Numera 14 - Intas Etipup

Nuarin tas alupas 14.

1 Era asan tas ehti natimi vai intas asuptecnaig. 6 Erau tas upene a Keleb im Josua mika eru ago eropse ra. 11 Et ika a Atua yi auahas ra. 13 Et ugyi Atua a Moses, et ika a Atua inyi eti aru aien. 26 Ja et ika aien eri eti apan an pece iyehki a ilpu atimi asan tas ehti. 36 Era emesmas an nemehe has natimi iji ig eris asan tas has ara vai inpece. 40 Eh auud atimi iji ig era imiisjis ara um ika eri aat ira atimi um imipalea intas o Atua.

¹ Eris ahlaig ijinies natimi asega; eris lep ehtigtaig natimi an nepig iyehki.

² Eris ehti Moses im Eron a nup Isreel asega: eris lep ika ehele rau natimi asega, El ecris emesmas aijama an pece Ijipt el is upene! el ecris emesmas aijama an namasacen inigki el is upene!

³ Is a uri a Ihova par imiapam cama an pece inigki, par emesmas an nedoa? erupu ilpu ohua an nedoa a ilpu ehgama, im ilpu hal unyima: et upene mika ecri lep adumoij pan an pece Ijipt aijama.

⁴ Eris tastas jipe ara, um ika, Intumu ati natimi alupas uja akaija, um adumoij pan an pece Ijipt.

⁵ Erus atpuse a Moses im Eron an nuhup u nup Isreel asega eris asjapicnaig ara.

⁶ Erus lep ahpati napelumai urau a Josua inhal u Nun, im Keleb inhal u Jefunni, erus ahced ra sji ehki arau eris aijidjid inpece ara:

⁷ erus tas arau ehele nup Isreel asega, um ika, Et upene acen inpece iyehki ecris atga iran aijama par aijidjid.

⁸ El et imiacitak caija a Ihova, etpu idim imiapan caija aien an pece iyehki um alupai caija; et idim alupas nidenided im hune iran.

⁹ Jam jim imipalea Ihova aijaua, um jim imtitaig nup uran pece; era idivaig nitai caig imi caija ara: et mun tiih nemda ura, et lep amen a Ihova eheleija: jim imtitai ra.

¹⁰ Ja eris ika natimi asega eri asji rau irai hat. Is lep ehcohos naijorai Ihova anliin neom er asjapicnaig o un an nuhup u nup Isreel asega.

¹¹ Is ika a Ihova ehele Moses, Erupu imiedohalav nyak natimi iji igki um yetpan an nahopan? erupu eti imiisjis ninveijec vai nyak ara um yetpan an nahopan, va niji itai asjaaicnaig asega kis ehvaig ehele ra ainyak?

¹² Ekpu auud ra ainyak an nemehe, um mahrek ira ra, ekpu ika ainyak eri ahes ehelum natimi inyi ahinag um esjilid ira ra.

¹³ Is ika a Moses ehele Ihova, Erupu atahaijeg a nup Ijipt (as idim iknipagki natimi iji igki an nemda unyum aiek ehele ra;)

¹⁴ erupu lep asuptecnaig ara ehele nup uran pece inigki: ak Ihova, eris atahaijeg ara mika an amen aiek ehele natimi iji igki, et ehcohos pam nesganimtam an nuhup ura, um amen napat unyum ijinies ira ra, um lep atga uhup ira ra, an nalucupahas an napat an nadiat, im namillan cap an nepig.

¹⁵ Ja el et atgei natimi iji igki asega aiek et idivaig natimi et tup ethi ache, erupu tastas a nup urai iji pece eris atahaijeg intas vai euc ara, um ika,

¹⁶ Is auatialidi a Ihova par imiapan natimi iji igki an pece is asan tas aktit vaig aien ehele ra, va nitai inigki is atgei ra aien an namasacen.

¹⁷ Ek ugyi euc ainyak mika yi esjilid nemda u Natimarid unyak, et idivaig as asaig aiek, um ika,

¹⁸ Et ago nedo eti auatiemda a Ihova, et esjilid naiheuc o un va atimi, et eti imiehva nauatatimi im nedo imipalea ura aien irai iji mesese, ja etpu idim aru nedo has ura aien, um atijai nedo has u ilpu atmil ura irai ilpu hal ura um yetpan irai ilpu mapora ache.

¹⁹ Ek ugyi euc ainyak mika an jim aru nedo has u atimi iji igki aiek, et idivaig naiheuc esjilid unyum, et idivaig as eti aru aiek ira atimi iji igki an pece Ijipt um imihum pam an nopan inig.

²⁰ Is ika a Ihova, Ek mun eti aru ainyak et idivaig intas unyum:

²¹ ja ek idim umoh ainyak, etpu idim uco, inyi ohua natimi alupas u Ihova an nobohtan asega.

²² Eris almoi natimi alupas unyak, im nedo emda unyak an pece Ijipt im lep an namasacen natimi asega iji igki, ja eris eceten oop nyak ara, um eti atahaijeg nohrak;

²³ va nedo inigki erupu idim eti ecetai inpece inig ara kis tas aktit vaig ainyak ehele ilpu retpora, inyi idim eti ecetai tah ra eris imiedohalav nyak ara:

²⁴ ja is eche inliinmopoi Keleb naheca unyak, is apitac nyak asega aien, va nitai inigki ekpu imiapan yin ainyak an pece is apan iran aien; erupu ohuun a ilpu mapon.

²⁵ (Eris amen a nup Amalek im nup u Kenan an niskanse.) Akumu ahidaig caua aijaua imraig, um apan an namasacen an nefalaig u Injap cap.

²⁶ Is tas a Ihova ehele Moses im Eron, um ika,

²⁷ Ekpu eropse ainyak um yetpan an nahopan vai ilpu atimi auatatimi iji igki era ehti nyak ara? kis atahaijeg intas ehti nyak u nup Isreel ainyak, eris asaig vai nyak ara.

²⁸ Asaig ehele ra mika, Et ika a Ihova, Ek umoh ainyak, et idim uco, ekpu ago vai caua ainyak, et idivaig intas unyimia is yetpam an tikgak:

²⁹ Akupu emesmas an namasacen aijaua asega eris esvi caua, is eteuc inmesese is twente iramia um eled, akis imiedohalav nyak aijaua,

³⁰ akupu idim eti apan aijaua an pece iyehki kis asan tas aktit vaig ainyak, um ika, Akupu amen iran aijaua, Keleb ache inhal u Jefunni, im Josua inhal u Nun.

³¹ Ja ekpu imiapan ilpu hal unyimia ainyak, akis ika aijaua erupu ilpu ohna ara, erupu ecetai inpece ara akis esjum vaig aijaua.

³² Ja akupu emesmas aijaua an namasacen.

³³ Erupu lep atga sjipe an namasacen a ilpu hal unyimia irai mesese inyi forte, um lucsei nimtai nimipalea unyimia, um imihum pan an nopan iyehki akupu emesmas ehni aijaua an namasacen.

³⁴ Akupu lucsei nimtan nedo has unyimia aijaua irai mesese inyi forte, et idivaig nadiat iji ehki akis aijidjid inpece iran aijaua, inyi ehcai inmesese yi ethi nadiat is ethi; akupu lep ato aijaua mika eh mun ehneijid intas upyi asaig unyak.

³⁵ Ek mun asaig ainyak Ihova, ekpu lep ago ainyak irai ilpu atimi has iji igki asega, eris asjapicnaig vai nyak ara: erupu atiih ara an namasacen inigki, erupu lep emesmas iran ara.

³⁶ Natimi iji igki, is abrai ra a Moses par apan um almaijidjid inpece, ja eris par adumoij ara um auahas inliinmopoi atimi asega vai yin, va intas has ura vai inpece,

³⁷ eris emesmas va nemehe an nuhup u Ihova natimi iji ehki, eris imiapaahni intas has vai inpece ara.

³⁸ Ja is umoh a Josua inhal u Nun, im Keleb inhal u Jefunni, irai ra sji ehki eris apan ara par aijidjid inpece.

³⁹ Is asan tas iji igki a Moses ehele nup Isreel asega: eris lep taigtaig alupas natimi.

⁴⁰ Eris auroauro ara um aiji an nuhialeg, um aridjai an lolan nedoon, um ika, Aijama aigki, ecrupu aridjai aijama an nuarin is upyi asaig a Ihova: ecris idim ago nedo has aijama.

⁴¹ Is ika a Moses, Eka a uri aijaua par imipalea intas alep u Ihova? ja inyi eti upene nitai inigki.

⁴² Jim aridjai, et eti amen ehelemia a Ihova; va eri jim auud caua a ilpu atimi tak atimi iramia.

⁴³ Era uhup iramia a nup Amalek im nup u Kenan, akupu lep emesmas aijaua an nedoa: eka atidjimia irai Ihova aijaua, va nitai inigki inyi eti amen a Ihova ehelemia.

⁴⁴ Ja eris imiisjis ara um aridjai an lolan nedoon: ja is amen nelcau an tas alep u Ihova, im lep Moses, an nuarin amen u atimi.

⁴⁵ Eris asuol a nup Amalek im nup u Kenan eris amen ara an lolan nedoon, um auud ra, um ahlo ra, um yetpan Horma.