Nitai ehvaig 17 - Intas Etipup

Nuarin-tas alupas 17.

¹ IS apam tah is ethi irai ilpu agelo is seven iji ehki eris apos ipjinitai is seven ara, um tas ehelek, um ika, Apam aiek igcaki; ekpu ehvaig ehelum ainyak neruva nedo o intakata ago ingaijid esjilid iyehki, et ateuc irai wai et ahinag aien:

² eris ago ingaijid ehelen a ilpu atimarid an nobohtan, eris lep ahnag natimi an nobohtan vai waina an gaijid o un.

³ Is imyiapan nyak an namasacen aien an nahuumtidec unyak: kis ecet intakata is ethi ainyak, is ateuc aien irai nitai aleg cop, is ahinag nidan iran, intas has esjilid, is seven nidjinin, um ten nepat o un.

⁴ Is amen irai intakata iyehki napelumai auoc im napelumai cop, is lep naunau aien vai colt iran, im inhat esjilid, im perl; is apos nipjicolt aien, ja is ohua niji itai has iran, im nauatatimi an gaijid o un:

⁵ eris lep aged nidan an nipjinimtan, um ika, NITAI ADENAIG, BABELON ALUPAS, RISI ILPU TAKATA AGO INGAIJID IM LEP NEDO HAS AN NOBOHTAN.

⁶ Kis ecet intakata iyehki ainyak, is ahnag aien vai inja irai ilpu atimi upene, im lep inja irai ilpu atimi asuptecnaig vai Iesu: kis wat ecet yin ainyak, kis imyiali alupas ainyak.

⁷ Is um ika ehelek a nagelo iyehki, Na auri aiek par imyiali? ekpu asuptecnaig ehelum ainyak nitai adenaig vai intakata ineigki, im lep vai nitai aleg et apos yin, et seven nidjinin im ten nepat o un.

⁸ Is upyi eteuc nitai aleg iyehki as ecetai aiek, ja et ti emda aien an naopan ineig; etpu ahes an nehpanitai ineig aien er eti ecetin nehni o un, um aridjai, ja par apan an pece has: erupu imyiali natimi amen an nobohtan, eris eti aged nidara an nitasvitai va nitai umoh iran an naopan iyehki is pam eti eteuc nobohtan, eru wit ecetai nitai aleg ineig ara is upyi eteuc aien, ja et ti emda aien an naopan ineig, ja et mun lep eteuc.

⁹ Er ecetai narapakau an nitai ineigki. Et lola edoon et seven nidjinin et seven, et ateuc iran a intakata ineig.

¹⁰ Era lep eteuc a ilpu atimarid et seven: eris asuol is faiv ira ra, et eteuc tah et ethi, jam eti fi yetpam tah et ethi, et wit yetpam aien, eris idim ika inyi ti elvamen aien.

¹¹ Et atimarid eet a nitai aleg ineig is upyi eteuc aien, jam lep ti emda an naopan ineig, et ahes aien ehele seven iji ehki, ja etpu apan an pece has aien.

¹² Era ilpu atimarid et ten nepat et ten iji ehki as ecetai aiek, eris eti leh nelcau ura ara an naopan ineig; ja era leh nemda ura ara, um idivai ilpu atimarid, um tup ethi ache pan an nitai aleg an nuarin-nadiat et ethi.

¹³ Et tup ethi ache inliinmopoi ra sji eigki, erupu lep atceijaig nemda ura ara, im natimi alupas ura, imi nitai aleg.

¹⁴ Erupu lep ati nedoa vai Lam ara sji eigki, etpu ahau ra a Lam: et idim Atimarid irai ilpu atimarid aien, um Atimi alupas irai ilpu atimi alupas: ara era amen ehelen ara eris ahlaig vai ra, um ehtai ra, era lep inivaijec ara.

¹⁵ Is ika ehelek aien, Inwai iji ehki as ecetai aiek an nuarin ineig et amen iran a intakata ago ingaijid iyehki, et idivaig nup urai iji pece, im natimi et ahinag, im nup urai iji elcau, im nup auoh taka tas.

¹⁶ Nepat et ten iji ehki as ecetai aiek irai nitai aleg, erupu edemda vai intakata ago ingaijid ara, um atipagki naga o un im napelumai o un, um caig nohun, um atnamud yin an cop.

¹⁷ Is ati naktaktai anliinmopura a Atua, mika eri ago nasaig o un ara, yi tup ethi ache intas ura, eri lep atceijaig nelcau ura imi nitai aleg, um imyihum pan an naopan iyehki uhpu ehneijid niji tas o Atua.

¹⁸ Intakata iyehki as ecet yin aiek, et uarin-pece alupas iyehki aien, et esjilid irai ilpu atimarid an nobohtan.