Nitai ehvaig 20 - Intas Etipup

Nuarin-tas alupas 20.

¹ IS lep ecet nagelo is ethi ainyak, is ahes an nohatag aien um asuol, is apos kii aien uri nehpanitai ineig er eti ecetin nehni o un, im lep natauhat alupas, an nikman.

² Is arop irai nimyiv aien, nimyiv itu iyehki, et Tiapolo aien, im Satana, um arore yin irai mesese is wun dausant,

³ um ethaigse yin an nehpanitai ineig er eti ecetin nehni o un, um atapanes iran, um ati nitai asjaaicnaig iran, vai yi jim lep imyiahnag nup urai iji pece aien, um imyihum pan naopan iyehki uhu wit ti pan itac inmesese inyi wun dausant; ja par apitac um ahiyi ipjidipjid yin.

⁴ Kis lep ecetai niji dorona ainyak, eris ateuc iran ara, eris ikni ra mika eri asuptecnaig nimtan imi atimi ara: kis lep almoi nesga atimi iji eigki ainyak eris auud yamud idjinira va nasuptecnai Iesu im lep vai intas o Atua; im lep ra sji eigki eris eti alaigaheni va nitai aleg ara, ka nalmun; eris eti leh nitai asjaaicnaig o tin irai ipjiimtara ara, ka nikmara; eris umumoh ara, um atimarid, ehele Kristo irai mesese is wun dausant.

⁵ Ja eris eti lep anusjai nahaiji atimi emesmas is aled, um imyihum pan naopan iyehki is ti pan itac inmesese is wun dausant. Nusjai uhup u atimi neigki.

⁶ Et mun ahesmoij aien um lep upene, et imtaam nusjai aien an nusjai uhup u atimi: inyi ti lep auahas ra sji eigki inmas apitac, erupu ilpu atimi ahlap u Atua ara im lep u Kristo, um atimarid ehelen irai mesese inyi wun dausant.

⁷ Et wit ti pan itac inmesese inyi wun dausant, uhpu ahiyi Satana an neom ipjin o un:

⁸ etpu atga sjipe aien par imyiahnag nup urai iji pece era amen an nobohtan asega ara, nupu Coc im nupu Mecoc, um asjapicnai ra par ago nedoa: era ahinag ara, um idivaig nauanahvig.

⁹ Eris atga ara an nobohtan asega, um arahed inuarin ineig eris amen iran a ilpu atimi upene, im lep inuarin-pece upene; ja is ahes incop an nohatag ehele Atua um asuol, um auahas ra.

¹⁰ Eris lep ethaigse Tiapolo is imyiahnag ra aien, an netpin ineig et amen iran incop im narekwas, et lep amen eahki nitai aleg im naprofeta efaifa; ehtijpu ohocred ahtaij irai iji adiat im niji epeig, irai iji mesese, um ti lep ti.

¹¹ Kis lep ecetai dorona is ethi ainyak, is alupas um ahi, im lep yin is ateuc iran aien; is apohod u nobohtan im nohatag vai yin; eris eti ecetai tah anuarin ineig inyi amen iran.

¹² Kis alum ilpu atimi emesmas ainyak, ilpu atimi alupas im tup atimi, naijivaig an nuhup u Atua; eris algei niji itasvitai: eris lep algei nitasvitai is ethi is eche, nikavaig, nitasvitai va nitai umoh iran: eris asuptecnaig nimtan imi ilpu atimi emesmas, et idivaig intas eris aged irai itasvitai iji ehki, is idivai edo ura.

¹³ Is atceija nohui ilpu atimi emesmas injop, is amen iran; is lep atceija nohui ilpu atimi emesmas Inmas, is amen iran, im lep Umatmas: eris asuptecnaig nimtan imi atimi asega is idivai edo ura.

¹⁴ Eris ethaigse Inmas im Umatmas anliin netpin amen incop iran. Inmas epitpitac neigki.

¹⁵ Ara asega eris eti aged ra an nitasvitai va nitai umoh iran, eris ethaigse ra anliin netpin amen incop iran.