Numera 13 - Intas Etipup

Nuarin tas alupas 13.

1 Niji idai atimi iji ig er abrai ra mika eri apan ara um ahilek inpece. 17 Ayi tas alep imi ra. 21 Nauritai ura. 26 Intas asuptecnaig ura.

¹ IS tas a Ihova ehele Moses, um ika,

² Namu abrai atimi aiek mika eri aijidjid inpece Kenan inig ara, ek alupai nup Isreel ainyak: akumu abrai natimi aijaua, yi athi um athi ehni, irai iji ahaiji nup Isreel, erumu ilpu atimi alupas ura ara asega.

³ Is abrai ra a Moses an namasacen Peran vai intas alep u Ihova: eris ilpu atimi alupas u nup Isreel ara sji ehki asega.

⁴ Nidai ra ji igki; nan, Samua inhal u Sakur irai ilpu mapoi Ruben.

⁵ Im Sefat inhal u Horai irai ilpu mapoi Simeon.

⁶ Im Keleb inhal u Jefunni irai ilpu mapoi Juta.

⁷ Im Aical inhal u Josef irai ilpu mapoi Isakar.

⁸ Im Osia inhal u Nun irai ilpu mapoi Ifreem.

⁹ Im Paltai inhal u Refu irai ilpu mapoi Benjamin.

¹⁰ Im Catiel inhal u Sotai irai ilpu mapoi Sebulun.

¹¹ Im Catai inhal u Susai irai ilpu mapoi Josef, ilpu ahrei Manasi marom.

¹² Im Amiel inhal u Cemalai irai ilpu mapoi Tan.

¹³ Im Sidur inhal u Maikeel irai ilpu mapoi Eser.

¹⁴ Im Nebai inhal u Vofsai irai ilpu mapoi Naftalai.

¹⁵ Im Ciuel inhal u Mekai irai ilpu mapoi Cat.

¹⁶ Nidai natimi iji ehki ji igki is abraig pan ra a Moses par aijidjid inpece. Is anvi nidai Osia inhal u Nun a Moses par ika Josua.

¹⁷ Is abrai ra a Moses mika eri aijidjid inpece Kenan ara, um ika ehele ra, Akumu apau an nuarin inig et ahes nuritoga iran aijaua um aridjai au lolan nedoon.

¹⁸ Um almoi inpece, par ato; im natimi iji ig era amen iran ara, kit era emda ara ka auatialidi, kit era ahinag ara ka era eti elpat;

¹⁹ im inpece inig era amen iran ara, kit et upene ka et has; im lep niji maliyum era amen iran ara, kit irai eom apelumai, ka irai eom hat;

²⁰ im lep nobohtan inigki, kit et aiyu ka et acen, kit et eteuc nesei iran, ka oʼo? Etmu emda inliinmopomia aijaua, um imiapam nohwai itai an pece. Is opan meto o inhupnai vaine iyehki.

²¹ Eris aridjai ara, um aijidjid inpece nahes vaig an namasacen Sin um yetpan Rihob, an nefalaig yetpan Hemad.

²² Eris aridjai an nuarin inig et ahes nuritoga iran ara, um yetpan Hibron; ehtijis amen eahki a Ahaiman im Seseai, im Talmeai ehtaij mapoi Enak. (Eris uhup um actaig inmaliyum Hibron, ja is wat ti pan itac inmesese is seven eris actaig inmaliyum Soan an pece Ijipt.)

²³ Eris apan ara an niskanse Eskol, um acaldei inrai vaine is ethi is amen iran nigan, erus aijiro iran natimi is ero an nauincai; eris lep apos nohwai pomcranet ara, im nohwai ateg.

²⁴ Nidan nuarin iyehki niskanse Eskol, va nigai vaine iyehki eris acaldei eahki a nup Isreel.

²⁵ Eris aijidjid inpece ira adiat is forte ara, ja par adumoij.

²⁶ Eris lep apan ehele Moses im Eron im nup Isreel asega ara Ketes, an namasacen Peran, um asuptecnaig intas ehele rau, im lep ehele atimi asega, um ehvaig ehele ra nohwai itai an pece.

²⁷ Eris tas ehelen ara, um ika, Ecris apan aijama an pece as abraig pan cama iran aiek, et idim alupas nidenided im hune iran; nohwai itai iran nigki.

²⁸ Ja era emda natimi amen an pece, et arehed irai maliyum ura niji athatahau, et lep esjilid acen: ecris lep almoi ilpu mapoi Enak aijama eahki.

²⁹ Era amen a nup Amalek an pece inig et ahes nuritoga iran: era lep amen a nup u Hed, im nup u Jibus, im nup Emor irai lola edoon: era lep amen a nup u Kenan ubutpotet pan u injap, im lep an nahaijin Jortan.

³⁰ Is ago eropse inliinmopoi atimi a Keleb an nuhup u Moses, um ika, Intumu auroauro akaija um aridjai, um ohuun inpece; inta emda akaija par atimarid iran.

³¹ Ja eris ika natimi iji ehki eris ahced yin, Inta auatialidi akaija par apan um ago nedoa vai nup eahki; era esjilid iraija ara.

³² Eris lep asan tas has ara ehele nup Isreel vai inpece iyehki eris aijidjid ara, um ika, Inpece iyehki ecris atga iran aijama par aijidjid, et idim inpece atleg atimi iran; et lep alupas nohu atimi asega ecris almoi aijama iran.

³³ Ecris almoi ilpu atimi ijinies aijama eahki, nikavaig, ilpu mapoi Enak, eris ahes irai ilpu atimi actal-actal ara: ecris idivaig heled aijama an nuhup unyima im lep an nuhup ura.