Numera 21 - Intas Etipup

Nuarin tas alupas 21.

1 Era auahas nup u Kenan a nup Isreel Horma. 4 Era asan tas ehti natimi, ja era ohocred, ara vai imyeuv acas. 7 Era wat ahidaig an liinmopora ara, er ago cehcehe ra an nimyeuv bras. 10 Niji atga acheiachei u nup Isreel. 21 Er auahas Saihon, 33 im lep Oc.

¹ IS atahaijeg a Erat natimarid u nup u Kenan, is amen aien an nuarin inig et ahes nuritoga iran, mika eris atga a nup Isreel an nefalaig iyehki eris atga iran a ilpu atimi ahilek inpece; is ago nedoa vai nup Isreel aien, um arop irai hal ra.

² Eris asan tas aktit a nup Isreel ehele Ihova, um ika, El et atcijaig nup igcaki aiek imi cama, ecrupu auahas ehni niji maliyum ura aijama.

³ Is adai intas o nup Isreel a Ihova, um atcijaig nup u Kenan imi ra; eris auahas ehni ra ara im niji maliyum ura: is anvi nidan nuarin iyehki aien par ika Horma, (Nuarin eris auahas ehni).

⁴ Eris ahes an nedoon Hor ara um atga an nefalaig u Injap cap, par ahparahed inpece Itom: is auatialidi alupas inliinmopoi atimi va nefalaig.

⁵ Eris asan tas ehti natimi vai Atua, im lep Moses, um ika, Arus a uri aijaurau par iknipagki cama an pece Ijipt mika ecri emesmas aijama an namasacen? et ti nitai caig, um ti inwai; ecra lep esjum aijama va nitai caig eti ahgei inigki.

⁶ Is abraig pan imyeuv acas a Ihova ehele atimi, eris aces atimi ara; eris lep emesmas a nup Isreel is ahinag.

⁷ Eris apan natimi ehele Moses, um ika, Ecris ago nedo has aijama, ecris tas vai Ihova aijama, im lep vai euc; ugyi Ihova mika yi iknipagki imyeuv ehelema aien. Is ago nalaigaheni a Moses va atimi.

⁸ Is ika a Ihova ehele Moses, Namu ago nalmui nimyeuv acas aiek, um atijai an nauincai: ja etu wit almoi tah eris aces yin, etpu umoh aien.

⁹ Is ago nimyeuv bras a Moses, um atijai an nauincai; is wat aces tah natimi nimyeuv, is wat almoi nimyeuv bras aien, is umoh aien.

¹⁰ Eris lep atga a nup Isreel, um atumop Obod.

¹¹ Eris lep ahes Obod ara um atga, um atumop Ije-abarim, an namasacen Moab an ridjai o un.

¹² Eris ahes eahki ara um atga, um atumop an niskanse Seret.

¹³ Eris ahes eahki ara um atga, um atumop an nahaijin Amon itac, an namasacen an nehni vai inpece u nup Emor: et atga nofowai Amon an niblan pece Moab im Emor.

¹⁴ Va nitai inigki eris aged an nitaasviitai va nedoa u Ihova, Nitai is ago a Ihova an Jap cap, im lep ui wai Amon,

¹⁵ im lep u nofowai ui wai et asuol pan Ar, um asgeig pan an nahaijin pece Moab.

¹⁶ Eris ahes eahki ara um yetpan Bier: nehpanwai nigki is tas vaig a Ihova ehele Moses, um ika, Asjapicnaig atimi aiek, ekpu alupai ra inwai ainyak.

¹⁷ Eris acesaces nohranitai inigki a nup Isreel, um ika, Etmu ahlau ohua jai inwai; akumu acesaces nohranitai vaig aijaua:

¹⁸ eris ucji nehpanwai a ilpu atimarid, eris ucji a ilpu atimi alupas u atimi vai intas u natimi tas alep irai iseuc ura. Eris ahes an namasacen ara um yetpan Matana:

¹⁹ eris ahes Matana ara um yetpan Naheliel: eris ahes Naheliel ara um yetpan Bemod:

²⁰ eris ahes Bemod ara an niskanse iyehki et eteuc an pece Moab, um yetpan an lolan nedoon Pisca, et ehcatoh pan irai Jesimon.

²¹ Eris abraig pan atimi ehele Saihon natimarid u nup Emor a nup Isreel, um ika,

²² Ecrumu atga aijama an pece unyum: ecrupu eti ahidai cama aijama pan umamia, ka iraili okoro vaine unyimia; ecrupu eti umnyi inwai aijama iraili ehpai wai: ja ecrupu atga an nefalaig u natimarid aijama, um imihum pan an nopan iyehki ecrupu aipujaig inpece unyum aijama.

²³ Ja is acaiji nup Isreel a Saihon va eri jim atga ara an pece o un: is asjapicnaig ilpu dualep o un asega a Saihon, um apan par atapnes nup Isreel an namasacen: is yetpan Jehas aien, um ati nedoa vai nup Isreel.

²⁴ Eris auud yin a nup Isreel an nedoa, um ohuun inpece o un nahes vaig Amon um yetpan Jabok, um lep uhum pan inpece u nup Amon: ja is ehka nehni vai inpece u nup Amon.

²⁵ Eris atoraliak niji maliyum asega iji igki a nup Isreel: eris lep amen a nup Isreel irai iji maliyum u nup Emor; nikavaig, Hesbon im niji maliyum haklin asega iran.

²⁶ Is maliyum u Saihon natimarid u nup Emor Hesbon, is ago nedoa aien vai natimarid Moab itu acen, um atoraliak inpece asega o un um yetpan Amon.

²⁷ Va nitai inigki era ika a ilpu atimi tas ecsipece, Apam Hesbon, uhmu actaig imaliyum u Saihon um ago upene:

²⁸ Et mun ahes incap Hesbon, im nalaume u incap an maliyum u Saihon: et mun atnamud Ar an pece Moab, im lep ilpu atimi alupas irai iji uarin ijinies Amon.

²⁹ Kaiheuc vai caua, ak nup u Moab! erupu atiih a ilpu atimi u Kimos; is atcijaig ilpu halav atamaig o un aien, mika eri ilpu ohna ara, im ilpu halav atahig o un, mika uhpu imiapan ra ehele Saihon natimarid u nup Emor.

³⁰ Ecris asji ra aijama: era atiih a nup u Hesbon um yetpan Taibon, ecris uhpoditai aijama um yetpan Nofa, um lep yetpan Meteba.

³¹ Eris amen a nup Isreel an pece u nup Emor.

³² Is abra atimi a Moses par apan um almaijidjid Jaeser, eris atoraliak niji maliyum haklin iran ara, um ahlo nup Emor eris amen eahki ara.

³³ Eris ahidai ra ara um aridjai an nefalaig et yetpan Besan: is apan a Oc natimarid Besan, im lep ilpu dualep o un asega, um ati nedoa vai ra Etreai.

³⁴ Is ika a Ihova ehele Moses, Jim imtitai yin: ek mun ati yin ainyak an nikmam, im ilpu dualep o un asega, im inpece o un; napu ago nedo inig iran aiek as ago irai Saihon aiek natimarid u nup Emor, is amen Hesbon aien.

³⁵ Eris auud yin ara, im ilpu halav atamaig o un, im ilpu atimi o un asega, um eti imialep tah: eris ohuun inpece o un ara.