Numera 25 - Intas Etipup

Nuarin tas alupas 25.

1 Era ago ingeijid im nedo apat a nup Isreel Sitim. 6 Et atgei Simrai im Kosbai a Finehas. 10 Et ati imi yin im ilpu mapon a Atua nauritai u ilpu atimi ahlap irai iji mesese. 16 Et ika a Atua eri atgei nup u Mitian.

¹ ERIS amen Sitim a nup Isreel, ja eris atupun natimi um ago ingeijid irai ilpu takata Moab.

² Eris imiacaij atimi ara mika eri apan ara u niji itai ahlap vai ilpu atmas ura: eris hag niji itai ahlap ura natimi, um atpuse an nuhup u iji atmasimai ura.

³ Eris apol irai Beal-pior hal atimi u nup Isreel: is lep atavaitap a Ihova vai nup Isreel.

⁴ Is ika a Ihova ehele Moses, Namu lucsei niji idjini ilpu atimi iji ig aiek eris apol irai Beal-pior, um alcinwara an nuhup u Ihova, um yetpan u nete u nagesega, va etpu tiih intavaitap alupas u Ihova vai nup Isreel.

⁵ Is ika a Moses ehele ilpu atimi alupas u nup Isreel, Akumu atgei ilpu atimi unyimia eris apol irai Beal-pior aijaua asega, athi um athi ehni.

⁶ Is lep han a nup Isreel is ethi, um imiapan intakata Mitian is ethi ehele ilpu etwan, an nuhup u Moses, im lep an nuhup u nup Isreel asega, eris wat ehtigtaig ara u neucse neom er asjapicnaig o un.

⁷ Is wat almoi a Finehas, inhal u Eliesar, inhal u Eron natimi ahlap, is atidai aien an nuhup u atimi, um leh inmopul an nikman;

⁸ is apitac natimi iyehki aien anliin neom umjeg iran, um ahcai nup Isreel iyehki im intakata iyehki, is tau an nipjinetgarau. Is lep tiih inmas irai up Isreel.

⁹ Eris emesmas natimi is twente for dausant an mas iyehki.

¹⁰ Is tas a Ihova ehele Moses, um ika,

¹¹ Is atipagki intavaitap unyak vai nup Isreel a Finehas inhal u Eliesar, inhal u Eron natimi ahlap, is emda aien vai nyak vai ki jim auahas ehni nup Isreel ainyak an nedemda unyak.

¹² Va nitai inigki namu asaig aiek mika, etpu amen ehelen intas etipup unyak va nasa nigpa:

¹³ etpu amen ehelen, im ilpu hal o un, im ilpu mapon, intas eti-pup va nauritai u ilpu atimi ahlap irai iji mesese; is idim emda aien va nedo o Atua o un, um adahpoi nedo has u nup Isreel.

¹⁴ Nidai nup Isreel iyehki eris atgei yin pan irai intakata Mitian, nan, Simrai, is hal u Selu aien, natimi alupas irai ilpu etwan, ilpu mapoi Simeon.

¹⁵ Nidai intakata Mitian iyehki eris atgei yin, nan, Kosbai, inhalav atahig u Sur; is atimi alupas aien, im natimi esjilid irai ilpu etwan Mitian.

¹⁶ Is tas a Ihova ehele Moses, um ika,

¹⁷ Namu atijai nohocred irai up u Mitian aiek, um auud ra.

¹⁸ Era imiedohalav caua ara an nedo efaifa ura, eris imiahnag caua iran ara an nedo iyehki vai Pior, im lep an nedo o Kosbai, inhalav atahig u natimi alupas is ethi Mitian, natahig ira ra, eris atgei yin an nopan mas iyehki vai Pior.