Numera 31 - Intas Etipup

Nuarin tas alupas 31.

1 Er atoraliak itai u nup u Mitian um atgei Belam. 13 Et ehniv a Moses vai ilpu atimi alupas mika eris imialep ilpu takata ara. 19 Intas alep par ago adicinadicin ilpu eucsupo im ilpu aheca ura im naga ura. 25 Er atiakoai niji itai eris atoraliak. 48 Era ispara tup ahtai niji itai imi Ihova ara.

¹ IS tas a Ihova ehele Moses, um ika,

² Aru nedo has u nup u Mitian vai nup Isreel: ja uhpu apitac um ati euc ehele ilpu retpom.

³ Is tas a Moses ehele nup Isreel, um ika, Erumu yecrei ra va nedoa hal caua, um apan, um ati nedoa vai nup u Mitian, va etpu aru a Ihova irai up u Mitian.

⁴ Akumu abraig pan natimi inyi wun dausant u nedoa aijaua irai iji ahaiji up Isreel.

⁵ Eris ikni natimi is wun dausant irai iji ahaiji up Isreel, eris twelv dausant ara eris yecrei ra va nedoa.

⁶ Is abraig pan ra u nedoa a Moses, natimi is wun dausant irai iji ahaiji ra, is abraig pan ra, im Finehas inhal u Eliesar natimi ahlap u nedoa aien, im niji itai itap, intoho eraigko marom, mika eri ahlai.

⁷ Eris ago nedoa ara vai nup u Mitian, is idivaig is asaig a Ihova ehele Moses; eris lep atgei ilpu atamaig asega ara.

⁸ Eris lep atgei ilpu atimarid Mitian ara pan irai ra sji ehki eris atgei ra; nan, Irai, im Rikem, im Sur, im Hur, im Riba, ilpu atimarid Mitian is faiv: eris lep atgei Belam inhal u Bior ara an nedoa.

⁹ Eris lucsei ilpu takata Mitian asega a nup Isreel, im ilpu hal ura, mika eri ilpu aheca ura ara, um lep atoraliak kurimatau asega ura, im siip asega ura, im inpadiaig asega ura.

¹⁰ Eris ahli niji maliyum asega ura ara eris amen iran ara, im niji imnim atimi asega ura.

¹¹ Eris lucsei impadiaig asega ara, im naga asega eris atoraliak an nedoa, im natimi, im niji itai eklim edo irai pece.

¹² Eris imiapan ilpu aheca ara, im inpadiaig, im naga eris atoraliak an nedoa, ehele Moses, im Eliesar, im nup Isreel asega, an nuarin amen ura irai uarin marara Moab, u nofowai Jortan ubutpotet pan Jeriko.

¹³ Eris ahes an nuarin amen ura a Moses, im Eliesar natimi ahlap, im ilpu atimi alupas asega u atimi, um apan itac par aubilid ra.

¹⁴ Is edemda a Moses vai ilpu atimi alupas u ilpu eucsupo, nikavaig, ilpu atimi alupas irai iji dausant, im ilpu atimi alupas irai iji huntret, eris ahes an nedoa ara.

¹⁵ Is ahodai ra a Moses, um ika, Et echamecha, akis imiatamaig ilpu takata asega aijaua?

¹⁶ Eris ika ara sji igki eri imipalea intas o Ihova a nup Isreel vai intas o Belam, um ago nedo o Pior, is lep ucjum pam inmas ira atimi u Ihova vaig.

¹⁷ Va nitai inigki akumu atgei ilpu halav atamaig asega aijaua, um atgei ilpu takata asega eris ato natamaig ara, um amen ehele ra.

¹⁸ Jam imiatumumoh ilpu atahig asega imi caua eris eti ato natamaig ara, um eti amen ehele ra.

¹⁹ Akumu amen itac aijaua va nuarin amen u atimi: el is atgei tah natimi tah, el is lep atcei pan tah natmas tah, akumu yiri caua aijaua im lep ilpu aheca unyimia an nadiat dirt im nadiat sevend.

²⁰ Akumu lep yiri napelumai asega unyimia aijaua, im niji itai asega er ago ira arasi itai eklim edo irai pece, im nap asega irai umri anin, im niji itai asega er ago irai cai.

²¹ Is ika a Eliesar natimi ahlap ehele ilpu eucsupo eris apan u nedoa ara, Intas alep u Ihova nigki is asaig ehele Moses aien;

²² Akumu ahen colt an cap aijaua, im silver, im bras, im aiurn, im tin, im let,

²³ im niji itai asega inyi eti cas incap, etpu upene: uhmu lep ago upene an wai er ago adicinadicin itai vaig: akumu lep atise an wai nitai iji igki asega etpu cas incap.

²⁴ Akumu lep yiri apelumai unyimia aijaua an nadiat sevend, akupu lep upene aijaua, ja akumu apitac aijaua um apan an nuarin amen u atimi.

²⁵ Is tas a Ihova ehele Moses, um ika,

²⁶ Namu lep esvi niji itai eris atoraliak an nedoa, nikavaig, natimi im niji itai eklim edo irai pece, aiek, im Elieser natimi ahlap, im ilpu atimi alupas u atimi:

²⁷ um atiakoai niji itai eris atoraliak an nedoa inyi ero niji iran; yi ethi imi ilpu eucsupo, im lep yi ethi imi atimi asega:

²⁸ erumu lep ikni vai Ihova nahaiji itai ura a ilpu atimi apan u nedoa; nikavaig, tah yi ethi irai iji faiv huntret atimi, im kurimatau, im togke, im siip:

²⁹ lucsei an nahaijin ura, um alupai Eliesar natimi ahlap, nitai ahlap asjaig jipe vai Ihova.

³⁰ Namu lep lucsei nahaijin fiftied an nahaijin u nup Isreel aiek, nikavaig, natimi, im kurimatau, im togke, im siip, im niji itai eklim edo irai pece asega, um ikni ehele ilpu mapoi Livai, era aminjinaig neom itap u Ihova ara.

³¹ Erus ago a Moses im Eliesar natimi ahlap, is idivaig is asaig a Ihova ehele Moses.

³² Nitai eris atoraliak an nedoa ji igki, nikavaig, nahaijin niji itai umumoh is eled iran yehki, eris atoraliak a ilpu eucsupo, nikavaig, siip is siks huntret im sevente faiv dausant (675.000),

³³ im kurimatau is sevente tu dausant (72,000),

³⁴ im togke is sikste wun dausant (61,000),

³⁵ im natimi is dirte tu dausant (32,000), nikavaig, ilpu atahig asega eris eti ato natamaig ara, um eti amen ehele ra.

³⁶ Nahaijin u ilpu atimi apan u nedoa nigki, nikavaig, siip is dri huntret im dirte seven dausant im faiv huntret (337,500):

³⁷ im siip eris ikni imi Ihova is siks huntret im sevente faiv (675).

³⁸ Im kurimatau is dirte siks dausant (36,000); ja eris ikni imi Ihova sevente tu (72).

³⁹ Im togke is dirte faiv dausant im faiv huntret (35,500); ja eris ikni imi Ihova is sikste wun (61).

⁴⁰ Im natimi is sikstiin dausant (16,000); ja eris ikni imi Ihova natimi is dirte tu (32).

⁴¹ Is ikni nahaijin u Ihova a Moses ehele Eliesar natimi ahlap, par itai ahlap asjaig jipe, et idivaig is asaig a Ihova ehele Moses.

⁴² Im lep nahaijin u nup Isreel is lucsei a Moses ehele ilpu atimi ago nedoa,

⁴³ nahaijin imi atimi nigki, nikavaig, siip is dri huntret im dirte seven dausant im faiv huntret (337,500),

⁴⁴ im kurimatau is dirte siks dausant (36,000),

⁴⁵ im togke is dirte dausant im faiv huntret (30,500),

⁴⁶ im natimi is sikstiin dausant (16,000);

⁴⁷ is leh is ethi irai iji fifte a Moses an nahaijin u nup isreel ira atimi, im niji itai eklim edo irai pece, um ikni ehele ilpu mapoi Livai, eris aminjinaig neom itap u Ihova ara; et idivaig is asaig a Ihova ehele Moses.

⁴⁸ Eris apan ehele Moses a ilpu atimi alupas irai iji dausant im ilpu atimi alupas irai iji huntret:

⁴⁹ eris ika ehele Moses ara, Ak natimi alupas, ecris esvi ilpu eucsupo apol irama aijama, ja et eti tiih tah irama.

⁵⁰ Va nitai inigki ecra mun imiapam naaurinig vai Ihova aijama asega, nikavaig, nipjiitai irai colt, im natau colt, im nethado, im rig, im inteijeug, im nitaahnaig colt, par adahpoi nedo has unyima an nuhup u Ihova.

⁵¹ Erus lucsei colt ura a Moses im Eliesar natimi ahlap, nikavaig, niji itai yecrei asega marom.

⁵² Is sikel is sikstiin dausant im seven huntret im fifte (16,750) colt asega u ilpu atimi alupas irai iji dausant, im ilpu atimi alupas irai iji huntret, eris ikni vai Ihova ara.

⁵³ (Eris lucsei naga eris atoraliak an nedoa a ilpu eucsupo asega imi ra.)

⁵⁴ Erus lucsei colt u ilpu atimi alupas irai iji dausant im lep irai iji huntret a Moses im Eliesar natimi ahlap, um imiapan anliin neom er asjapicnaig o un, nitai imiehva vai nup Isreel an nuhup u Ihova.