Numera 19 - Intas Etipup

Nuarin tas alupas 19.

1 Er ago inwai er ago upene vaig an nohpa u kurimatau atahig et cap. 11 Intas alep vaig par ago adicinadicin ilpu atimi has.

¹ IS tas a Ihova ehele Moses im Eron, um ika,

² Intas alep u Ihova nigki is asaig aien, um ika, Asaig ehele nup Isreel aiek, mika eri imiapam ehelum tah kurimatau atahig cap et upene asega, um ti tah nuarin ugnyitugnyit iran, is eti fi auritai:

³ um ati ehele Eliesar natimi ahlap, mika yi atipagki yin aien an nuarin amen u atimi, um imiapan itac, uhmu atgei yin an nuhup o un:

⁴ etmu lep leh inja iran an nupsikman a Eliesar natimi ahlap, um eceseven ohan ja iran an nuhup u neom itap:

⁵ uhmu lep atnamud kurimatau atahig an nuhup o un; etmu atnamud narasin aien, im nohun, im inja iran, im nihkin:

⁶ etmu lep leh incai sitar, im hisop, im napelumai cap a natimi ahlap, um erekhaig jai an cap er atnamud kurimatau atahig iran.

⁷ Etmu lep ohpoi napelumai o un a natimi ahlap, um ereuc an wai, ja par apitac um apan an nuarin amen u atimi, ja etpu has a natimi ahlap um yetpan an jupura.

⁸ Etmu lep ohpoi napelumai o un aien et atnamud aien, um ereuc an wai, ja etpu has aien um yetpan an jupura.

⁹ Ja etmu asjapicnaig nohpa irai kurimatau tah natimi adicinadicin, um atipagki an nuarin amen u atimi, um ati an nuarin lah itac, uhmu aminjinaig vai nup Isreel par ago iran er upene vaig: nitai iknipagki nedo has nigki.

¹⁰ Etmu lep ohpoi napelumai o un a natimi inig et asjapicnaig nohpa aien, ja etpu has aien um yetpan an jupura: intas alep ehele nup Isreel nigki, im lep ehele nup urai taka pece era amen ehelemia ara, irai iji mesese.

¹¹ El et atcei pan nohui natimi mas tah etpu has aien ira adiat inyi seven.

¹² Etmu yiri yin iran aien an nadiat dirt, im lep an nadiat sevend, ja etpu upene aien: ja el et eti yiri yin aien an nadiat dirt, im lep an nadiat sevend, inyi eti upene aien.

¹³ El et atcei pan nohui natimi mas tah natimi, jam eti yiri yin, et auahas neom itap u Ihova aien; uhmu atipagki natimi naico ehele nup Isreel: eris eti ohai yin an wai er upene vaig, va nitai inigki etpu has aien; et amen nemig iran.

¹⁴ Intas alep nigki etu wit mas tah natimi an neom atga o un: erupu has ira adiat inyi seven ara asega era apan anliin neom atga ara, im lep niji itai asega iran.

¹⁵ Inyi lep has nipjiitai asega is eti ipjin intapnes iran.

¹⁶ El et atcei pan tah eris atgei yin an nedoa an lelitai tah natimi, ka atcei pan nohui tah natimi mas, ka neduon tah natimi, ka tah netheso, etpu has aien ira adiat inyi seven.

¹⁷ Uhmu leh nohpa irai kurimatau atahig eris atnamud, va natimi inig et has aien, par iknipagki nedo has, um ati inwai ahlau ohua iran an nipjinitai:

¹⁸ etmu lep leh hisop tah natimi adicinadicin um ahtaijuli an wai, um ohaig neom atga iran, im niji itai asega, im natimi asega eris amen iran ara, im lep yin is atcei pan tah neduon aien, ka tah natimi eris atgei yin, ka tah natimi mas, ka tah netheso:

¹⁹ Etmu ohaig natimi inig et has aien a natimi adicinadicin an nadiat dirt, im lep an nadiat sevend: ja etmu yiri yin aien an nadiat sevend, um ohpoi napelumai o un um ereuc, ja etpu adicinadicin aien an jupura.

²⁰ Ja natimi inig et has aien, um eti yiri yin, uhmu atipagki yin ehele atimi, is idim auahas nuarin itap u Ihova aien: eris eti ohai yin an wai er adicinadicin vaig; et has aien.

²¹ Intas alep nigki irai iji mesese, mika yi ohpoi napelumai o un a natimi inig et ohaig an wai aien er adicinadicin vaig; im lep inig, etpu has um yetpan an jupura a natimi inig et atcei inwai er adicinadicin vaig.

²² Etpu lep has nitai iji igki asega et atcei pan a natimi inig et has aien; el et atcei pan tah etpu has aien um yetpan an jupura.