Numera 12 - Intas Etipup

Nuarin tas alupas 12.

1 Et acaiji nedo imipalea u Miriam im Eron a Atua, 12 Et mah naleprose u Miriam an nalaigaheni u Moses. 14 Et ika a Atua eri atipagki Miriam an nuarin amen iran u atimi.

¹ ERUS tas ijinies a Miriam im Eron vai Moses va nedo o un, nikavaig, is leh intakata nup u Kus ehgan aien: is idim leh intakata u nup u Kus ehgan aien.

² Erus ika arau, Is idim eti tas a Ihova irai Moses ache; is lep tas aien iramrau. Is atahaijeg a Ihova.

³ Is atimi erop acen a Moses ira atimi asega an nobohtan.

⁴ Is auroauro a Ihova um tas ehele Moses, im Eron, im Miriam, um ika, Ahtijmu apam aijautaij an neom er asjapicnaig o un. Ehtijis apan ahtaij.

⁵ Is asuol a Ihova an nalucupahas an napat um aiji an neucse neom itap, um ahlaig vai Eron im Miriam: erus apan arau.

⁶ Is ika aien, Arumu atahaijeg intas unyak aijaurau: El et amen ehelemia tah naprofeta, ekpu ehcohos pan ehelen ainyak Ihova an nahuumtidec, um tas ehelen an numjeg ahnag o un.

⁷ Et eti uce a Moses naheca unyak, et inveijec aien au neom asega unyak.

⁸ Ekpu tas upene ehelen ainyak an nipjineucsek, um eti asan tas ecsipece; etpu lep almoi nalmui Ihova aien: arus a uri aijaurau par eti imtitaig intas vaig vai Moses naheca unyak?

⁹ Is atavaitap a Ihova vai rau; is lep atga o un aien.

¹⁰ Is lep tiih napat an neom itap; ja is lepros a Miriam, um idivaig sno: is alum Miriam a Eron, is lepros aien.

¹¹ Is ika a Eron ehele Moses, Awe! ak natimi alupas unyak, ek ugyi euc ainyrak mika an jim atijai nedo has iramrau aiek, ecrus ago nedo ahnag aijumrau im nedo maumau an nitai inigki.

¹² Etmu jim idivaig natmas aien, et has nohun au napos yin vaig.

¹³ Is ahlaig vai Ihova a Moses, um ika, Ak Atua, ek ugyi euc ainyak mika an ago cehcehe yin aiek.

¹⁴ Is ika a Ihova ehele Moses, El et agdei nesganimtan a etman, el et ehcamai aien ira adiat inyi seven: uhmu atipagki yin an nuarin amen u atimi ira adiat inyi seven, ja par apitac um lep leh yin.

¹⁵ Eris atipagki Miriam an nuarin amen u atimi ira adiat is seven: eris lep eti atga natimi um imihum pan an nopan iyehki eris lep leh Miriam.

¹⁶ Eris apitac natimi um ahes Haserod, um apan, um atumop an namasacen Peran.