Nitai ehvaig 5 - Intas Etipup

Nuarin-tas alupas 5.

¹ KIS ecetai nitasvitai is ethi ainyak an matan is ateuc aien a dorona, eris aged inliin im lep itac, is amen nitai atapanes is seven iran.

² Kis lep ecet nagelo emda is ethi ainyak, is ahlaig aien, is ijinies nohran, um ika, Et upene a di nalgeivaig nitasvitai ineigki, um iknipagki itai atapanes iran?

³ Ja is eti emda tah an nohatag, im nobohtan, im lep ithan nobohtan, nalgeivaig nitasvitai iyehki, um almoi.

⁴ Kis taig alupas ainyak, va nitai ineig, nikavaig, eris eti ecet tah is upene aien nalgeivaig nitasvitai iyehki, um esvi, ka almoi.

⁵ Ja is ika ehelek tah is ethi irai ilpu atimi tas alep, Jim taig aiek, et idim emda a Laion irai ilpu mapoi Juta, et mapoi Tevit aien, nalgeivaig nitasvitai, um iknipagki itai atapanes et seven iran.

⁶ Kis lep ecetai ainyak, is idim aiji juju an niblai dorona im niji itai umumoh is for iji eigki im lep ilpu atimi tas alep, Lam is ethi, is idivaig eris atgei yin, is seven nepat o un, um seven nesganimtan; Nesgai Atua et seven ji eigki, er imyiterimterim an nobohtan asega.

⁷ Is apan aien, um leh nitasvitai iyehki an matan is ateuc a dorona.

⁸ Is wat leh nitasvitai iyehki aien, eris eropropse an nuhup u Lam niji itai umumoh is for iji ehki, im ilpu atimi tas alep is twente for, eris apos niji harp ara asega, im niji ipjicolt is ohua nitai auanipin upene iran; niji ataigaheni u ilpu atimi upene ji eigki.

⁹ Eris acesaces nohranitai mat ara, um ika, Na upene aiek inlehvaig nitasvitai ineigki, um iknipagki itai atapanes iran; eris idim atgei euc, as auarimtama an ja iram aiek vai Atua ehele nup urai iji pece asega, im niji tas, im niji elcau, im niji imnim;

¹⁰ as lep ikni cama aiek, mika ecri ilpu atimarid aijama im ilpu atimi ahlap u Atua unyima: ecrupu esjilid an nobohtan aijama.

¹¹ Kis almoi ainyak, um ahgei nohrai ilpu agelo is ahinag eris arahed a dorona ara, im niji itai umumoh iji ehki, im ilpu atimi tas alep, eris ehcahinag ten dausant ara, um ehcahinag dausant;

¹² eris ahlaig ijinies ara, um ika, Et upene a Lam ineig, eris atgei yin, inlehvaig natimi alupas o un, im niji itai ikni, im narapakau, im nemda, im nimyiahpas, im naunau, im naaurineig.

¹³ Kis ahgei niji itai asega eris ago ainyak, et amen an nohatag, im nobohtan, im itlian nobohtan, im injop, im niji itai asega amen iran, eris ika ara, Etmu eteuc naaurineig, im nimyiahpas, im naunau, im nemda, vai yin et ateuc aien a dorona, im lep vai Lam, irai iji mesese.

¹⁴ Eris ika niji itai umumoh is for iji ehki, Emen. Eris eropropse a ilpu atimi tas alep is twente for, um alaigaheni vai yin et umoh aien irai iji mesese.