,

¹¹ Inyi idim eti ecetai inpece inig kis asaig ainyak ehele Ebraham, im Aisak, im Jekob, tah natimi iji ehki eris ahes Ijipt ara, is eteuc inmesese is twente ira ra um eled: vaig inig nikavaig, eris eti apitac nyak an liinmopora asega ara:

¹² Keleb ache inhal u Jifunni nup u Kines, im Josua inhal a Nun: erus idim apol irai Ihova arau an liinmoporau asega.

¹³ Is atavaitap a Ihova vai nup Isreel, is lep ika aien eri atga an namasacen ara irai mesese is forte, um imihum pam an nopan iyehki eris emesmas ehni ara sji ehki, eris ago nedo has ara an nuhup u Ihova.

¹⁴ Ja eka mun atidai aijaua, um isjeupigmoig ilpu retpomia an nauatatimi ura, mika yi lep esjilid intavaitap u Ihova vai nup Isreel.

¹⁵ El eka atidjimia iran aijaua, etpu lep udei ra aien an namasacen; akupu lep auahas natimi iji igki asega aijaua.

¹⁶ Eris apan ubutpotet ehelen ara, um ika, Ecrupu ago nirahed igcaki aijama va niji itai eklim edo irai pece unyima, im lep niji maliyum vai ilpu hal unyima:

¹⁷ ja ecrupu yecrei cama aijama va nedoa, um atga, um uhup urai nup Isreel, um imihum pan an nopan iyehki, ecrupu imiapan ra aijama an nuarin amen ura: erupu lep amen a ilpu hal unyima irai iji maliyum et amen narin va nup uran pece.

¹⁸ Ecrupu eti lep adumoij pam ehele ilpu hal unyima, um imihum pan an nopan iyehki erupu ohuun nuari obohtan ura natimi asega.

¹⁹ Ecrupu eti ohuun inpece pan ira ra an nahaijin Jortan igcapan, ka an tah anuarin; el ecra leh nahaijin pece unyima aijama an nahaijin Jortan igcapam an ridjai o un.

²⁰ Is ika a Moses ehele ra. El eka ago nitai inigki aijaua, el eka yecrei caua aijaua um apan u nedoa an nuhup u Ihova,

²¹ el eka apan aijaua asega um yecrei caua va nedoa, um algauwaig Jortan an nuhup u Ihova, um imihum pan an nopan iyehki etpu ahlo ilpu atimi tak atimi iran an nuhup o un,

²² um lep imiasuol atimi an pece an nuhup u Ihova: ja akupu apitac aijaua um adumoij, inyi eti lep amen nedo has iramia an nuhup u Ihova, im lep an nuhup u nup Isreel; akupu lep ohuun inpece inigki aijaua an nuhup u Ihova.

²³ Ja el eka eti ago nedo inigki aijaua, akupu ago nedo has aijaua au nuhup u Ihova: um ato mika etpu uhum pam caua nimtan nedo has unyimia.

²⁴ Akumu actaig niji maliyum aijaua vai ilpu hal unyimia, um ago nirahed va siip unyimia; um ago nedo inigki eka mun asaig aijaua.

²⁵ Eris tastas ehele Moses a ilpu mapoi Cat im ilpu mapoi Ruben, um ika, Ak natimi alupas, ecrupu ago nedo inigki aijama, na mun asaig aiek ehele cama ilpu aheca unyum.

²⁶ Erupu amen irai iji maliyum Cileat a ilpu hal unyima, im ilpu ehgama, im siip unyima, im kurimatau unyima:

²⁷ ecrupu yecrei cama aijama asega, um algauwaig an nuhup u Ihova par ago nedoa, et idivaig intas inig na asaig aiek, ak natimi alupas unyima.

²⁸ Is tas alep vai ra a Moses ehele Eliesar natimi ahlap, im Josua inhal u Nun, im ilpu atimi alupas u nup Isreel:

²⁹ is ika ehele ra a Moses, El era ahced caua a ilpu mapoi Cat asega im ilpu mapoi Ruben, um algauwaig Jortan, um yecrei ra va nedoa, an nuhup u Ihova, um imiasuol nup uran pece an nuhup unyimia; akumu alupai ra inpece Cileat aijaua mika eri ohuun ara:

³⁰ ja el era eti yecrei ra va nedoa ara um ahced caua, erumu ohuun nobohtan ehelemia ara an pece Kenan.

³¹ Eris tas a ilpu mapoi Cat im ilpu mapoi Ruben, um ika, Ecrupu ago nedo inigki aijama is asaig a Ihova ehelema ilpu aheca o un.

³² Ecrupu yecrei cama aijama va nedoa, um algauwaig an nuhup u Ihova um yetpan an pece Kenan, vai ecrupu ohuun inpece unyima aijama an nahaijin Jortan igcapam.

³³ Is atcijaig imi ilpu mapoi Cat, im ilpu mapoi Ruben, im nahaiji ilpu mapoi Manasi inhal u Josef a Moses, inpece u Saihon natimarid u nup Emor, im inpece u Oc natimarid an pece Besan, im niji maliyum iran, niji maliyum an pece um arehed mihtag marom.

³⁴ Eris actaig inmaliyum iji igki a ilpu mapoi Cat, nikavaig, Taibon, im Atarod, im Aroer,

³⁵ im Atrod, im Sofan, im Jaeser, im Jocbeha,

³⁶ im Bed-nimra, im Bed-heran, niji maliyum is amen nathatahau iran: im niji irahed u siip.

³⁷ Eris lep actaig inmaliyum iji igki a ilpu mapoi Ruben, nikavaig, Hesbon, im Eliali, im Kirjadeem,

³⁸ im Nibo, im Beal-mion, (is eche nidara,) im Sibma: eris lep anvi tak idai inmaliyum iji igki ara eris actaig ara.

³⁹ Eris apan Cileat a ilpu mapoi Mekir inhal u Manasi, um atoraliak, um ahlo nup Emor eris amen iran ara.

⁴⁰ Is atcijaig Cileat imi ilpu mapoi Mekir inhal u Manasi a Moses; eris lep amen iran ara.

⁴¹ Is lep apan a Jeer mapoi Manasi, um atoraliak niji maliyum haklin iran, um anvi nidara par ika Hevod-jeer.

⁴² Is lep apan a Noba um atoraliak Kinad, im niji maliyum haklin iran, um anvi nidan par ika Noba, nilpun nidan.