Nitai ehvaig 21 - Intas Etipup

Nuarin-tas alupas 21.

¹ KIS ecetai nohatag mat ainyak im nobohtan mat: is apan nohatag uhup im nobohtan uhup; is lep ti injop.

² Kis lep ecetai Jerusalem mat ainyak Joanes, inuarin-pece itaup, is ahes ehele Atua an nohatag um asuol, eris ago upene et idivaig natahaig ineig eh yecrei yin va natidai o un.

³ Kis lep atahaijeg nohran ijinies ainyak, is ahes an nohatag, um ika, Et idim amen neom u Atua ehele atimi, etpu lep amen ehele ra aien, erupu ilpu atimi o un ara, etpu amen ehele ra a Atua, etpu Atua ura aien:

⁴ etpu yiri nidi nimtara asega a Atua; inyi ti lep eteuc inmas, im nehteigtaig, im intaig, inyi ti lep eteuc nohocred: et mun ti niji itai itu.

⁵ Is tas aien is ateuc a dorona, um ika, Ek idim ago mat niji itai asega ainyak. Is ika ehelek aien, Aged aiek: et inivaijec intas iji eigki, um upene neteuc iran vaig.

⁶ Is um ika ehelek aien, Eh mun ago ehni: ek Alfa ainyak um Omeca, natupun u itai im nehni u itai. Aien et ahvig wai aien, ekpu aiheuc vai yin ainyak, um aluman inwai an nehpan wai umoh.

⁷ Aien et esjilid aien, etpu ohuun niji itai asega aien; ekpu Atua o un ainyak, etpu lep hal unyak aien;

⁸ jai ilpu atimi auatialidi, im ilpu atimi imyiisjis nahcil, im ilpu atimi ago nedo er amcel vaig, im ilpu atimi atgei atmas, im ilpu atimi ago ingaijid, im ilpu atimi araces, im ilpu atimi alaigaheni vai ilpu atmas, im ilpu atimi asan tas ahcil asega, erupu amen ara an netpin et alauma vai incop im narekwas: inmas epitpitac neigki.

⁹ Is ham ehelek tah is ethi irai ilpu agelo is seven iji ehki, is amen ehele ra nipji itai is seven, is ohua an niji itai ohocred vaig apitao is seven, um tas ehelek, um ika, Apam aiek igcaki, ekpu ehvaig ehelum ainyak natahaig iyehki, ehgai Lam.

¹⁰ Kis wat ahuumtidec ainyak, is imyiapan nyak aien an nedoon alupas um ijinies, um ehvaig ehelek inuarin-pece alupas iyehki, Jerusalem itaup, is ahes ehele Atua an nohatag um asuol,

¹¹ is amen iran inlah u Atua: is idivaig maumau u unhat esjilid inaunau iran, is idivaig jasper, um lah et idivaig nitai naunau;

¹² is eteuc iran nathatahau alupas um ijinies, is twelv neucse nathatahau iran, eris amen u eucse athatahau a ilpu agelo is twelv, eris lep aged iran nidai ilpu hal o Isreel is twelv:

¹³ is eteuc neucse athatahau is eseij an ridjai o un; um eteuc neucse athatahau is eseij an narutu; um lep eteuc neucse athatahau is eseij an nuritoga atamaig, um lep eteuc neucse athatahau is eseij an nette o un.

¹⁴ Is eteuc inhat alupas is twelv itlian nathatahau, eris aged iran nidai ilpu apostolo o Lam is twelv.

¹⁵ Aien is tas ehelek aien, is apos nauanieg colt aien, mika yi asjaaicnaig an nuarin-pece, im nathatahau iran, im lep neucse athatahau iran.

¹⁶ Et for nahaijin nuarin-pece iyehki, jam tup apapa pikgaig: is asjaaicnaig an nuarin-pece aien an nauanieg, is fiftiin huntret mail: et tup apapa pikgaig nahaijin et for, im nijinies iran.

¹⁷ Is asjaaicnaig an nathatahau iran aien, is wun huntret im forte for nilpu nikman, et idivaig nasjaaicnaig u natimi, is asjaaicnaig iran a nagelo.

¹⁸ Eris acta nathatahau iran irai jasper; is colt esjilid inuarin-pece iyehki, um idivaig nitai naunau esjilid.

¹⁹ Eris ago upene nededuon nathatahau irai iji hat esjilid asega: is jasper inhat alupas uhup; um safir inhat tu; um kalsetone inhat dri; um emeralt inhat for;

²⁰ um sartoniks inhat faiv; um sarteus inhat siks; um krisolait inhat seven; um beril inhat eet; um topas inhat nain; um kraisoprasus inhat ten; um jesind inhat eleven; um amedist inhat twelv.

²¹ Is tapanes perl is twelv intapanes is twelv; nikavaig, is perl is ethi intapanes is ethi iran asega: is colt esjilid nefalaig an nuarin-pece, um lah et idivaig nitai naunau.

²² Kis eti ecetai neom ahlap eahki ainyak; et eom ahlap iran a Natimarid Atua emda acen, im lep Lam:

²³ is eti upene va nuarin-pece iyehki nagesega, im lep inmohoc, mika yi lah vaig; is lah va naijorai Atua, um lep itai lah iran a Lam.

²⁴ Erupu atga an lah iran a nup urai iji pece er imyiatamaig ra: era lep imyiapan natimi alupas ura iran, im niji itai upene ura, a ilpu atimarid an nobohtan.

²⁵ Eri ti atapanes intapanes iran an nadiat: va nitai ineig, nikavaig, inyi ti lep epeig eahki.

²⁶ Uhpu imyiapan eahki niji itai upene, im niji itai esjilid, u nup urai iji pece.

²⁷ Inyi ti apan iran tah nitai has, ka tah et ago nitai er amcel vaig, ka tah natimi asan tas ahcil; ara sji eigki ache eris aged ra an nitasvitai u Lam va nitai umoh iran.