Nitai ehvaig 3 - Intas Etipup

Nuarin-tas alupas 3.

¹ NAMU aged intas aiek imi nagelo an nakalasia Sartis, um ika, Et asan tas iji eigki aien, et amen ehelen Nesgai Atua et seven, im inmoijeuv et seven, um ika, Ek ato niji auritai unyum ainyak, er ika na umoh aiek, ja nai mas aiek.

² Namu aiji aiek, um ago emda nitai iji eigki et amen ehelum, jam ubutpotet u inmasvaig: ek mun ecetai ainyak, nikavaig, et eti upene asega niji auritai unyum an nuhup u Atua.

³ Namu imyiehva nedo unyum aiek as wat leh intas-upene aiek um atahaijeg vaig, um apol upene iran, um adumoij anliinmopom. El et eti aiji aiek, ekpu ham ehelum ainyak et idivaig natimi ehneg itai, napu eti ato aiek inuarin-nadiat ineig ekpu ham ehelum ainyak.

⁴ Ja era amen ehelum Sartis natimi et eti elpat, eris eti emeig ira apelumai ura ara; erupu edo ehelek ara ira apelumai ahi; era idim upene ara.

⁵ Aien et esjilid aien, uhpu aso yin ira apelumai ahi, ekpu eti ohpodohpod nidan ainyak an nitasvitai va nitai umoh iran, ja ekpu asuptecnaig nidan ainyak an nuhup u Etmak, im lep an nuhup u ilpu agelo o un.

⁶ Aien et eteuc intikgan aien, etmu atahaijeg intas iji eigki aien, et asaig a Nesgan Upene ehele ekalasia.

⁷ NAMU aged intas aiek imi nagelo an nakalasia Filatelfea, um ika, Et asan tas iji eigki aien et upene aien, aien et inivaijec aien, aien et amen ehelen “kii u Tevit, aien et asalgei intapanes aien, ja et eti atapanes tah natimi; um lep atapanes, ja et eti asalgei tah natimi,” um ika,

⁸ Ek ato niji auritai unyum ainyak: ek mun idim ati an nuhup unyum ainyak neucse neom et asalgei, ja et eti emda tah natimi natapanesvaig iran: na wat eti emda aiek, jam imyiaiji intas unyak, um eti ateri nidak.

⁹ Ekpu idim abrai nahaiji ra sji eigki ainyak era ilpu atimi alaigaheni vai Satana ara, era ika ara era upu Jutaia, ja oʼo, era ahcil ara; ekpu abrai ra ainyak, mika eri apam ara um atpuse u neduom, um ato mika et aiyu inliinmopok ainyak vai euc.

¹⁰ As aminjinai intas va nedo eti auatiemda unyak aiek, va nitai ineigki ekpu aminjinai euc ainyak, an naopan iyehki uhu wit ohocred atimi asega, par oop ra era amen an nobohtan ara.

¹¹ Ekpu idim auroauro ainyak um ham: namu asjiraig ipjin nitai ineig aiek, et amen ehelum, vai yi jim atipagki korona unyum tah natimi.

¹² Aien et esjilid aien, ekpu ati yin ainyak, mika yi oboatau aien an neom ahlap u Atua unyak; inyi ti lep alau ijo aien: ekpu aged iran ainyak nidai Atua unyak, im nidai inuarin-pece u Atua unyak, Jerusalem mat neigki, et ahes ehele Atua unyak an nohatag, um asuol sepam: ekpu lep aged iran nidak mat ainyak.

¹³ Aien et eteuc intikgan aien, etmu atahaijeg intas iji eigki aien, et asaig a Nesgan Upene ehele ekalasia.

¹⁴ NAMU aged intas aiek imi nagelo an nakalasia Leotesia, um ika, Et asan tas iji eigki a Emen, natimi asuptecnaig upene um inivaijec, aien is upyi eteuc aien irai iji itai is ago a Atua, um ika,

¹⁵ Ek ato niji auritai unyum ainyak, nikavaig, na eti eyueyu aiek, um eti ehri: ek merit ainyak mika an eyueyu aiek, ka ehri.

¹⁶ Ekpu alo iram ainyak, va nitai ineig, nikavaig, na aheyueyu aiek, jam eti eyueyu, um eti ehri.

¹⁷ Na ika aiek, Ek idim ikni itai ainyak, um ahinag inpadiaig unyak, um eti ihki natimi ainyak; jam eti ato, nikavaig, na ohocred aiek, um eti esga natimi, um ihki natimi, um aupat nesganimtam, um tup atga.

¹⁸ Vanitai ineigki ek ika ehelum ainyak, namu auanimtai colt ineig aiek vai nyak er ago upene an cop, va apu ikni itai aiek; im lep apelumai ahi, va apu aso euc aiek iran, va uhpu eti ecetai intup atga unyum, nitai ehcamai vaig; um lep aspi nesganimtam aiek an nitai aspi esgaiimta atimi, va apu alum itai aiek.

¹⁹ Ara asega et aiyu inliinmopok ainyak vai ra, ek acaiji ra ainyak, um ated ra: va nitai ineigki namu emda aiek, um adumoij anliinmopom.

²⁰ Ek idim aiji ainyak u intapanes, um etcetcei: el et atahaijeg nohrak tah, um asalgei intapanes, ekpu han anliin neom ainyak ehelen, um hag ehelen; etpu lep hag ehelek aien.

²¹ Aien et esjilid aien, ekpu alupai yin ainyak, mika yi ateuc ehelek aien a dorona unyak, et idivaig kis lep esjilid ainyak, um ateuc ehele Etmak a dorona o un.

²² Aien et eteuc intikgan aien, etmu atahaijeg intas iji eigki aien, et asaig a Nesgan Upene ehele ekalasia.