Nitai ehvaig 9 - Intas Etipup

Nuarin-tas alupas 9.

¹ IS lep ahlai intoho o un a nagelo faiv, kis ecetai inmoijeuv is ethi an nohatag ainyak, is asuol an nobohtan: eris alupai yin nitai asalgei intapanes an nehpanitai ineig er eti ecetin nehni o un.

² Is asalgei intapanes an nehpanitai aien er eti ecetin nehni o un; is ahlahos nadaran cop an nehpanitai, is idivaig nadarai suata; is aupat nagesega, um acnapnes nauanohatag, va nadaran cop an nehpanitai.

³ Eris ahes an nadaran cop inheled an nobohtan: eris alupai ra nemda, et idivaig nemda u nispeuv an nobohtan.

⁴ Eris asaig ehele ra mika eri jim auahas nefelelicai an nobohtan, ka tah nitai mat, ka tah incai; jai ilpu atimi iji ehki ache is eti amen nitai asjaaicnaig u Atua irai ipjiimtara.

⁵ Eris alupai ra mika eri jim atgei ilpu atimi iji ehki, jam auoh ohocred ra an mohoc inyi faiv: nohocred ura neigki, is idivaig nohocred u natimi ineig is ahcai yin a nispeuv.

⁶ An naopan iyehki erupu ahilek inmas atimi, jam eti ecetai; erupu merit ara inmasvaig, ja inyi aha vai ra inmas.

⁷ Eris idivaig hors eris yecrei ra va nedoa inheled iji ehki; is amen irai idjinira niji itai is idivaig korona colt, is lep idiva nesganimta atimi nesganimtara.

⁸ Is idivaig numri nidjini takata nalau ira ra, is lep idivaig neijei laion neijera.

⁹ Is idivaig inhat niji itai atapanes inritira; um idivaig nohrai itai atga iji ehki, et imyiathut pan u nedoa hors et ahinag, nohrai ehpara.

¹⁰ Is idivaig narapacal u nispeuv narapacal ura, is amen nij va atimi ira arapacal ura, eris emda ara nauahas atimi vaig irai mohoc is faiv. Is eteuc natimarid ura, et agelo aien an nehpanitai er eti ecetin nehni o un, nidan Hibru Abatton, jai nidan an tas Crisi Apollyon [Natimi auahas itai].

¹² Is ti pan itac nohocred is ethi; ja etpu lep yetpam nohocred inyi ero an tak aopan.

¹³ Is lep ahlai intoho o un a nagelo is ethi is eche, kis atahaijeg nohran tah is ethi ainyak, is ahes irai epat is for an nefata colt an nuhup u Atua,

¹⁴ is ika ehele nagelo iyehki is apos intoho o un aien, Ahiyi nagelo et for aiek, er arore ra an nofowai alupas Yufretes.

¹⁵ Eris ahiyi nagelo is for, eris ago ra va aur inyi ethi, im nadiat inyi ethi, im inmohoc inyi ethi, im inmesese inyi ethi, mika eri atgei nahaiji atimi inyi ethi an nahaijin et eseij.

¹⁶ Eris tu huntret milyon a ilpu eucsupo iji ehki eris ateuc irai hors ara: kis atahaijeg ainyak nesvi ra vaig.

¹⁷ Kis ecetai niji hors ainyak, an nahuumtidec unyak, im lep ra eris ateuc ira ra ara, is amen ira ra nitai atapanes ritira is idivaig incop, im inhat cop, im narekwas: is idivaig nidjini laion nidjini hors ura; is ahes irai ipjieucsera incop, im nadaran cop, im narekwas.

¹⁸ Eris atgei nahaiji atimi is ethi an nahaijin is eseij an nitai erahki, nikavaig, incop, im nadaran cop, im narekwas, is ahes irai ipjieucsera.

¹⁹ Et amen nemda ura irai ipjieucsera im lep irai ilauera: is idivaig narapacal u nimyiv nilauera, is amen nidjinin iran, eris auahas itai irai ilauera ara.

²⁰ Eris eti adumoij anliinmopura va nauritai irai ikmara natimi iji ehki, eris eti atgei ra nitai has erahki, mika eri jim alaigaheni ara vai ilpu atmas, im niji atmassimai colt, im silver, im bras, im hat, im nauicai; et ehka vai ra nalum itai vaig, um ahgei itai vaig, um atgavaig:

²¹ eris eti lep adumoij anliinmopura ara va natgei atmas ura, im naraces, im ingaijid, im nehneg itai.