Nitai ehvaig 2 - Intas Etipup

Nuarin-tas alupas 2.

¹ NAMU aged intas aiek imi nagelo an nakalasia Efesus, um ika, Et asan tas iji eigki aien, et asjiraig inmoijeuv et seven an matan aien, um atga an niblai lamp colt et seven, um ika,

² Ek ato niji auritai unyum ainyak, im nauanaheca unyum, im nedo eti auatiemda unyum, im nesjum unyum vai ilpu atimi ago nedo has: as lep ahilek nedo ura aiek era ika ara era ilpu apostolo, ja oʼo, um ato mika, era ilpu atimi ahcil ara:

³ as ohocred aiek, um eti auatiemda, as lep auanaheca aiek va nidak, um eti auatialidi.

⁴ Ja ek ato ainyak nitai ineig vai euc, nikavaig, as ude nupyi aiyu u inliinmopom aiek.

⁵ Aktaktai nitai ineig aiek as eropse iran aiek, um adumoij anliinmopom, um ago nauritai iji eigki as upyi ago aiek; el et eti ucce, ki auroauro ainyak um yetpam ehelum, um atipagki lamp unyum an nuarin o un, el et eti adumoij anliinmopom aiek.

⁶ Ja na ago nitai ineigki aiek, nikavaig, na amcel vai edo o ilpu atimi leh imi Nikolas aiek, ek lep amcel vaig ainyak.

⁷ Aien et eteuc intikgan aien, etmu atahaijeg aien intas iji eigki et asaig a Nesgan Upene ehele ekalasia: Aien et esjilid aien, ekpu alaan ainyak, mika yi caig aien nohoan cai ineig er umumoh vaig, juju a paratais u Atua.

⁸ NAMU aged intas aiek imi nagelo an nakalasia Smirna, um ika, Et asan tas iji eigki aien, is atimi uhup aien um lep atimi apitac, aien is mas aien um lep umoh, um ika,

⁹ Ek ato niji auritai unyum ainyak, im nohocred unyum, im nihki natimi unyum, (ja na ikni itai aiek,) ek lep ato ainyak intas has esjilid ura, era ika ara era upu Jutaia, ja oʼo, era ilpu atimi alaigaheni vai Satana ara.

¹⁰ Jim imtitaig tah nohocred iji eig napu leucse aiek: etpu idim ikni nahaijimia iraili eom ipjin a Tiapolo, mika yi oop caua; akupu leucse nohocred aijaua ira adiat inyi ten: ja etmu inivaijec inliinmopom aiek um yetpan u unmas unyum, ekpu adgaig korona imi euc ainyak va nitai umoh iran.

¹¹ Aien et eteuc intikgan aien, etmu atahaijeg aien intas iji eigki et asaig a Nesgan Upene ehele ekalasia. Aien et esjilid aien, inyi ti auahas yin inmas apitac.

¹² NAMU aged intas aiek imi nagelo an nakalasia Percamos, um ika, Et asan tas iji eigki aien, et amen ehelen nauitoga ineig et arig nahaijin im nahaijin, um ika,

¹³ Ek ato niji auritai unyum ainyak, im lep inuarin ineig na amen iran aiek, inuarin et amen iran dorona o Satana: ja na apol an nidak aiek, as lep eti ateri nimyiisjis ninivaijec nyak aiek, ira adiat iji ehki eris atgei Antipas ehelemia, an nuarin ineig et amen iran a Satana, is atimi asuptecnaig inivaijec unyak aien.

¹⁴ Ja ek ato ainyak niji itai et eti elpat vai euc, nikavaig, era amen ehelum tah era apol an nesege u Belam ara, is esege imi Belak aien, mika yi ati nitai epihtau iran an nuhup u nupu Isreel, mika eri caig nitai iji eigki ara eris ahlap iran vai ilpu atmas, um ago ingaijid.

¹⁵ Era lep amen ehelum ara sji eigki era apol an nesege ineig u ilpu atimi leh imi Nikolas ara, ek amcel vaig ainyak.

¹⁶ Adumoij aiek anliinmopom; el et eti ucce, ki auroauro ainyak um yetpam ehelum, um ati nedoa vai ra an nauitoga ineig et ahes an nipjineucsek.

¹⁷ Aien et eteuc intikgan aien, etmu atahaijeg aien intas iji eigki et asaig a Nesgan Upene ehele ekalasia. Aien et esjilid aien, ekpu alaan manna ainyak er adenaig, ekpu lep alupai yin inhat ahi ainyak, et amen nidan mat iran hat iyehki er aged, ja et eti ato tah natimi, aien ache et leh aien.

¹⁸ NAMU aged intas aiek imi nagelo an nakalasia Daiataira, um ika, Et asan tas iji eigki a Inhal o Atua, aien et idivaig incopre nes-ganimtan aien, um lep idivaig bras naunau neduon, um ika,

¹⁹ Ek ato niji auritai unyum ainyak, im naiheuc unyum, im nauanaheca unyum, im nimyiisjis ninivaijec unyum, im nedo eti auatiemda unyum, im niji auritai unyum; et esjilid niji eigki et apitac iran ji ehki is upyi hup.

²⁰ Ja ek ato ainyak niji itai et eti elpat vai euc, nikavaig, as eti acaiji intakata iyehki Jesebel aiek, et ika aien et aprofeta, vai yi jim esege aien um imyiahnag ilpu aheca unyak, mika eri ago ingaijid ara, um hegai itai er ahlap iran vai ilpu atmas.

²¹ Kis ati naopan ainyak mika yi adumoij anliinmopon aien vai ingaijid o un; ja is eti adumoij anliinmopon aien.

²² Ekpu idim atise yin an tinan ainyak, etpu lep esjilid nohocred ura era ago ingaijid iran ara, el era eti adumoij anliinmopura ara vai edo ura.

²³ Ekpu auahas ilpu hal o un ainyak an mas; erupu ato a nup urai ekalasia asega mika, ainyak aigki ek ahilek naktaktai u atimi ainyak im inliinmopura: ekpu lep aru iramia asega ainyak yi idivai edo unyimia.

²⁴ Ja ek asaig ainyak ehelemia, im lep ehele ra Daiataira, ara asega eris eti leh nesege ineigki ara, um eti ato nedo ubo o Satana, et idivaig era asaig ara, um ika, Inki ti atijai iramia ainyak tah nitai ahelwei et eche.

²⁵ Ja akumu apol emda aijaua an nitai ineig et amen ehelemia, um yetpan an naopan iyehki ekpu ham ainyak.

²⁶ Aien et esjilid aien, um aminjinaig nauritai unyak um yetpan an nehni o un, ekpu ati yin ainyak, mika yi esjilid aien irai iji pece:

²⁷ etpu atimarid ira ra aien an mopul hat; uhpu ahtagrei ra et idivaig nipjihat: et idivaig kis leh ehele Etmak ainyak.

²⁸ Ekpu alupai yin inmoijeuv u nadiat ainyak.

²⁹ Aien et eteuc intikgan aien, etmu atahaijeg intas iji eigki aien, et asaig a Nesgan Upene ehele ekalasia.