Nitai ehvaig 8 - Intas Etipup

Nuarin-tas alupas 8.

¹ IS wat atipagki nitai atapanes seven a Lam, is eigpa an nohatag is idivaig nahaiji aur is ethi.

² KIS ecet ilpu agelo is seven iji eigki ainyak, era aiji ara an nuhup u Atua: eris alupai ra intoho is seven.

³ Is lep apam a nagelo is ethi is eche, um aiji u nefata, is apos nipjicolt aien; eris alupai yin nitai auanipin upene is alupas, mika yi ati aien ira alaigaheni u ilpu atimi upene asega an nefata colt iyehki is amen an nuhup u dorona.

⁴ Is ahes an nikmai nagelo nadaran nitai auanipin upene, um tup ethi ache pan ira alaigaheni u ilpu atimi upene, um aridjai an nuhup u Atua.

⁵ Is leh nipjinitai iyehki a nagelo, um leh incop an nefata um ati iran, is um ohua, um ethaigse an nobohtan: is eteuc nohrai itai, im inmunuka, im nawainapit, im nomoi.

⁶ Eris yecrei ra a ilpu agelo is seven iji ehki, eris apos intoho is seven ara, mika eri ahlai.

⁷ Is ahlai intoho o un a nagelo uhup, ja is par apitac incaupda hat im incop pelaig an ja, eris erekhaigse an nobohtan, is acescas nahaiji cai is ethi an nahaijin is eseij, is lep atah nefelelicai mat asega.

⁸ Is lep ahlai intoho o un a nagelo tu, eris ethaigse an jop nitai is idivaig nedoon alupas is alaualau incop iran: is idivaig inja nahaijin jop is ethi an nahaijin is eseij;

⁹ eris emesmas nahaiji iji itai umumoh an jop is ethi an nahaijin is eseij; eris auahas nahaiji elcau is ethi an nahaijin is eseij.

¹⁰ Is lep ahlai intoho o un a nagelo dri, is ahes an nohatag inmoijeuv alupas um asuol, is alauma um idivaig incop alahala, is eropse an nahaiji ofowai is ethi an nahaijin is eseij, im lep irai imtaiwai ahlau ohua;

¹¹ nidan moijeuv iyehki Nitai acen, is um acen nahaiji wai is ethi an nahaijin is eseij; eris lep emesmas natimi is ahinag vai inwai, va nitai ineig, nikavaig, is acen inwai.

¹² Is lep ahlai intoho o un a nagelo for, eris auud nahaijin nagesega is ethi an nahaijin is eseij, im nahaijin mohoc is ethi an nahaijin is eseij, im nahaijin moijeuv is ethi an nahaijin is eseij; is aupat nahaijin is ethi an nahaijin is eseij iran, is eti lah inuarin-nadiat is ethi an nuarin-nadiat is eseij, um lep ucce nepeig.

¹³ Kis almoi ainyak, um atahaijeg nagelo is ethi is ae aien juju an nauanohatag, um ahlaig ijinies, um ika, Auwe, auwe, kaiheuc va atimi era amen an nobohtan ara, va nohrai intoho et eche u ehtaij agelo et eseij, ehtijpu ahlai ahtaij!