Numera 10 - Intas Etipup

Nuarin tas alupas 10.

1 Eri ago intoho irai silver inyi ero par ahlaig va atimi. 11 Era udei Saine a nup Isreel um apan Peran. 14 Natah ira ra an natga ura. 29 Et ugyi Hobab a Moses mika yi jim udei ra. 33 Intas acis yi alwai ra u Moses eris wat imiatga nelcau itap im lep eris wat atise.

¹ IS tas a Ihova ehele Moses, um ika,

² Uhmu ago intoho inyi ero irai silver; uhmu ago an nuarin yi ethi ache: va apu ahlaig va atimi iran aiek, um imiatga atimi iran.

³ Uhu wit ahlai, erumu asjapicnaig pam ehelum natimi asega an neucse neom er asjapicnaig o un.

⁴ El eh ahlai intoho yi ethi ache, erumu asjapicnaig pam ehelum a ilpu atimi alupas irai iji dausant irai up Isreel.

⁵ Aku wit ahlaig emda aijaua, erumu atga atimi an nahaijin inig et ehnan ridjai o un.

⁶ Aku wit aketo aijaua um ahlai emda, erumu atga atimi era amen ara an nahaijin et ehnan nuarin inig et ahes nuritoga iran: erumu ahlai emda ara va natga ura.

⁷ Ja uhu wit ika eri asjapicnaig atimi asega, akumu ahlai intoho aijaua, jam jim ahlai emda.

⁸ Erumu ahlai toho a ilpu hal u Eron, era ilpu atimi ahlap ara; intas alep imi caua nigki im ilpu mapomia irai iji mesese.

⁹ El eka ago nedoa aijaua an pece unyimia vai ilpu atimi tak atimi iramia era ehcerucai caua ara, akumu ahlai toho emda aijaua; etpu lep imiehva caua a Ihova Atua unyimia, uhpu lep imiatamaig caua vai ilpu atimi tak atimi iramia.

¹⁰ Akumu lep ahlai toho aijaua, ira adiat imiacitak unyimia, im niji adiat asjapicnaig unyimia, im niji upyi het unyimia, va niji itai ahlap atnamud unyimia, im niji itai ahlap naaurinig unyimia; par itai imiehva imi caua an nuhup u Atua unyimia: ek Atua unyimia ainyak Ihova.

¹¹ IS wat adiat twentied an mohoc sekunt, an mesese sekunt, eris atipagki napat ijinies an neom itap is amen iran intas alep.

¹² Eris ahes an namasacen Saine a nup Isreel um atga ura; is lep amen napat an namasacen Peran.

¹³ Eris atupun ara um atga is idivaig intas alep u Ihova irai Moses.

¹⁴ Is uhup nitaahlaig u ilpu mapoi Juta irai iji pak ira ra: is lep esjilid a Neeson inhal u Aminatab irai ilpu eucsupo ura.

¹⁵ Is lep esjilid a Nedaniil inhal u Suar irai ilpu eucsupo u ilpu mapoi Isakar.

¹⁶ Is lep esjilid a Elaiab inhal u Hilon irai ilpu eucsupo u ilpu mapoi Sebulun.

¹⁷ Eris alcapdicraig neom itap; eris atga a ilpu mapoi Cerson im ilpu mapoi Mererai, um apos neom itap.

¹⁸ Eris imiatga nitaahlaig u ilpu mapoi Ruben irai iji pak ira ra: is esjilid a Elaisur inhal u Setiur irai ilpu eucsupo ura.

¹⁹ Is esjilid a Silumiel inhal u Surisateai irai ilpu eucsupo u ilpu mapoi Simeon.

²⁰ Is esjilid a Elaiasaf inhal u Tiuel irai ilpu eucsupo u ilpu mapoi Cat.

²¹ Eris atga a ilpu mapoi Kohad, um apos niji itai itap: eris uhup ara sji ehki um athai neom itap, ja eris par apan ara.

²² Eris imiatga nitaahlaig u ilpu mapoi Ifreem irai iji pak ira ra: is esjilid a Elisama inhal u Amihut irai ilpu eucsupo ura.

²³ Is esjilid a Cameliel inhal u Pitesur irai ilpu eucsupo u ilpu mapoi Manasi.

²⁴ Is esjilid a Abaitan inhal u Citeonai irai ilpu eucsupo u ilpu mapoi Benjamin.

²⁵ Eris imiatga nitaahlaig u ilpu mapoi Tan, eris epitpitac ira atimi asega ara: is esjilid a Ahiiser inhal u Amisateai irai ilpu eucsupo ura.

²⁶ Is esjilid a Paciel inhal u Okran irai ilpu eucsupo u ilpu mapoi Eser.

²⁷ Is esjilid a Ahaira inhal u Inan irai ilpu eucsupo u ilpu mapoi Naftalai.

²⁸ Is um uce natga u nup Isreel irai iji pak ira ra, eris wat atga ara.

²⁹ Is tas a Moses ehele Hobab, inhal u Riuel nup u Mitian, etmai ehgai Moses, um ika, Ecra apan aijama an nuarin iyehki is tas vaig a Ihova, um ika, Ekpu alupai caua ainyak: ahced cama aiek, ecrupu ago nedo upene vai euc aijama: is idim asan tas upene a Ihova vai nup Isreel.

³⁰ Is ika ehelen aien, Inki eti apan ainyak; ja ekpu apan ainyak an pece unyak, ehele ilpu atimi ehpan irak.

³¹ Ja is ika aien, Ek ugyi euc ainyak mika an jim udei cama aiek; na idim ato niji uarin atumop iran an namasacen aiek, mika an idivaig nesganimtama aiek.

³² El et ahced cama aiek, nedo upene asega inig etpu ago vai cama a Ihova, ecrupu idim ago vai euc aijama.

³³ Eris ahes an nedoon u Ihova ara, um atga ira adiat is eseij: is lep uhup ira ra ira adiat is eseij nelcau is amen intas alep u Ihova nan, par ahilek nuarin atumop iran imi ra.

³⁴ Is amen napat u Ihova ijinies ira ra an nadiat, an nahes ura an nuarin atumop ura.

³⁵ Eris wat imiatga nelcau iyehki; is ika a Moses, Ak Ihova, atidai aiek, erumu terimterim a ilpu atimi tak atimi iram; erumu lep aha a ilpu atimi amcel vai euc an nuhup unyum.

³⁶ Eris wat atise, is ika aien, Ak Ihova, namu lep adumoij pam aiek ehele niji dausant et ahinag u nup Isreel.