Nitai ehvaig 18 - Intas Etipup

Nuarin-tas alupas 18.

¹ IS wat ti pan itac nitai iji eigki, kis ecet nagelo is ethi is eche ainyak, is ahes an nohatag aien um asuol, is esjilid nemda o un; is lahaijaig nobohtan va naijoran.

² Is ahlaig ijinies aien, is acre nohran, um ika, Et mun asuol Babelon alupas, et mun idim asuol, et uarin amen iran u ilpu agelo has, im neom ipjin va nesgai itai has asega, im neom ui man has asega, im lep man er amcel vaig.

³ Eris idim umnyi waina ineig a nup urai iji pece asega neruvaig ingaijid o un, eris lep ago ingaijid ehelen a ilpu atimarid an nobohtan, era lep atimi ikni itai a ilpu atimi ahtai itai an nobohtan va niji itai upenc o un is ahinag.

⁴ Kis atahaijeg nohran tah is ethi is eche ainyak, is ahes an nohatag, um ika, Ak ilpu atimi unyak, akumu ude yin aijaua, va aki jim asipiai edo has o un, um lep leucse nohocred o un:

⁵ et mun yetpan an nohatag niji edo has o un, et lep imyiehva nauatatimi o un a Atua.

⁶ Akumu ago nedo ineigki vai yin aijaua is ago vai caua aien, akumu ehcero aru nedo o un aijaua: akumu ehcero ago ohua nipjinitai ineig aijaua is ago ohua aien.

⁷ Is idim ispun imyiahpas yin aien, um ago nacitak; et idim ucco, akumu ati nohocred iran aijaua, im intaigtaig: et idim ika inliinmopon aien, Et takata atimarid ainyak, um eti tup echim amen, inki ti lep ato nohocred ainyak.

⁸ Va nitai ineigki etpu yetpam iran nohocred o un an nadiat inyi ethi ache, nikavaig, inmas, im nehtigtaig, im numlaig has; uhpu lep atnamud asega yin an cop: et idim emda a Atua Natimarid ineig et aru nedo o un aien.

⁹ Eru wit ecetai nadaran cop atnamud yin a ilpu atimarid an nobohtan eris ago ingaijid ehelen ara, um ago nedo acitak, erupu ehteigtaig vai yin ara, um imyitaig Jin:

¹⁰ erupu aiji itac acen ara va nimtita nohocred o un ura, um ika, Auwe, kaiheuc vai inuarin-pece alupas inaico Babelon, inuarin-pece emda! et mun yetpam neruvaig iram an nuarin-nadiat et ethi ache.

¹¹ Erupu lep imyitaig yin a ilpu atimi ahtai itai an nobohtan, um aunyauwaig; inyi ti lep auarimtai itai ura tah natimi:

¹² niji itai ura colt, im silver, im hat esjilid, im perl, im napelumai yilyil, im napelumai auoc, im napelumai silk, im napelumai cop, im ingitjinyat, im nipjiaivore asega, im nipjicai esjilid asega, im nipjibras, im nipjiaiurn, im nipjimarbil,

¹³ im sinamon, im niji itai auanipin upene, im nidi mura, im nidi libano, im nidi vaine, im nidi oliv, im flaur upene, im hwiit, im kurimatau, im siip, im hors, im niji itai atga, im nohui atimi, im nesga atimi.

¹⁴ Et lep ti nohoai itai iji eigki as ahvig aiek, um lep ti niji itai esjilid um upene asega, napu eti lep ecetai aiek.

¹⁵ Erupu aiji itac acen a ilpu atimi ahtai nitai iji eigki, eris ikni itai ara vaig, va nimtita nohocred o un ura, um ehteigtaig um aunyauwaig,

¹⁶ um ika, Auwe, kaiheuc vai inuarin-pece alupas inaico, is aso yin aien ira apelumai yilyil, im napelumai auoc, im napelumai cop, is naunau aien vai colt, im hat esjilid, im perl!

¹⁷ Ja et mun ti naga alupas o un an nuarin-nadiat et ethi ache. Eris aiji itac acen a ilpu atimi asega apos elcau, im ilpu atimi asega atau irai elcau, im ilpu atimi aheled iran, im ilpu atimi asega ago itai an jop,

¹⁸ um ahlaig ijinies, eris wat almoi nadaran cop atnamud yin ara, um ika, Inuarin-pece ineig yek eda, et idivaig inuarin-pece alupas ineigki?

¹⁹ Eris ehrinma irai idjinira ara, um ahlaig ijinies, um ehteigtaig, um aunyauwaig, um ika, Auwe, kaiheuc vai inuarin-pece alupas inaico, eris ikni itai iran ara asega is amen niji elcau ura an jop, va nimtan alupas o un! ja eris auahas yin an nuarin-nadiat is ethi ache.

²⁰ Akumu imyiacitak vai yin aijaua, ak ilpu atimi amen an nohatag, im ilpu apostolo upene, im ilpu profeta upene; et mun aru nedo o un vai caua a Atua.

²¹ Is leh inhat is idivaig nijaro irara a flaur iran um alupas a nagelo emda is ethi, um ethaigse an jop, um ika, Et idim ucco, uhpu efethaigse inuarin-pece alupas inaico, Babelon, an nemda, uhpu idim eti lep ecetai:

²² uhpu eti lep atahaijeg nohrai ilpu atimi atcei harp iram, im ilpu atimi acesaces nohraiitai, im ilpu atimi ahlai huthavlav, im ilpu atimi ahlai toho; uhpu eti lep ecet tah natimi amarero iram, et ago niji auritai aien; uhpu idim eti lep atahaijeg tah nohran nijaro nirara a flaur vaig iram;

²³ etpu eti lep lah va naijoran cop alahala iram; uhpu eti lep atahaijeg nohra atmehgan iram: eris ilpu atimi alupas an nobohtan a ilpu atimi ahtai itai unyum; eris idim ahnag a nup urai iji pece va nedo araces unyum.

²⁴ Eris lep ecetai iran inja irai ilpu profeta, im ilpu atimi upene, im lep ra asega eris atgei ra an nobohtan.