Numera 24 - Intas Etipup

Nuarin tas alupas 24.

1 Et udei nedo apat o un a Belam, um tup ispun asuptecnaig namen upene u nup Isreel. 10 Et edemda vai yin a Belak, um adcijai yin. 15 Et asan tas upyi asaig aien vai Inmoijeuv u Jekob, Kristo marom, im lep vai nauahas vaig u hal nup urai iji pece.

¹ Is wat almoi a Belam mika is upene irai Ihova par acis yi alwai nup Isreel, is eti apan aien, is idivaig itu, par ago nedo araces, ja is ahidaig pan yin u namasacen aien.

² Is eas a Belam, um ecetai namen vaig u niji ahaiji up Isreel; is yetpam iran a nesgai Atua.

³ Is asan tas inig aien eris ahu iran, um ika, Et mun ika a Belam inhal u Bior, et mun ika a natimi inig er asalgei nesganimtan:

⁴ et mun ika aien is atahaijeg intas o Atua aien, um almoi nitai is ehvaig ehelen a Atua emda acen, um ahuumtidec, jam alum itai:

⁵ Et eklim upene niji eom atga unyimia, ak ilpu mapoi Jekob, im niji imnim unyimia, ak nup Isreel!

⁶ Era apaahni ara et idivaig niji iskanse, um lep idivaig niji okoro an nohmun wai; um lep idivaig niji cai eaig is ahwaig a Ihova, um idivaig niji cai sitar ui wai.

⁷ Erupu atladwi wai ara irai ipjiitai ura; erupu idivaig inwai alupas a ilpu mapora: etpu esjilid natimarid ura irai Ecac, etpu lep esjilid nelcau ura.

⁸ Is iknipagki ra an pece Ijipt a Atua; et idivaig nemda u kurimatau aleg nemda ura: erupu auahas nup urai pece iji ig ara era tak atimi ira ra, um atgei ra, um ahcai ra irai idji efana ura.

⁹ Era eropropse ara, um asjeucse, et idivaig laion, um lep idivaig laion alupas: etpu ahugni ra a di? Et mun ahesmoij a natimi inig et acis yi alwai caua aien, ja etpu erekinman iran aien et ahlaijai caua aien.

¹⁰ Is atavaitap a Belak vai Belam, um ahpoi nikman: is ika a Belak ehele Belam, Kis imiacaij euc ainyak par ahlaijaig ilpu atimi tak atimi irak, ja na mun eceseij acis yi alwai ra aiek.

¹¹ Va nitai inigki namu ahapan aiek an nuarin unyum: kis ika ainyak ki imiaridjai euc ainyak, um ika eri ecen alupas vai euc; ja et mun atapnes euc a Ihova va an jim atimi alupas aiek.

¹² Is ika a Belam ehele Belak, Kis idim tas ainyak ehele ilpu aheca unyum as abraig pam ra aiek, mu ika,

¹³ El et alupai nyak neom o un a Belak um ohua silver im colt iran, el et ehka vai nyak par imipalea intas o Ihova, um ispuk ago tah nitai upene ka tah nitai has; ja ekpu asaig intas inigki ainyak et asaig a Ihova.

¹⁴ Ekpu idim apan ainyak ehele ilpu atimi unyak: ja ekpu asuptecnaig ehelum ainyak nitai iji igki erupu ago natimi iji igki vai ilpu atimi unyum an nopan iyehki itu.

¹⁵ Is asan tas inig eris ahu iran aien, um ika, Et mun ika a Belam inhal u Bior; et mun ika a natimi inig er asalgei nesganimtan:

¹⁶ et mun ika aien is atahaijeg intas o Atua aien, um ato narapakau o un et esjilid acen Aien, um almoi nitai is ehvaig ehelen a Atua emda acen, um ahuumtidec, jam alum itai:

¹⁷ Ekmu ecetai ainyak ja an taka opan: ekmu alum itai ainyak ja et eti ubutpotet: etpu ahes irai ilpu mapoi Jekob Inmoijeuv inyi ethi, etpu lep aridjai a Natimarid inyi ethi irai up Isreel, um auud ilpu atimi alupas an pece Moab, um auahas ilpu atimi imipalea asega.

¹⁸ Etpu ohuun inpece Itom aien, etpu lep ohuun inpece Sier aien, inpece u ilpu atimi tak atimi iran: erupu ago nedo emda a nup Isreel.

¹⁹ Etpu ahes ehele Jekob tah um atimarid, etpu lep auahas ra sji igki aien era amen irai maliyum ura ara.

²⁰ Is almoi nup Amalek aien, um asan tas inig eris ahu iran, um ika. Eris esjilid a nup Amalek irai iji pece; ja uhpu idim auahas ehni ilpu mapora.

²¹ Is lep almoi nup u Kinai aien, um asan tas inig eris ahu iran, um ika, Et ehka nuarin amen unyimia, eka amen an nij aijaua.

²² Ja erupu asuol a nup u Kinai, um imihum pan an nopan iyehki erupu lucsei pan caua a nup Asiria an nedoa.

²³ Is asan tas inig eris ahu iran aien, um ika, Awe, etpu umoh a di etu wit ago nitai inigki a Atua!

²⁴ Etpu ahes an pece Kitim niji elcau, um ohrai nup Asiria, im lep ohrai nup u Hibru, ja uhpu lep auahas ehni ra.

²⁵ Is atidai a Belam um atga o un, um apan an nuarin pece o un: is lep atga o un a Belak.