Numera 22 - Intas Etipup

Nuarin tas alupas 22.

1 Eh acaiji intas uhup u Belak vai Belam. 15 Et leh yin aien vai intas sekunt o un. 22 Et ika a nagelo is atgei yin, el is eti imiatamaig yin a togke o un. 36 Et aubilid yin a Belak.

¹ ERIS atga ura a nup Isreel um apan, um atumop irai iji uarin marara Moab an nahaijin Jortan igcapam ubutpotet pan Jeriko.

² Is almoi a Belak inhal u Sipor niji itai asega eris ago a nup Isreel vai nup Emor.

³ Eris imtita atimi a nup u Moab, va nitai inig nikavaig, eris ahinag ara; eris lep ohocred a nup u Moab vai nup Isreel.

⁴ Eris ika a nup u Moab ehele ilpu atimi alupas Mitian, Erupu auroauro natimi iji igki um hegaig niji itai asega uja, et idivaig et caig nefelelicai an nobohtan kurimatau. Is atimarid u nup u Moab a Belak inhal u Sipor an nopan iyehki:

⁵ Is abra atimi aien par apan Pidor ehele Belam inhal u Bior, ubutpotet pan nofowai an pece u nup Amon, um imiacaij yin, um ika, Eris ahes an pece Ijipt a nup uran tah an pece: era lep ataluopni pam nobohtan ara, um amen ubutpotet ehelek:

⁶ ek ugyi euc ainyak, mika an apam aiek, um ahlaijai atimi iji igki; era esjilid irak ara: kit ekpu esjilid ira ra ainyak, um auud ra, um ahlo ra an pece: ek ato ainyak mika era ahesmoij natimi iji ig na acis yi alwai ra aiek, et lep erekinman ira ra ara na ahlaijai ra aiek.

⁷ Eris apan a ilpu atimi alupas u nup u Moab im ilpu atimi alupas u nup u Mitian, um apos nimtan naraces irai ikmara; eris apan ehele Belam ara, um asaig ehelen intas o Belak.

⁸ Is ika ehele ra aien, Amen igcaki aijaua an nepig inigki, ekpu lep asaig ehelemia ainyak intas etpu asaig ehelek a Ihova: eris amen ehele Belam a ilpu atimi alupas u nup u Moab.

⁹ Is ehcohos pan ehele Belam a Atua, um ika, Natimi a di ji igki ehelum?

¹⁰ Is ika a Belam ehele Atua, Is abra atimi a Belak inhal u Sipor, natimarid u nup u Moab, par apam ehelek, um ika,

¹¹ Eris ahes an pece Ijipt a nup uran tah an pece um apam, era ataluopni pam nobohtan ara: apam aiek, um ahlaijai ra; kit ekpu esjilid ira ra ainyak an nedoa, um ahlo ra.

¹² Is ika a Atua ehele Belam, Namu jim ahced ra aiek; um jim ahlaijai atimi iji igki: eris acis yi alwai ra.

¹³ Is aiji a Belam an nuhialeg, um ika ehele ilpu atimi alupas u Belak, Akumu apan aijaua an pece unyimia: et acaiji nyak a Ihova vai ki jim ahced caua ainyak.

¹⁴ Eris atidai a ilpu atimi alupas u nup u Moab um apan ehele Belak, um ika, Et esjum a Belam par ahced cama.

¹⁵ Is lep abrai ilpu atimi alupas a Belak, eris ahinag ara um esjilid irai ra sji ehki.

¹⁶ Eris apan ehele Belam ara, um ika ehelen, Et ika a Belak inhal u Sipor, Ek ugyi euc ainyak mika an ham ehelek aiek, etmu jim atapnes euc tah nitai:

¹⁷ ekpu imiaridjai euc ainyak, um ika eri ecen alupas vai euc, ekpu lep ago niji itai asega ainyak napu asaig ehelek aiek: ek ugyi euc ainyak, mika an ham aiek um ahlaijai atimi iji igki.

¹⁸ Is tas a Belam ehele ilpu aheca u Belak, um ika. El et alupai nyak neom o un a Belek um ohua silver im colt iran, el et ehka vai nyak par imipalea intas o Ihova Atua unyak, an tah nitai alupas ka an tah nitai haklin.

¹⁹ Ek ugyi caua ainyak, mika aki lep amen igcaki aijaua an ne-pig inigki, mika ki ato ainyak nitai inig etpu lep asaig ehelek a Ihova.

²⁰ Is ehcohos pan ehele Belam a Atua an nepig, um ika ehelen. El era apam ehelum natimi um imiacaij euc, atidai aiek, um ahced ra; ja napu imiaiji intas inig aiek ekpu asaig ehelum ainyak.

²¹ Is aiji an nuhialeg a Belam, um atijai satel irai togke o un, um ahced ilpu atimi alupas u nup u Moab,

²² Is atavaitap a Atua va napan o un: is aiji a nagelo o Ihova an nefalaig par atapnes yin. Is ateuc irai togke o un aien, erus lep ahced yin ahwat aheca o un is ero.

²³ Is ecet nagelo o Ihova togke o un naiji vaig an nefalaig, im nauitoga o un an nikman is ti incetpon iran: is udei nefalaig a togke, um apan irai uman tah: is aredei togke o un a Belam par imiadumoij yin an nefalaig.

²⁴ Ja is aiji a nagelo o Ihova an nefalaig ui okoro vaine, is etgeig nathatahau an nahaijin, im nahaijin.

²⁵ Is wat almoi nagelo o Ihova a togke, is atarere nathatahau aien, um atgeig yi oplec neduei Belam an nathatahau: is lep aredei yin aien.

²⁶ Is lep atga a nagelo o Ihova um aiji an nuarin ehroehro, is ti inuarin ahidaig pan iran an matan ka an mauun.

²⁷ Is wat ecet nagelo o Ihova a togke, is eropse aien ithai Belam; is atavaitap a Belam, um aredei togke an niseuc.

²⁸ Is asalgei nipjineucse togke a Ihova, is ika aien ehele Belam, Kis ago inhe iram ainyak mika na mun eceseij aredei nyak aiek.

²⁹ Is ika a Belam ehele togke, As imiedohalav nyak aiek: el et amen nauitoga an nikmak, el ek atgei euc ainyak.

³⁰ Is lep ika a togke ehele Belam, Ek togke unyum ainyak, as atga irak aiek an nopan iyehki as leh nyak aiek um imihum pam an nopan inig: kis upyi ago nedo inigki vai euc ainyak, ka oʼo? Is um ika aien, Oʼo.

³¹ Is asalgei nesganimtai Belam a Ihova, is lep ecet nagelo o Ihova aien naijivaig an nefalaig, im nauitoga o un au nikman is ti incetpon iran: is atpuse aien, um eropse an nesganimtan.

³² Is ika ehelen a nagelo o Ihova, As a uri aiek par eceseij aredei togke unyum? ek mun idim ham ainyak par atapnes euc, et idim has nedo unyum an nuhup unyak:

³³ is ecet nyak a togke, um eceseij atidjin irak: el et eti atidjin irak aien, el et idim atgei euc ainyak, um imiatamaig yin.

³⁴ Is ika a Belam ehele nagelo o Ihova, Ek mun ago nedo has ainyak; ek mun eti ato ainyak mika na mun aiji an nefalaig aiek par atapnes nyak: el et eti upene iram, ekpu lep adumoij ainyak.

³⁵ Is ika a nagelo o Ihova ehele Belam, Ahced atimi aiek: ja namu asaig intas inigki ache aiek, ekpu asaig ehelum ainyak. Is ahced ilpu atimi alupas u Belak a Belam.

³⁶ Is wat atahaijeg a Belak mika is ham a Belam, is apan aien an maliyum is ethi an pece Moab par aubilid yin, an nehni vai inpece Amon, nilpun pece itac acen.

³⁷ Is ika a Belak ehele Belam, Kis emda ainyak um abra atimi par apan um imiacaij euc: as a uri aiek par eti ham ehelek: ek emda ainyak par imiaridjai euc, um ika eri ecen vai euc.

³⁸ Is ika a Belam ehele Belak, Ek mun idim ham ainyak ehelum: ja ek eti emda ainyak nasaig vaig tah nitai: ekpu asaig intas inig ache ainyak etpu ati an nipjineucsek a Atua.

³⁹ Is ahced Belak a Belam, um yetpan Kirjad-husod.

⁴⁰ Is ahlap a Belak irai kurimatau im siip, um imiapan ehele Belam, im ilpu atimi alupas eris amen ehelen ara.

⁴¹ Is wat lahlah an tak apnyin, is leh Belam a Belak um imiapan yin irai iji tap u Beal, va etpu almoi atimi asega aien.