Numera 3 - Intas Etipup

Nuarin tas alupas 3.

1 Ilpu halav atamaig u Eron. 5 Eh ikni ilpu mapoi Livai imi ilpu atimi ahlap va nauritai an neom itap, 11 mika eri isjeupigmoig inmeto asega. 14 Eh esvi ilpu mapoi Livai et idivaig ilpu eteuc ura. 21 Ilpu eteuc im nauritai im nisjipicnaig u ilpu mapoi Cerson, 27 u ilpu mapoi Kohad, 33 u ilpu mapoi Mererai. 38 Nuarin im nauritai u Moses im Eron. 40 Er atcijaig atimi inmeto vai ilpu mapoi Livai. 44 Er auarimtara era eled ara.

¹ ERIS ilpu hal u Eron im Moses ara sji igki, an nadiat iyehki is tas a Ihova ehele Moses an lolan nedoon Saine.

² Nidai ilpu hal u Eron ji igki; nan, Netab inmeto, im Abaihu, im Eliesar, im Idamar.

³ Nidai ilpu hal u Eron ji igki, ilpu atimi ahlap eris aspi ra, is ikni ra aien par ago nauritai u ilpu atimi ahlap.

⁴ Erus emesmas a Netab im Abaihu an nuhup u Ihova, erus wat imiapan incap is eche arau an nuhup u Ihova, an namasacen Saine, eris lep eti eteuc a ilpu hal urau: ja erus ago nauritai u ilpu atimi ahlap a Eliesar im Idamar an nuhup u Eron etmarau.

⁵ Is tas a Ihova ehele Moses, um ika,

⁶ Imiapam ilpu mapoi Livai ubutpotet, um ikni ra au nuhup u Eron natimi ahlap, va erupu aheca o un ara.

⁷ Erumu aminjinaig niji itai o un ara, im niji itai u atimi asega, an nuhup u neom er asjapicnaig o un, um ago nauritai an neom itap.

⁸ Erumu aminjinaig niji itai asega ara u neom er asjapicnaig o un, im niji itai u nup Isreel, um ago nauritai an neom itap.

⁹ Namu ikni ilpu mapoi Livai aiek imi Eron im ilpu hal o un: er idim alupai yin ra irai up Isreel.

¹⁰ Namu lep ikni Eron im ilpu hal o un aiek, mika eri ago nauritai u ilpu atimi ahlap ara: uhmu lep atgei natimi et eche et apan ubutpotet aien.

¹¹ Is tas a Ihova ehele Moses, um ika,

¹² Kis idim iknipagki ilpu mapoi Livai ainyak irai up Isreel par isjeupigmoig inmeto asega u nup Isreel: erumu idim unyak a ilpu mapoi Livai;

¹³ era idim unyak inmeto asega; kis ika ainyak an nadiat iyehki kis auud inmeto asega ainyak an pece Ijipt, eri itap vai nyak inmeto asega u nup Isreel, natimi im niji itai eklim edo irai pece: erumu unyak ara: ek Ihova ainyak.

¹⁴ Is tas a Ihova ehele Moses an namasacen Saine, um ika,

¹⁵ Esvi ilpu mapoi Livai pan irai ilpu retpora: namu esvi ilpu atamaig asega aiek et eteuc inmohoc et ethi ira ra um eled.

¹⁶ Is esvi ra a Moses vai intas o Ihova is asaig ehelen aien.

¹⁷ Ehtaij hal u Livai ahtaij raigki im nidai ehtaij; nan, Cerson, im Kohad, im Mererai.

¹⁸ Nidai ohwat hal u Cerson raigki irai ilpu eteuc ira ra; nan, Libnai, im Simeai.

¹⁹ Im ilpu hal u Kohad irai ilpu eteuc ira ra; nan Amram, im Isehar, im Hibron, im Ussiel.

²⁰ Im ohwat hal u Mererai irai ilpu eteuc ira rau; nan, Melai, im Musai. Ilpu eteuc irai ilpu mapoi Livai ji igki irai ilpu retpora.

²¹ Eris ahes ehele Cerson a nup u Libnai, im nup u Simeai: eris ilpu eteuc irai Cerson ara sji igki.

²² Eris seven dausant im faiv huntret (7,500) a ilpu atamaig asega eris esvi ra ira ra, is eteuc inmohoc is ethi ira ra um eled.

²³ Erumu athai eom atga ura a ilpu mapoi Cerson an nahaijin neom itap an nahaijin an nete o un.

²⁴ Etmu atimi alupas u ilpu mapoi Cerson a Elaiasaf inhal u Leel.

²⁵ Niji itai aminjinaig u ilpu mapoi Cerson an neom er asjapicnaig o un ji igki; nikavaig, neom itap, im neom atga, im nitai adahpoi, im nitai atapin neucse neom er asjapicnaig o un,

²⁶ im napelumai atapin nokoro, im napelumai atapnes neucse nirahed ubutpotet pan u neom itap, um ubutpotet pan u natau, um arehed mihtag, im injaula urin par ago itai asega iran.

²⁷ Eris ahes ehele Kohad a nup Amram, im nup Isehar, iin nup u Hibron, im nup Ussiel: eris ilpu mapoi Kohad ara sji igki.

²⁸ Eris eet dausant im siks huntret (8,600) a ilpu atamaig asega is eteuc inmohoc is ethi ira ra um eled, eris aminjinaig itai an nuarin itap ara.

²⁹ Erumu athai eom atga ura a ilpu mapoi Kohad an nahaijin neom itap inig et ahes nuritoga iran.

³⁰ Etmu atimi alupas u ilpu mapoi Kohad a Elisafan inhal u Ussiel.

³¹ Erumu aminjinaig nitai iji igki ara; nikavaig, nelcau, im nefata, im nitai atijai incap alahala iran, im natau et ero, im nipjiitai an nuarin itap er ago itai iran, im napelumai atapin, im niji itai asega er ago itai iran.

³² Etmu esjilid a Eliesar inhal u Eron natimi ahlap irai ilpu atimi alupas u ilpu mapoi Livai, um aminjinai ra sji igki era aminjinaig itai an nuarin itap ara.

³³ Eris ahes ehele Mererai a nup u Melai, im nup u Musai: eris ilpu mapoi Mererai ara sji igki.

³⁴ Eris siks dausant im tu huntret (6,200) a ilpu atamaig asega eris esvi ra, is eteuc inmohoc is ethi ira ra um eled.

³⁵ Is atimi alupas u ilpu mapoi Mererai a Suriel inhal u Abiheel: erumu athai eom atga ura ara sji igki an nahaijin neom itap inig et ahes narutu iran.

³⁶ Erumu aminjinaig nuaricai uri neom itap a ilpu mapoi Mererai, im lep nakaukau urin, im nauicai aduwi urin, im niji itai ipjilai urin, im nipjiitai asega urin, im niji itai asega urin,

³⁷ im nauicai aduwi uri nokoro um arehed mihtag, im niji itai ipjilai urin, im niji pin urin, im niji jaula urin.

³⁸ Erumu athai eom atga ura an nuhup u neom itap a Moses, im Eron im ilpu hal o un, an nuhup u neom itap marom an nahaijin an ridjai o un, um aminjinaig nuarin itap vai nup Isreel; uhmu lep atgei natimi et eche inyi apan ubutpotet aien.

³⁹ Eris twente im tu dausant (22,000) ara asega erus esvi ra a Moses im Eron irai ilpu mapoi Livai asega, ilpu atamaig asega is eteuc inmohoc is ethi ira ra um eled.

⁴⁰ Is ika a Ihova ehele Moses, Esvi inmeto asega irai ilpu atamaig u nup Isreel et eteuc inmohoc is ethi ira ra um eled, esvi nidara asega.

⁴¹ Ikni ilpu mapoi Livai imi nyak (ek Ihova ainyak), par asjeupigmoig immeto asega irai up Isreel; im lep niji itai eklim edo irai pece u ilpu mapoi Livai par asjeupigmoig inmeto irai iji itai eklim edo irai pece u nup Isreel.

⁴² Is esvi inmeto asega irai up Isreel a Moses, is idivaig is asaig ehelen a Ihova.

⁴³ Eris twente tu dausant im tu huntret im sevente-dri (22,273) inmeto atamaig asega eris esvi nidara, is eteuc inmohoc is ethi ira ra um eled.

⁴⁴ Is tas a Ihova ehele Moses, um ika,

⁴⁵ Ikni ilpu mapoi Livai par asjeupigmoig inmeto asega irai up Isreel, im niji itai eklim edo irai pece u ilpu mapoi Livai par asjeupigmoig niji itai eklim edo irai pece ura; erumu unyak a ilpu mapoi Livai: ek Ihova ainyak.

⁴⁶ Nasjeupigmoig inmeto u nup Isreel ira atimi et tu huntret im sevente-dri (273), eris eled ara irai ilpu mapoi Livai nigki; nikavaig,

⁴⁷ namu lucsei sikel inyi faiv aiek vai ra athiathi, inyi idivaig sikel an nuarin itap: et tup apapa pan irai cira et twente sikel et ethi:

⁴⁸ namu alupai mune inig aiek, va uhpu asjeupigmoig iran ilpu atimi eled ira ra, imi Eron im ilpu hal o un.

⁴⁹ Is lucsei mune a Moses nasjeupigmoig ra eris eled ara irai ra sji ehki eris auanimtara a ilpu mapoi Livai:

⁵⁰ is lucsei mune aien irai inmeto o nup Isreel; is wun dausant dri huntret im sikste faiv (1,365) sikel, is idivaig sikel an nuarin itap:

⁵¹ is alupai Eron im ilpu hal o un mune a Moses vai ra sji ehki eris ajeupigmoig ra, vai intas o Ihova, is idivaig is asaig a Ihova ehele Moses.