Numera 18 - Intas Etipup

Nuarin tas alupas 18.

1 Nauritai u ilpu atimi ahlap im ilpu mapoi Livai. 9 Nuarin u ilpu atimi ahlap. 21 Nuarin u ilpu mapoi Livai. 25 Nitai ahlap er asjaig jipe imi ilpu atimi ahlap irai uarin u ilpu mapoi Livai.

¹ IS ika a Ihova ehele Eron, Napu lucsei nimtan nauahas vaig nuarin itap aiek, im ilpu hal unyum, im ilpu atimi ehpan iram: napu lep lucsei nimtan nedo has u ilpu atimi ahlap aiek, im ilpu hal unyum.

² Namu lep imiapam ilpu etwam aiek, irai ilpu mapoi Livai, ilpu atimi ehpan iram, mika eri tup ethi ache pan iram ara, um aheca unyum: ja namu auanaheca aiek im ilpu hal unyum an nuhup u neom itap et amen intas alep iran.

³ Erumu aminjinaig niji itai ara as asaig ehele ra aiek, im niji itai asega an neom itap: ja erumu jim apan ubutpotet u itai an nuarin itap ara im lep natau, va eri jim emesmas ara, im lep caua.

⁴ Erumu atau imi euc ara, um aminjinaig niji itai eris asaig ehele ra an neom er asjapicnaig o un, va nauanaheca asega an neom itap: etmu jim yetpan ehelemia tah natimi et eche.

⁵ Akumu aminjinaig nuarin itap aijaua, um aminjinaig natau: vai yi jim lep yetpam intavaitap irai up Isreel.

⁶ Kis idim iknipagki ilpu etwamia ainyak irai up Isreel, ilpu mapoi Livai marom: er alupai ra nitai tup ahtai imi Ihova, mika eri ago nauritai ara an neom er asjapicnaig o un.

⁷ Va nitai inigki namu aminjinaig nauritai u ilpu atimi ahlap aiek, im ilpu hal unyum irai iji itai asega an natau, im lep niji itai an nuarin er atapin an napelumai; akumu auanaheca aijaua: ek mun ikni caua ainyak mika aki ago nauritai u ilpu atimi ahlap aijaua vai intup naiheuc unyak vai caua: uhmu atgei natimi et eche et apam ubutpotet aien.

⁸ Is ika a Ihova ehele Eron, Ek mun ati euc ainyak mika an aminjinaig niji itai ahlap asjaig jipe unyak aiek irai iji itai itap asega u nup Isreel; ek mun alupai euc ra ainyak, im ilpu hal unyum, va naspi caua vaig, vai intas alep irai iji mesese.

⁹ Etpu unyum nitai inigki irai iji itai itap acen er eti atnamud: nikavaig, inyi itap acen imi euc im ilpu hal unyum niji itai ahlap asega ura, im niji itai ahlap asega an nitai caig ura, im niji itai ahlap asega ura va nedo has, erupu ikni vai nyak ara.

¹⁰ Uhmu caig an nuarin itap acen; erumu caig a ilpu atamaig asega: inyi itap imi euc.

¹¹ Et unyum nitai inigki; nikavaig, nitai ahlap asjaig jipe irai itai tup ahtai ura, im niji itai ahlap ohaig jipe asega u nup Isreel: ek mun alupai euc ainyak, im ilpu halav atamaig unyum, im ilpu halav atahig unyum, vai intas alep irai iji mesese: erumu caig a ilpu atimi ehpan iram asega era upene ara.

¹² Ek mun alupai euc narakei esjilid asega ainyak, im nide vaine esjilid asega, im hwiit esjilid, im inhupnai itai iji ig erupu ahlap iran ara vai Ihova.

¹³ Etpu lep unyum inhupnai itai asega inig an pece erupu imiapam ehele Ihova ara; erumu caig a ilpu atimi ehpan iram asega era upene ara.

¹⁴ Etpu unyum niji itai itap asega an pece Isreel.

¹⁵ Etpu unyum inmeto asega u niji itai umumoh asega, erupu imiapam ehele Ihova ara, kit inmeto o atimi, ka niji itai eklim edo irai pece: ja namu ika aiek eri isjeupigmoig inmeto o atimi, im inmeto u niji itai eklim edo irai pece et eti itap.

¹⁶ Namu ika aiek eri asjeupigmoig ra sji igki is ethi inmohoc ira ra um eled, et idivaig nesvi ra unyum, irai mune et tup apapa pan irai sikel et faiv, et idivaig sikel an nuarin itap, cira et twente nigki.

¹⁷ Ja namu ika aiek eri jim isjeupigmoig inmeto o kurimatau, im inmeto u siip, im inmeto u nanin; era itap ara: namu ohan ja ira ra aiek ijinies an natau, um atnamud naclara, nitai ahlap er ago an cap, par itai auanipin upene vai Ihova.

¹⁸ Etpu unyum nohura, et idivaig et unyum inritira er ohaig jipe im nahaijin nikmara an matara.

¹⁹ Ek mun alupai euc ainyak, im ilpu halav atamaig unyum, im ilpu halav atahig unyum, niji itai ahlap asjaig jipe asega irai iji itai itap era ahlap iran vai Ihova a nup Isreel, vai intas alep unyak irai iji mesese: intas etipup inveijec nigki ehelum im ilpu mapom an nuhup u Ihova irai iji mesese.

²⁰ Is ika a Ihova ehele Eron, Namu jim ohuun tah nuarin nobohtan an pece ura aiek, um jim asipiai itai ehele ra: ek mun asaig itai ehelemia ainyak irai up Isreel.

²¹ Ek mun aniv ainyak ehele ilpu mapoi Livai nahaijin tend irai iji itai asega u nup Isreel, mika eri ohuun ara, va nauanaheca ura, nauritai ura marom an neom er asjapicnaig o un.

²² Erumu jim lep ham a nup Isreel ubutpotet pan u neom er asjapicnaig o un, va eri jim lucsei nimtan nedo has ara, um emesmas.

²³ Ja erupu auanaheca a ilpu mapoi Livai an neom er asjapicnaig o un, erupu lep lucsei nimtan nedo has ura ara: intas alep nigki ehele ilpu mapomia irai iji mesese, mika eri jim ohuun tah nuarin nobohtan ara ehele nup Isreel.

²⁴ Ek mun alupai ilpu mapoi Livai ainyak nahaijin tend u itai u nup Isreel, nitai iji ig marom era ahlap iran ara par itai ahlap er asjaig jipe vai Ihova, mika eri ohuun ara: va nitai inigki kis asaig ainyak ehele ra, mika eri eti ohuun tah nuarin nobohtan ara ehele nup Isreel.

²⁵ Is tas a Ihova ehele Moses, um ika,

²⁶ Namu tas aiek ehele ilpu mapoi Livai, um ika ehele ra, Aku wit leh ehele nup Isreel nahaijin tend inig irai itai ura, ek mun alupai caua ainyak mika aki ohuun aijaua, akumu ati nitai ahlap er asjaig jipe iran vai Ihova aijaua, nahaijin tend irai nahaijin tend iyehki marom.

²⁷ Eri ika inyi upene nitai ahlap er asjaig jipe unyimia, et idivaig korn an nuarin auud korn iran, im nide vaine alupas an nuarin ahtaijiraig nohwai vaine iran.

²⁸ Akumu ati nitai ahlap asjaig jipe vai Ihova aijaua irai iji ahaijin tend iji ig unyimia, eka lucsei ehele nup Isreel aijaua; akumu lep leh iran nitai ahlap asjaig jipe vai Ihova aijaua um alupai Eron natimi ahlap.

²⁹ Akumu ati vai Ihova nitai ahlap asjaig jipe aijaua irai iji itai tup ahtai unyimia, nuarin inig et esjilid acen, nikavaig, nuarin itap.

³⁰ Va nitai inigki namu lep asaig ehele ra aiek, mika aku wit asjaig jipe nuarin esjilid iran aijaua, eri ika inyi upene vai ilpu mapoi Livai et idivaig nitai er leh an nuarin auud korn iran, im nitai er leh an nuarin ahtaijiraig nohwai vaine iran.

³¹ Akumu caig aijaua irai iji uarin asega, im lep ilpu atimi ehpan iramia: nimtan imi caua nigki va nauritai unyimia an neom er asjapicnaig o un.

³² Inyi eti lep amen nedo has iramia vaig, aku wit asjaig jipe nuarin esjilid iran aijaua: akumu jim lep auahas niji itai itap u nup Isreel aijaua, va aki jim emesmas aijaua.