Nitai ehvaig 6 - Intas Etipup

Nuarin-tas alupas 6.

¹ IS wat atipagki nitai atapanes is ethi a Lam, kis almoi ainyak, um atahaijeg tah is ethi irai iji itai umumoh is for iji ehki, is idivaig inmunuka nohran, is ika aien, Apam aiek, um almoi.

² Kis almoi ainyak, um ecetai hors ahi is ethi: aien is ateuc iran aien, is apos nefana aien; eris lep alupai yin korona is ethi: is apan aien um ahau atimi, mika yi esjilid nahau ra.

³ Is wat lep atipagki nitai atapanes tu aien, kis atahaijeg nitai umoh tu ainyak, is ika aien, Apam aiek, um almoi.

⁴ Is lep apan hors is eche is cop: eris alupai yin is ateuc iran aien, mika yi atipagki neigpa an nobohtan, mika eri atgei jipe ra ara: eris alupai yin nauitoga alupas.

⁵ Is wat lep atipagki nitai atapanes dri aien, kis atahaijeg nitai umoh dri ainyak, is ika aien, Apam aiek, um almoi. Kis almoi ainyak, um ecetai hors apeig; aien is ateuc iran aien, is apos nitai asjaaicnaig an nikman aien.

⁶ Kis atahaijeg nohran tah an niblai iji itai umumoh is for iji ehki ainyak, is ika, Etmu imtai hwiit inuari-mune et ethi an nipjinitai et ethi, um imtai barle inuari-mune et ethi an nipjinitai et eseij; um jim auahas nidi oliv im nidi vaine.

⁷ Is wat lep atipagki nitai atapanes for aien, kis atahaijeg nohran nitai umoh for ainyak, is ika aien, Apam aiek, um almoi.

⁸ Kis almoi ainyak, um ecetai hors yag: nidan natimi iyehki is ateuc iran Inmas, is apitac yin Umatmas. Eris alupai rau nemda an nuarin et ethi irai uarin et for an nobohtan, mika eru atgei atimi an nauitoga, im numlaig has, im nemehe has, im lep niji itai aleg an nobohtan.

⁹ Is wat lep atipagki nitai atapanes faiv, kis ecetai nesga atimi ainyak itlian nefata, eris atgei ra vai intas o Atua, im lep vai intas asuptecnaig ura:

¹⁰ eris ahlaig ijinies ara, um ika, Ak Natimarid, na upene aiek um inivaijec, napu ahilek aiek an nahopan, um aru inmas unyima ira ra era amen an nobohtan ara?

¹¹ Eris alupai ra asega apelumai ahi; eris lep asaig ehele ra, mika eri atumop ipjidipjid ara, um imyihum pan an naopan iyehki, uhpu asjapicnaig ehni ilpu atimi era ehraheca ara, im lep ilpu etoara, uhpu lep atgei ra etpu tup ethi ache.

¹² Is wat lep atipagki nitai atapanes siks aien, kis almoi ainyak; is idim eteuc nomoi alupas; is apeig nagesega, um idivaig napelumai alau irai itai, is lep idivaig inja inmohoc;

¹³ is ehlelelse an nobohtan niji moijeuv an nohatag, et idivaig et ehlelel nohoai ateg mat, an naihoivaig nimtinjop alupas:

¹⁴ is apohod nohatag, um idivaig inuari-peper er asvi; eris apan an taka uarin niji lola edoon, im niji hakli-pece asega.

¹⁵ Eris atpuli irai mai tan, im lep irai mai ij irai lola edoon, a ilpu atimarid an nobohtan, im ilpu atimi alupas, im ilpu atimi ikni itai, im ilpu atimi esjilid irai ilpu eucsupo, im ilpu atimi emda, im ilpu aheca asega, im ilpu atimi eti aheca asega;

¹⁶ um ika ehele lola edoon im nij, Eropse irama, um adenai cama va nesganimtan et ateuc aien a dorona, im lep vai intavaitap u Lam:

¹⁷ et mun yetpam nadiat alupas u intavaitap o un; inyi emda a di naijivaig an nuhup o un?