Numera 15 - Intas Etipup

Nuarin tas alupas 15.

1 Intas alep va nitai ahlap eh caig im nitai ahlap er umnyi. 13, 29 Et tup ethi ache intas alep vai nup urai taka pece. 17 Intas alep va nitai ahlap asjaig jipe irai hupnai flaur aplamod. 22 Nitai ahlap va nedo has er ago jam eti ato. 30 Neruvaig va nedo has o un et imipalea aien um asan tas has vai Atua. 32 Er asji irai hat natimi inig et auahas nadiat atumop aien. 37 Intas alep vai tisiantisian.

¹ IS tas a Ihova ehele Moses, um ika,

² Namu tas aiek ehele nup Isreel, um ika ehele ra, Aku wit yetpan an pece iyehki aijaua, ekpu alupai caua ainyak par amen iran,

³ um ika aki ahlap vai Ihova an nitai ahlap atnamud, ka nitai ahlap vai intas upyi asaig, ka nitai ahlap vai intup merit unyimia, ka ira asjapicnaig itap unyimia, kurimatau unyimia, im siip unyimia, mika yi itai auanipin upene vai Ihova:

⁴ etu wit ahlap tah vai Ihova, etmu imiapan nitai ahlap an nitai caig aien, nikavaig, nahaijin ifa inyi tend irai flaur er aplamod pelaig an nahaijin hin inyi ford an narakei.

⁵ Uhmu lep ago nitai ahlap umnyi, nikavaig, nahaijin hin inyi ford an nide vaine pan an nitai ahlap atnamud ka nitai ahlap et eche, vai inhakli siip et ethi.

⁶ Ja el et siip atamaig, uhmu ago nitai ahlap an nitai caig irai ahaiji ifa inyi fiftd irai flaur er aplamod pelaig an nahaijin hin inyi dirt an narakei.

⁷ Uhmu lep ahlap an nitai ahlap umnyi, nikavaig, nahaijin hin inyi dirt an nide vaine, par itai auanipin upene vai Ihova.

⁸ Uhu wit imiyecrei kurimatau atamaig par itai ahlap atnamud, ka nitai ahlap vai intas upyi asaig, ka nitai ahlap naaurinig vai Ihova:

⁹ etmu imiapam nitai ahlap an nitai caig aien pan irai kurimatau atamaig, nikavaig, nahaiji ifa inyi tend inyi dri irai flaur er aplamod pelaig an nahaijin hin an narakei.

¹⁰ Uhmu imiapam nahaijin hin an nide vaine, par itai ahlap umnyi nitai ahlap er ago an cap, nitai auanipin upene vai Ihova.

¹¹ Uhmu ago inyi uce vai kurimatau atamaig inyi ethi, ka siip atamaig inyi ethi, ka inhakli siip inyi ethi, ka inhaklin nanin.

¹² Akumu ago nedo inigki aijaua irai iji itai ahlap asega, athi um athi ehni, eka ahlap iran aijaua.

¹³ Erumu ago nitai iji igki inyi uce a nup uran pece asega, eru wit ahlap ara an nitai ahlap er ago an cap, par itai auanipin upene vai Ihova.

¹⁴ El et amen ehelemia natimi an taka uarin, el et lep amen tah ehelemia, ka irai ilpu mapomia, u in ika yi ahlap an nitai ahlap er ago an cap par itai auanipin upene vai Ihova; etmu ago aien et idivaig eka ago aijaua.

¹⁵ Inyi tup ethi ache intas alep vai caua nup Isreel, im uup urai taka uarin era amen ehelemia ara, inyi amen intas alep irai iji mesese irai ilpu mapomia: inyi idivaig caua a nup urai taka uarin an nuhup u Ihova.

¹⁶ Inyi tup ethi ache intas alep im nedo vai caua, im lep nup urai taka uarin era amen ehelemia ara.

¹⁷ Is tas a Ihova ehele Moses, um ika,

¹⁸ Namu tas aiek ehele nup Isreel, um ika ehele ra, Aku wit yetpan aijaua an pece inig ekpu imiapan caua iran ainyak,

¹⁹ aku wit caig nitai caig an pece aijaua, akumu ahlap vai Ihova aijaua an nitai ahlap asjaig jipe.

²⁰ Akumu ahlap aijaua an nareto apalapal er upyi aplamod par itai ahlap asjaig jipe: et idivaig eka asjaig jipe nitai ahlap an nuarin auud korn iran, et um uco akumu asjaig aijaua.

²¹ Akumu alupai Ihova inhupnai flaur aplamod unyimia aijaua nitai asjaig jipe im lep ilpu mapomia.

²² El eka ahnag aijaua, um eti apos intas alep asega iji igki, is asaig a Ihova ehele Moses,

²³ nitai iji igki asega is asaig ehelemia aien irai Moses, an nopan iyehki is tas a Ihova ehele Moses, um yetpan irai ilpu mapomia;

²⁴ el et lep ago tah nitai tah va napat u inliinmopon jam eti ato natimi, erumu ahlap natimi asega irai kurimatau atamaig takuras yi ethi par itai ahlap atnamud, nitai auanipin upene vai Ihova, im lep nitai ahlap an nitai caig, im nitai ahlap umnyi, et idivaig intas alep, im inhaklin nanin yi ethi par itai ahlap va nedo has.

²⁵ Etmu lep ahlap a natimi ahlap va nedo has u nup Isreel asega, ja uhpu eti aru ira ra; eris ago nedo has va neti ato itai ura: erumu imiapam nitai ahlap ura ara nitai ahlap er ago an cap vai Ihova, im nitai ahlap ura va nedo has an nuhup u Ihova, va napat u inliinmopora:

²⁶ uhpu eti aru irai up Isreel asega, im nup urai taka uarin era amen ehele ra ara; eris idim eti ato natimi asega.

²⁷ El et ago nedo has tah natimi jam eti ato, etmu imiapam nanin atahig inyi ethi aien inyi eteuc inmesese et ethi iran, par itai ahlap va nedo has.

²⁸ Etmu ahlap a natimi ahlap va natimi inig et ago nedo has aien jam eti ato, etu wit ago nedo has aien an nuhup u Ihova jam eti ato, um ahlap va nedo has o un; ja uhpu eti aru iran.

²⁹ Etmu ethi ache intas alep vai yin et ago nedo has aien jam eti ato, kit et up uran pece Isreel aien, ka nup urai taka uarin era amen ehelemia ara.

³⁰ Ja el et imipalea Ihova a natimi inig et ago tah nitai aien an liinmopon ijinies, kit et up uran pece aien, ka nup an taka uarin, et asan tas has vai Ihova aien; uhmu atipagki natimi inig ehele atimi.

³¹ Et idim imipalea intas o Ihova aien, um auahas intas alep o un, uhmu idim atipagki yin; inyi amen iran nedo has o un.

³² Eris wat amen a nup Isreel an namasacen, eris ecet natimi is ethi ara is arecai aien an nadiat atumop.

³³ Eris imiapan yin ehele Moses, im Eron, im lep natimi asega, ara sji ehki eris ecet yin ara narecai vaig.

³⁴ Eris ati yin an nuarin ipjin ara, eris eti fi asaig nitai inig uhpu ago iran.

³⁵ Is ika a Ihova ehele Moses, Uhmu idim atgei natimi iyehki: erumu atipagki yin natimi asega an nuarin amen u atimi um asji yin irai hat itac.

³⁶ Eris atipagki yin natimi asega an nuarin amen u atimi, um imiapan yin itac, um asji yin irai hat, is mas aien; is idivaig is asaig a Ihova ehele Moses.

³⁷ Is tas a Ihova ehele Moses, um ika,

³⁸ Asaig ehele nup Isreel aiek, mika eri ijei nitai tisiantisian irai tid ira apelumai ura irai iji mesese ira ra, um lep ijei nuarin napelumai emilmat an nitai tisiantisian irai tid iran:

³⁹ inyi itai tisiantisian vai caua, va akupu almoi aijaua, um imiehva intas alep asega u Ihova, um imiaiji; um eti ahilek niji itai merit u inliinmopomia, im lep nesganimtamia, et imiahnag caua:

⁴⁰ va akupu imiehva aijaua, um imiaiji intas alep asega unyak, um lep itap vai Atua unyimia.

⁴¹ Ek Atua unyimia ainyak Ihova, kis iknipagki caua ainyak an pece Ijipt, mika ki Atua unyimia ainyak: ek Atua unyimia ainyak Ihova.