Numera 27 - Intas Etipup

Nuarin tas alupas 27.

1 Era ugyi va nuarin nobohtan par ohuun a ilpu halav atahig u Silofehat. 6 Intas alep va niji uari obohtan eri ohuun. 12 Er asuptecnaig ehele Moses vai inmas o un, et ugyi Atua aien va natimi par isjeupigmoig yin. 18 Er ati Josua mika yi isjeupigmoig Moses.

¹ ERIS apan a ilpu halav atahig u Silofehat, inhal u Hifer, inhal u Cileat, inhal u Mekir, inhal u Manasi, irai ilpu mapoi Manasi inhal u Josef: nidai ilpu halav atahig o un ji igki; nan, Mala, im Noa, im Hocla, im Milka, im Tirsa.

² Eris atidai ara an nuhup u Moses, im Eliesar natimi ahlap, im ilpu atimi alupas, im lep natimi asega, an neucse neom er asjapicnaig o un, um ika,

³ Is mas a etmama an namasacen, ja is eti amen aien ehele ra sji igki eris asjapicnaig ara par imipalea Ihova pan irai ilpu atimi apol irai Kora; ja is mas aien va intup nedo has o un, is ti inhalav atamaig o un.

⁴ Er a uri par atipagki nidai etmama irai ilpu atimi ehpan iran, vaig inig nikavaig, et ti inhalav atamaig o un? Alupai cama nuarin nobohtan pan irai ilpu etwai etmama.

⁵ Is imiapan nitai inigki an nuhup u Ihova a Moses.

⁶ Is tas a Ihova ehele Moses, um ika,

⁷ Et upene intas o ilpu halav atahig u Silofehat: namu alupai ra nuarin nobohtan aiek mika eri ohuun ara pan irai ilpu etwai etmara; namu ika aiek eri ohuun nuarin nobohtan u etmara ara.

⁸ Namu lep tas aiek ehele nup Isreel, um ika, El et mas tah natimi, um ti inhalav atamaig o un, etmu ohuun nuarin nobohtan o un a ilpu halav atahaig o un.

⁹ El et eti eteuc ilpu halav atahig o un, akumu alupai ilpu etwan nuarin nobohtan o un aijaua.

¹⁰ El et eti eteuc ilpu etwan, akumu alupai etwai etman nuarin nobohtan o un aijaua.

¹¹ El et eti eteuc ilpu etwai etman, akumu alupai natimi ehpan iran aijaua et asgeig pan iran aien nuarin nobohtan, etmu ohuun aien: intas alep aktit nigki imi nup Isreel, et idivaig is asaig a Ihova ehele Moses,

¹² Is ika a Ihova ehele Moses, Namu aridjai aiek an lolan nedoon Abarim, um almoi inpece inig ek mun alupai nup Isreel ainyak.

¹³ Nau wit almoi aiek, uhpu ati euc pan irai ilpu retpom, et idivaig eris ati Eron etwam.

¹⁴ Arus idim imipalea intas alep unyak aijaurau an namasacen Sin, va nimiisjisitai u atimi, um eti ehvaig natimi alupas unyak u inwai an nuhup ura: inwai Meriba marom, inmaliyum Ketes an namasacen Sin.

¹⁵ Is tas a Moses ehele Ihova, um ika,

¹⁶ Ak Ihova, Atua u natimi asega, namu ati tah natimi aiek, mika yi esjilid aien ira atimi,

¹⁷ um apan an nuhup ura, um apam an nuhup ura, um atau pan ira ra, um lep atau pam ira ra; va eri jim idivaig siip a ilpu atimi u Ihova et ti natimi asgi ra.

¹⁸ Is ika a Ihova ehele Moses, Namu leh Josua aiek inhal u Nun, natimi et amen iran a Nesgak, um atijai nikmam iran;

¹⁹ um ati yin an nuhup u Eliesar natimi ahlap, im lep an nuhup u atimi asega; um tas ehelen an nuhup ura.

²⁰ Um ati iran nuarin natimi alupas unyum, va erupu imiaiji intas o un a nup Isreel asega.

²¹ Etmu aiji aien an nuhup u Eliesar natimi ahlap, etmu lep ahodaig itai vai yiu aien an nuhup u Ihova irai Urim: erumu apan ara vai intas o un, erumu lep ham ara vai intas o un, aien im nup Isreel asega marom.

²² Is ago a Moses is idivaig is asaig ehelen a Ihova: is leh Josua aien, um ati yin an nuhup u Eliesar natimi ahlap, im lep an nuhup u atimi asega:

²³ is atijai nikman iran aien, um tas ehelen, is idivaig is asaig a Ihova irai Moses.