Numera 11 - Intas Etipup

Nuarin tas alupas 11.

1 Eh ahni incap Tabera an nalaigaheni u Moses. 4 Era ahvig mu natimi jam esjum vai manna. 10 Et asan tas ehti a Moses va naminjinai ra o un. 16 Et ahaig nitai ahelwei o un a Atua um ati imi ilpu atimi alupas et sevente. 31 Et imiapam man incara a Atua Kibrod-hateava, jam edemda vai ra.

¹ ERIS tas upoupo natimi, ja is edemda a Ihova: is atahaijeg a Ihova, um atavaitap; is cas incap u Ihova ira ra, um atnamud atimi an nahaijin nuarin amen ura.

² Eris ahlaig vai Moses natimi; is ago nalaigaheni vai Ihova a Moses, ja is par opos incap.

³ Is anvi nidan nuarin iyehki aien par ika Tabera: is cas incap u Ihova ira ra.

⁴ Eris ahvig itai natimi irai taka pece ehele ra: eris lep taig a nup Isreel, um ika, Etpu alupai caija nohu itai umumoh incaija a di?

⁵ Inta imiehva numu iji ehki akaija, intis tup caig akaija an pece Ijipt; im kaukumber, im melon, im liik, im unyun, im carlik:

⁶ ja inta erek akaija an nopan inig: inta eti ecetai tah nitai akaija, manna inigki ache.

⁷ Is idivaig nupsi korianter manna, is lep idivaig nago irai perl nago iran.

⁸ Eris apan natimi, um asjapicnaig, um irara irai mil, ka etcei anliin nelcau, um ahen irai ipjiitai, um ago areto apalapal: eris wat atimtim is idivaig narakei mat natimtim iran.

⁹ Is wat asuol nopoigmul an nuarin amen u atimi an nepig, is lep asuol manna iran.

¹⁰ Is atahaijeg nehtigtaig u atimi a Moses an nepig, natimi asega irai iji eucse eom ura: is edemda alupas a Ihova; is lep ehniv a Moses.

¹¹ Is ika a Moses ehele Ihova, As a uri aiek par imiedohalav naheca unyum? as a uri aiek par eti aiheuc vai nyak, as atijai nitai ahelwei irak aiek, nikavaig, natimi asega iji igki?

¹² Kis eti apos natimi asega iji igki ainyak: eris lep eti ahes ehelek ara, mika an asaig ehelek aiek, um ika, Apos ra an ritum, et idivaig et aminjinaig inhadi o un a etman, um imiapan ra an pece as asan tas aktit vaig aiek ehele ilpu retpora.

¹³ Ekpu leh nohu itai umumoh ainyak eda par alaa natimi iji igki asega? era ehtigtaig ehelek ara, um ika, Alupai cama nohu itai umumoh incama.

¹⁴ Ek eti emda ainyak nechim apos vaig natimi iji igki asega, era ehtipidai nyak ara.

¹⁵ El et ago nedo inigki vai nyak aiek, ek ugyi euc ainyak mika an aiheuc vai nyak aiek, um atgei nyak; vai ki jim almoi nohocred unyak ainyak.

¹⁶ Is ika a Ihova ehele Moses, Asjapicnaig pam ehelek natimi inyi sevente irai ilpu atimi alupas u nup Isreel, na ato ra aiek mika era ilpu atimi alupas u nup Isreel ara, im ilpu atimi esjilid ira ra; um imiapam ra an neom er asjapicnaig o un, mika eri aiji ehelum eahki ara.

¹⁷ Ekpu lep asuol ainyak um tas ehelum eahki: ekpu ika ainyak inyi idivaig inliinmopom inliinmopora ara; erupu asipiaig nohocred unyum va atimi ara, va an jim echim apos aiek ache.

¹⁸ Namu ika aiek ehele atimi, Akumu yecrei caua aijaua vai imraig, akupu lep caig niji itai umumoh aijaua: akis ehtigtaig aijaua an tikgai Ihova, um ika, Etpu alupai cama nohu itai umumoh incama a di? is upene irama an pece Ijipt: va nitai inigki etpu alupai caua nohu itai umumoh a Ihova, akupu lep caig aijaua.

¹⁹ Akupu eti caig aijaua an nadiat inyi ethi, ka nadiat inyi ero, ka nadiat inyi faiv, ka nadiat inyi ten, ka nadiat inyi twente;

²⁰ ja inmohoc inyi ethi, um yetpan an nopan iyehki etpu ehcohos an mun gidjimia, akupu lep amcel vaig aijaua: va nedo unyimia, nikavaig, akis amcel vai Ihova aijaua et amen ehelemia aien, um taig an nuhup o un, um ika, Ecris a uri aijama par udei inpece Ijipt?

²¹ Is ika a Moses, Era siks huntret dausant natimi atga iji igki, ek amen ehele ra ainyak; ja na mun ika aiek, Ekpu alupai ra nohu itai umumoh ainyak, mika eri caig ara an mohoc inyi ethi.

²² Uhmu atgei siip im kurimatau incara mika eri geije iran ara, ka? uhmu lep asjapicnaig numu asega an jap incara mika eri geije iran ara, ka?

²³ Is ika a Ihova ehele Moses, Et eti auatialidi nikmai Ihova: napu almoi aiek kit uhpu ehneijid intas unyak, ka oʼo.

²⁴ Is alau ijo a Moses, um asuptecnaig ehele atimi intas o Ihova, um asjapicnaig natimi is sevente irai ilpu atimi alupas, um ikni ra an neom itap um arehed mihtag.

²⁵ Is asuol an napat a Ihova, um tas ehelen, um alupai ilpu atimi alupas is sevente inliinmopora is idivaig inliinmopon: is wat amen ehele ra a Nesgan Upene, eris efehtas ara, um eti atumop.

²⁶ Ja erus eti asjapicnaig natimi is ero jam amen an nuarin amen u atimi, nidan is ethi Eltat, im nidan is ethi Mitat: is amen ehele rau a Nesgan Upene; erus atimi arau irai ra sji ehki eris aged ra, ja erus eti apan arau an neom itap: erus efehtas arau an nuarin amen u atimi.

²⁷ Is athut pan a intakuras is ethi, um asaig ehele Moses, um ika, Erau efehtas a Eltat im Mitat an nuarin amen u atimi.

²⁸ Is tas a Josua inhal u Nun, naheca u Moses, im intakuras o un, um ika, Ak Moses natimi alupas unyak, namu acaiji rau aiek.

²⁹ Ja is ika ehelen a Moses, Jim auatitai vai rau vai nyak; ek merit ainyak mika eri ilpu profeta u Ihova natimi asega, um lep alupai ra Nesgan Upene a Ihova!

³⁰ Is apan a Moses im ilpu atimi alupas u nup Isreel an nuarin amen u atimi.

³¹ Is ahes ehele Ihova nimtinjap, um imiapam man upene an jap, um imiterimterim an nuarin amen u atimi, et idivaig natga u atimi an nadiat et ethi an nahaijin is ethi, um lep idivaig natga u atimi an nadiat et ethi an nahaijin is eche, um arehed mihtag an nuarin amen u atimi, is ae niji man is idivaig kubit et ero nijinies iran an narasin nobohtan.

³² Eris atidai natimi an nadiat asega iyehki, im nepig asega iyehki, im lep an tak apnyin asega, um asjapicnaig niji man: is asjapicnaig niji iran is ten natimi inig is asjapicnaig tintin aien: eris atijaig asega ara an nuarin amen u atimi um arehed mihtag.

³³ Eris caig nohui man ara, jam eti ahtahni, ja is atavaitap a Atua va atimi, is auud atimi a Ihova an nemehe has.

³⁴ Is anvi nidan nuarin iyehki aien par ika Kibrod-hateava: vaig inig nikavaig, eris atelmoi atimi eahki eris ahvig ohu itai umumoh ara.

³⁵ Eris ahes Kibrod-hateava natimi um yetpan Haserod; um amen Haserod.