Nitai ehvaig 19 - Intas Etipup

Nuarin-tas alupas 19.

¹ IS wat ti pan itac nitai iji eigki, kis atahaijeg nohra atimi is ahinag ainyak an nohatag, is alupas, eris ika ara, Aleluya; Et eteuc nimyiatamaig atimi, im nimyiahpas, im inlah, im nemda, ehele Natimarid Atua uja:

² et idim inivaijec um atoh nedo o un va atimi; et mun aru nedo o intakata ago ingaijid esjilid iyehki aien, is auahas atimi an nobohtan aien an gaijid o un; is lep aru inja irai ilpu aheca o un a Atua iran.

³ Eris lep ika ara, Aleluya. Is aridjai nadaran cop iran irai iji mesese.

⁴ Eris eropropse a ilpu atimi tas alep is twente for, im niji itai umumoh is for iji ehki, um alaigaheni vai Atua ineig is ateuc a dorona aien, um ika, Emon; Aleluya.

⁵ Is ahes a dorona nohran tah, um ika, Akumu imyiahpas Atua uja aijaua asega, ak ilpu aheca o un, im lep aijaua eka imtitai yin aijaua, ak tup atimi, im ilpu atimi alupas.

⁶ Kis atahaijeg ainyak is idivaig nohra atimi is ahinag, um idivaig inmotjan jop alupas, um idivaig natceteuc u unmunuka alupas acen, eris ika ara, Aleluya: et esjilid a Natimarid Atua emda acen:

⁷ intumu imyiacitak akaija, um cediaig, um imyiahpas yin: et mun yetpam natmehgan u Lam, et mun yecrei yin a ehgan.

⁸ Eris ika ehelen yi aso yin aien ira apelumai yilyil, yi adicinadicin um ahi; nedo atoh o ilpu atimi upene napelumai yilyil.

⁹ Is ika ehelek aien, Aged aiek, um ika, Era mun ahesmoij ara eris imyiacaij pan ra u inhag an natmehgan u Lam. Is ika ehelek aien, Niji tas inivaijec o Atua ji eigki.

¹⁰ Kis eropse ainyak u neduon, mika ki alaigaheni vai yin. Ja is ika ehelek aien, Jim ago nedo ineigki aiek: intau ehraheca u Atua akaijau, ek tah irai ilpu etoam ainyak, et amen ehele ra intas asuptecnai Iesu: alaigaheni vai Atua aiek: nesgan tas ahidan tas neigki, nasuptecnaigvaig Iesu.

¹¹ Kis ecetai nohatag ainyak is asalgei, um alum hors ahi is ethi; aien is ateuc iran aien, eris anvi nidan par ika Natimi inivaijec, um upene nasgeig iran vaig; et aru nedo o atimi aien, um ati nedoa, an nedo atoh o un:

¹² is idivaig incopre nesganimtan, um amen an nidjinin korona is ahinag; eris aged nidan, ja is eti ato nidan iyehki tah, aien ache:

¹³ is amen iran napelumai eris ahtaij uhli an ja; er anvi nidan par ika, intas o Atua.

¹⁴ Eris apitac yin a ilpu eucsupo an nohatag, eris ateuc irai hors ahi ara, um aso ra ira apelumai yilyil, is ahi um adicinadicin.

¹⁵ Et ahes an nipjineucsen nauitoga arig, mika yi auud nup urai iji pece iran aien; “etpu atimarid ira ra aien an mopul hat o un:” et echim atga aien an nuarin ahtaijiraig vaine iran an nedemda im intavaitap u Atua emda acen.

¹⁶ Eris aged nidan an napelumai o un, im lep an neduon, kot ika, NATIMARID IRAI ILPU ATIMARID, IM NATIMI ALUPAS IRAI ILPU ATIMI ALUPAS.

¹⁷ Kis ecet nagelo is ethi ainyak, is aiji an nagesega aien; is ahlaig ijinies aien, um ika ehele man asega era ae an nauanohatag, Akumu asjapicnaig pam aijaua u inhag u Atua alupas;

¹⁸ mika aki hegaig nohui ilpu atimarid, im nohui ilpu atimi alupas, im nohui ilpu atimi emda, im nohui hors, im nohui ilpu atimi ateuc iran, im nohui atimi asega, ilpu aheca im ilpu atimi eti aheca, tup atimi im ilpu atimi alupas.

¹⁹ Kis ecetai nitai aleg iyehki ainyak, im ilpu atimarid an nobohtan, im ilpu eucsupo ura, eris asjapicnaig ara, mika eri ago nedoa vai yin is ateuc irai hors aien, im lep vai ilpu eucsupo o un.

²⁰ Eris arop irai nitai aleg ara, im lep naprofeta efaifa ehelen, is ago niji itai asjaaicnaig an nuhup o un aien, is imyiahnag atimi iji eigki aien vaig eris leh nitai asjaaicnaig u nitai aleg, im lep ra eris atpuse an nuhup u nalmun ara. Eris ethaigse muh rau an netpin amen incop iran et alauma va; narekwas.

²¹ Eris lep atgei nahaiji ra is aled an nauitoga o un is ateuc irai hors aien, is ahes an nipjineucsen: eris gaije niji man asega va ohura.