Numera 20 - Intas Etipup

Nuarin tas alupas 20.

1 Era yetpan Sin a nup Isreel, et mas eahki a Miriam. 2 Era asan tas ehti ara vai inti vaig inwai. 7 Et auud inhehteuc a Moses Meriba, et ahlau ohua inwai iran. 14 Et ugyi nup Itom a Moses Ketes mika eri ahced inpece Itom ara, ja eris acaiji ra ara. 22 Et atcijaig nauritai o un a Eron imi Eliesar an nedoon Hor, ja pah mas.

¹ ERIS apan a nup Isreel asega an namasacen Sin an mohoc uhup: eris amen Ketes natimi; is mas a Miriam eahki, eris lep atelmoi yin eahki.

² Is ti inwai luma atimi: eris asjapicnaig ara vai Moses im Eron.

³ Eris atuh Moses ara, um ika, El is upene el ecris emesmas aijama eris wat emesmas a ilpu etwama au nuhup u Ihova!

⁴ Arus a uri aijaurau par imiapam atimi u Ihova an namasacen inigki, mika ecri emesmas aijama im lep niji itai eklim edo irai pece unyima:

⁵ Arus a uri aijaurau par iknipagki cama an pece Ijipt, um imiapam cama an nuarin has inigki? et ti korn an nuarin inig, um ti nateg, um ti vaine, um ti pomcranet; et lep ti inwai lumama.

⁶ Erus ahes an nuhup u atimi a Moses im Eron um apan an neucse neom itap, um eropropse an nesganimtarau: is lep ehcohos pan ehele rau naijorai Ihova.

⁷ Is tas a Ihova ehele Moses, um ika,

⁸ Leh niseuc aiek, um asjapicnaig atimi, aiek, im Eron etwam, arumu lep tas aijaurau ehele inhehteuc an nuhup u atimi; etpu ahlau ohua inwai iran, napu leh inwai aiek an hehteuc lumara: napu aluma atimi inwai aiek, luma ra im niji itai eklim edo irai pece ura.

⁹ Is leh niseuc a Moses an nuhup u Ihova, is idivaig is asaig aien.

¹⁰ Erus asjapicnaig atimi a Moses im Eron u inhehteuc, is ika ehele ra aien, Akumu atahaijeg aijaua, ak ilpu atimi imipalea; eris idim ika ecrupu athunwai lumamia aijumrau an hehteuc inigki, ka oʼo?

¹¹ Is adaigjai nikman a Moses, um ecero auud inhehteuc iyehki an niseuc o un: is ahlau ohua inwai alupas, eris umnyi atimi, im niji itai eklim edo irai pece ura.

¹² Is ika a Ihova ehele Moses im Eron, Arus eti ateuc an tas unyak aijaurau, um eti ehvaig natimi alupas unyak an nuhup u nup Isreel, va nitai inigki arupu eti imiapan atimi iji igki aijaurau an pece inig ek mun alupai ra ainyak.

¹³ Inwai Meriba nigki; eris imiisjisitai a nup Isreel ehele Ihova, is ehvaig natimi alupas o un ehele ra aien.

¹⁴ Is abra atimi a Moses mika eri ahes Ketes ara um apan ehele natimarid an pece Itom, um ika, Era ika a nup Isreel ilpu etwam, Na ato aiek nohocred asega is yetpam irama:

¹⁵ eris asuol pan an pece Ijipt a ilpu retpoma, ecris lep amen Ijipt aijama is itu irama; eris ehcerucai cama im lep ilpu retpoma a nup Ijipt:

¹⁶ ecris wat ahlaig vai Ihova aijama, is atahaijeg nohrama aien, um abrai naheca o un, um iknipagki cama an pece Ijipt: ecra amen Ketes aijama inmaliyum an nehni vai inpece unyum:

¹⁷ ecra ugyi euc aijama mika ecri atga an pece unyum aijama: ecrupu eti atga aijama umamia, ka iraili okoro vaine unyimia, ecrupu lep eti umnyi inwai aijama iraili ehpaiwai unyimia: ecrupu atga aijama an nefalaig alupas u natimarid, ecrupu eti ahidai cama aijama pan an matama ka an mauuma, um uhum pan an nopan iyehki ecrupu aipujaig inpece unyum aijama.

¹⁸ Ja is ika a natimarid an pece Itom, Akumu jim ahtaregdei nyak aijaua vai ki jim atapnes caua ainyak an nedoa.

¹⁹ Eris ika ehelen a nup Isreel, Ecrupu atga an nefalaig alupas aijama: el ecra umnyi inwai unyum aijama, im niji itai eklim edo irai pece unyima, ecrupu auanimtan aijama: ecrupu atga ache aijama, jam eti ago tah nitai.

²⁰ Ja is ika aien, Akumu jim atga iran aijaua. Is apan a natimarid an pece Itom im natimi is ahinag par atapnes ra an nikman emda.

²¹ Is acaiji nup Isreel a natimarid an pece Itom va eri jim atga ara an pece o un: va nitai inigki eris udei yin a nup Isreel um atga ura.

²² Eris ahes Ketes a nup Isreel asega, um atga um apan an nedoon Hor.

²³ Is tas a Ihova ehele Moses im Eron an nedoon Hor, an nehni vai inpece Itom, um ika,

²⁴ Uhpu ati Eron ehele ilpu retpon: inyi eti apan aien an pece inig ek mun alupai nup Isreel ainyak, va nedo unyimirau, nikavaig, arus imipalea intas unyak aijaurau u inwai Meriba.

²⁵ Leh Eron im Eliesar inhal o un aiek, um imiapan rau an nedoon Hor:

²⁶ um atipagki napelumai u Eron, um aso Eliesar inhal o un iran: ja uhpu ati Eron ehele ilpu retpon, etpu mas aien eahki.

²⁷ Is ago a Moses is idivaig is asaig a Ihova: ehtijis aridjai an nedoon Hor ahtaij an nuhup u atimi asega.

²⁸ Is atipagki napelumai irai Eron a Moses, um aso Eliesar inhal o un iran; is mas a Eron eahki ijinies an lolan nedoon: erus lep ahes an nedoon a Moses im Eliesar um adip pam.

²⁹ Eris wat ato natimi asega mika is mas a Eron, eris imitaig Eron a nup Isreel asega ira adiat is dirte.