Numera 30 - Intas Etipup

Nuarin tas alupas 30.

1 Eri jim atladwi intas upyi asaig. 3 Et upene eri acaiji intas upyi asaig u natahig. 6 U ehgan tah. 9 U intakata et mas natamnyu un, im lep o un er abraig pagki yin.

¹ IS tas a Moses ehele ilpu atimi alupas u niji ahaiji up Isreel, um ika, Nitai inig et mun tas alep a Ihova vaig nigki, nikavaig,

² El et asan tas aktit o un tah natimi ehele Ihova, ka asan tas atcinuhri o un va etpu aktit intas o un vaig; etmu jim adumoij iran tas o un aien, etmu ago aien et idivaig intas asega is ahes an nipjineucsen.

³ El et lep asan tas aktit o un tah intakata ehele Ihova, um apol emda iran, et wat atahig aien an nimnim u etman;

⁴ el et atahaijeg intas upyi asaig o un a etman, im intas aktit o un vaig, jam eti tas ehelen: inyi aktit intas upyi asaig asega o un, im intas aktit asega o un.

⁵ Ja el et acaiji yin a etman an nadiat iyehki et atahaijeg aien; inyi eti aktit tah intas upyi asaig o un, ka tah intas aktit o un: inyi eti lep aru iran a Ihova, is idim acaiji yin a etman.

⁶ El is eteuc natamnyu un an nopan iyehki is asan tas upyi asaig o un aien, um asan tas aktit vaig;

⁷ el is atahaijeg a natamnyu un, jam eti tas ehelen an nadiat iyehki is atahaijeg aien: inyi aktit intas upyi asaig o un aien, im intas aktit o un vaig.

⁸ Ja el is acaiji yin a natamnyu un an nadiat iyehki is atahaijeg aien; inyi eti aktit intas upyi asaig o un, im intas aktit is asaig aien: inyi eti lep aru iran a Ihova.

⁹ Ja inyi aktit intas upyi asaig asega u intakata is mas natamnyu un, im intakata eris abraig pagki yin.

¹⁰ El is asan tas upyi asaig o un aien anliin neom u natamnyu un, ka asaig intas aktit vaig;

¹¹ El is atahaijeg a natamnyu un, jam eti tas ehelen, um eti acaiji yin: etpu aktit intas upyi asaig asega o un, im intas aktit asega o un.

¹² Ja el is acaiji emda a natamnyu un an nadiat yehki is atahaijeg aien, inyi eti aktit intas o un vai intas upyi asaig o un, im intas aktit o un: is acaiji yin a natamnyu un; inyi eti aru iran a Ihova.

¹³ Et emda a natamnyu un par ika yi aktit, ka yi takitai intas upyi asaig asega o un, va nesgiri vaig.

¹⁴ Ja el et eti tas ehelen a natamnyu un irai iji adiat; inyi aktit iran intas upyi asaig asega o un, im intas aktit asega o un: va nedo o un, nikavaig, is eti tas aien an nadiat iyehki is atahaijeg aien.

¹⁵ Ja el et atahaijeg aien, ja par auahas; etpu lucsei nimtan nedo has u intakata aien.

¹⁶ Intas alep u Ihova ji igki is asaig ehele Moses aien vai natamaig im ehgan, im lep vai etman im inhalav atahig o un, et tup amen aien an nimnim u etman.