Nitai ehvaig 22 - Intas Etipup

Nuarin-tas alupas 22.

¹ IS ehvaig ehelek nofowai ahida aien is wai umoh iran, is wela upene um idivaig nitai naunau, is ahes a dorona u Atua im lep u Lam.

² Is eteuc incai umumoh vaig juju an niblan nefalaig im nofowai, an nahaijin im lep nahaijin, is eteuc niji ohoan is twelv, jam acheiachei sjipe, is oho urai iji mohoc: is eteuc nerincai iyehki par ago cehcehe nup urai iji pece.

³ Inyi ti amen tah nitai auahas atimi: ja etpu amen iran dorona u Atua im lep u Lam; erupu alaigaheni vai yin a ilpu aheca o un:

⁴ erupu almoi nesganimtan ara; etpu lep amen nidan irai ipjiimtara:

⁵ inyi ti epeig eahki; inyi ti lep upene incop alahala vai ra, ka naijoran nagesega; era lah ara vai naijorai Atua Natimarid: erupu atimarid ara irai iji mesese.

⁶ Is um ika aien, Et inivaijec intas iji eigki, um upene nateuc iran vaig: is abrai nagelo o un a Natimarid Atua u ilpu profeta upene, mika yi asuptecnaig ehele ilpu aheca o un aien nitai iji eigki eris ika uhpu ago tupko.

⁷ Ekpu idim auroauro ainyak um ham: et mun ahesmoij aien et aminjinaig tas ahidan tas iji eigki aien an nitasvitai ineigki.

⁸ Kis ecetai nitai iji eigki ainyak Joanes, um atahaijeg. Kis wat atahaijeg ainyak um ecetai, kis eropse ainyak, mika ki alaigaheni an nuhup u neduei nagelo iyehki is ehvaig nitai iji eigki ehelek aien.

⁹ Is um ika ehelek aien, Jim ago nedo ineigki aiek, intau ehraheca u Atua akaijau, ek tah ainyak irai ilpu etoam ilpu profeta, im lep ra era aminjinaig tas iji eigki an nitasvitai ineigki: alaigaheni vai Atua aiek.

¹⁰ Is um ika ehelek aien, Jim atapanes tas ahidan tas iji eigki aiek an nitasvitai ineigki: et ubutpotet u naopan o un.

¹¹ Aien et eti atoh nedo o un aien, inyi idim eti atoh nedo o un aien: aien et has aien, inyi idim has aien: aien et atoh nedo o un aien, inyi idim atoh nedo o un aien: aien et upene aien, inyi idim upene aien.

¹² Ekpu idim auroauro ainyak um ham; et lep ehelek nimtan unyak imi atimi, mika ki alupai ra asega ainyak yi idivaig nauritai ura:

¹³ ek Alfa ainyak um Omeca, natupun u itai im nehni u itai, natimi uhup im natimi apitac.

¹⁴ Era mun ahesmoij ara era imyiaiji tas alep o un ara, va erupu leh incai umumoh vaig ara, um atga irai eucse athatahau, um apan an nuarin-pece iyehki.

¹⁵ Erupu amen itac a ilpu atimi auarobotpotedo, im ilpu atimi araces, im ilpu atimi ago ingaijid, im ilpu atimi atgei atmas, im ilpu atimi alaigaheni vai ilpu atmas, im lep atimi asega era imyiarakei intas ahcil ara um asaig.

¹⁶ Ek mun abrai nagelo unyak ainyak Iesu par asuptecnaig ehelemia nitai iji eigki vai ekalasia: kis ahes irai Tevit ainyak, um mapon, um moijeuv efehcas et chcohos an nathut u nadiat.

¹⁷ Et ika a Nesgan Upene, im lep natahaig ineig et leh natumyu un aien, Namu ham aiek. Etmu lep ika aien et atahaijeg aien, Namu ham aiek. Etmu ham aien et ahvig wai aien. Etmu lep tup umnyi inwai umoh vaig aien et merit vaig aien.

¹⁸ Ek idim asuptecnaig ainyak ehele atimi asega, era atahaijeg tas ahidan tas iji eigki ara an nitasvitai ineigki, mika, El et tup ispun ati tah intas tah natimi irai tas iji eigki, etpu atijai niji ohocred iji eigki iran a Atua, eris aged an nitasvitai ineigki:

¹⁹ el et atipagki tah intas tah inatimi irai tas ahidan tas iji eigki an nitasvitai ineigki, etpu atipagki inuarin o un an cai umoh vaig a Atua, im lep an nuarin-pece itaup, im lep irai itai iji eigki eris aged an nitasvitai ineigki.

²⁰ Aien et asuptecnaig nitai iji eigki aien, et ika aien, Maiya, ekpu auroauro ainyak um ham: Emen. Etmu idim ucco, namu apam aiek, ak Iesu Natimarid.

²¹ ETMU amen ehelemia asega naiheuc o Iesu Kristo Natimarid uja. Emen.