Numera 17 - Intas Etipup

Nuarin tas alupas 17.

1 Et elwa nauincai u Eron ache irai auicai u ilpu atimi alupas et twelv. 10 Er udei mika yi itai asjaaicnaig vai ilpu atimi imipalea.

¹ IS tas a Ihova ehele Moses, um ika,

² Namu tas aiek ehele nup Isreel, um lucsei niseuc inyi twelv ehele ilpu atimi alupas asega ura, athi um athi ehni, era esjilid ara irai ilpu eteuc ira ra, niseuc inyi twelv: um aged athiathi nida atimi asega irai iseuc ura.

³ Namu aged nidai Eron aiek an niseuc u ilpu mapoi Livai: inyi ethi ache niseuc um ehcai natimi esjilid irai ilpu eteuc iran.

⁴ Namu lep ikni aiek anliin neom er asjapicnaig o un an nuhup u nelcau et amen intas alep iran, ekpu ehtet iramia ainyak eahki.

⁵ Ja etpu elwa niseuc u natimi inig ekpu ehtai yin ainyak: ekpu lep atapnes intas has o nup Isreel ainyak era asaig vai caurau ara.

⁶ Is tas a Moses ehele nup Isreel, ja eris alupai yin niseuc is ethi athiathi a ilpu atimi alupas asega, niseuc is ethi um ehcai natimi alupas is ethi eris esjilid irai ilpu eteuc ira ra ara, niseuc is twelv: is amen niseuc u Eron irai iseuc ura.

⁷ Is ikni niseuc iji ehki a Moses an nuhup u Ihova anliin neom iyehki is amen intas alep iran.

⁸ Is wat lahlah au tak apnyin is apan a Moses anliin neom iyehki is amen intas alep iran; ja is idim ehcohodaig niseuc u Eron, um ehcai ilpu mapoi Livai, is ehcohodaig, um elwa, um oho, is eteuc nohwan.

⁹ Is iknipagki niseuc asega a Moses an nuhup u Ihova um imiapan ehele nup Isreel: eris almoi ara, eris leh athiathi niseuc ura natimi asega.

¹⁰ Is ika a Ihova ehele Moses, Imiapam niseuc u Eron an nuhup u nelcau et amen intas alep iran, um aminjinaig par itai asjaaicnaig vai ilpu atimi imipalea; napu lep atapnes intas has ura aiek an nuhup unyak, va eri jim emesmas ara.

¹¹ Is ago a Moses is uce: is ago aien is idivaig is asaig ehelen a Ihova.

¹² Eris tas a nup Isreel ehele Moses, um ika, Ecrupu idim emesmas aijama, uhpu auahas cama, uhpu idim auahas cama asega.

¹³ Erupu emesmas ara asega era apan ubutpotet u neom u Ihova ara: etpu auahas ehni cama inmas, ka oʼo?