Nitai ehvaig 16 - Intas Etipup

Nuarin-tas alupas 16.

¹ KIS atahaijeg nohran tah ainyak is ijinies, is ahes an neom ahlap, is ika ehele ilpu agelo is seven iji ehki, Akumu apan aijaua, um atladwi intavaitap ineig u Atua an nobohtan et amen irai ipjiitai et seven.

² Is apan a nagelo uhup um atladwi nipjinitai o un an nobohtan; is um eteuc inmocop has um alupas acen ira atimi iji eigki eris leh nitai asjaaicnaig u nitai aleg ara, im lep ira ra eris alaigaheni va nalmun ara.

³ Is lep atladwi nipjinitai o un a nagelo tu an jop; is um idivaig inja irai natimi mas: is emesmas niji itai umumoh asega au jop.

⁴ Is lep atladwi nipjinitai o un a nagelo dri irai ofowai im nimtaiwai; is um ja.

⁵ Kis atahaijeg nagelo an wai ainyak, is ika aien, Ak Natimarid, as upyi eteuc aiek, um lep eteuc an naopan ineig, na upene aiek, et atoh nedo unyum, va nitai ineig, nikavaig, as aru nedo ura aiek:

⁶ eris atladwi inja irai ilpu atimi upene ara im ilpu profeta, as lep aluma ra inja aiek; neruvaig atoh imi ra.

⁷ Kis lep atahaijeg tah is ethi is eche ainyak an nefata, is ika aien, Et idim ucco, ak Natimarid Atua emda acen, et inivaijec um atoh neruvaig unyum imi atimi.

⁸ Is lep atladwi nipjinitai o un a nagelo for an nagesega, eris alupai yin nemda, mika yi ces atimi.

⁹ Is alupas nagesega, um ahenhen atimi; eris asan tas has esjilid ara va nidai Atua incig et esjilid aien irai itai ohocred vaig iji eigki: eris eti adumoij anliinmopura ara par imyiahpas yin.

¹⁰ Is lep atladwi nipjinitai o un a nagelo faiv an nitai ateuc u nitai aleg; is aupat nelcau o un; eris asjagis ira amara ara va nohocred ura,

¹¹ um asan tas has esjilid vai Atua an nohatag va nohocred ura im inmocop ira ra, jam eti adumoij an nefalaig has ura.

¹² Is lep atladwi nipjinitai o un a nagelo siks an nofowai alupas Yufretes; is ameh inwai, mika yi ahped nefalaig vai ilpu atimarid erupu ahes an ridjai o un ara.

¹³ Kis ecet nesgai itai has is eseij ainyak, ehtijis idivaig napav ahtaij, ehtijis ahes an nipjineucse nimyiv ahtaij, im nipjineucse nitai aleg, im lep nipjineucse naprofeta ahcil:

¹⁴ ehtaij esga agelo has ahtaij, um ago niji itai asjaaicnaig, um apan ehele ilpu atimarid an nobohtan, im lep ilpu atimarid irai iji pece asega, um asjapicnai ra u nedoa an nadiat esjilid iyehki u Atua emda acen.

¹⁵ Ekpu idim ham ainyak et idivaig natimi ehneg itai. Et mun ahesmoij aien et aiji aien, um eti atipagki napelumai iran, vai yi jim tup atga aien, um ehcama ian nuhup u atimi.

¹⁶ Is asjapicnai ra aien an nuarin is ethi, nidan Hibru Armacetton.

¹⁷ Is lep atladwi nipjinitai o un a nagelo seven an naunohatag; is ahes nohran tah is ethi is ijinies an neom ahlap an nohatag, is ahes a dorona, um ika, Eh mun ago ehni.

¹⁸ Is eteuc nohrai itai, im inmunuka, im nawainapit; is lep eteuc nomoi esjilid, is eti idivaig iyehki tah nomoi an namen u atimi an nobohtan, is esjilid acen nomoi iyehki um alupas:

¹⁹ eris atiakoai inuarin-pece alupas, is eseij inuarin-pece iran, eris asuol niji uari-pece u nup urai iji pece: is lep imyiehva Babelon alupas a Atua, par aluman waina an nipjinitai an tavaitap esjilid o un:

²⁰ is apohod niji hakli-pcce asega; eris lep eti alum lola edoon:

²¹ is ahes an nohatag incaupda hat alupas um asuol ira atimi, is apapa pan a paunt wun huntret niji hat asega: eris asan tas has esjilid vai Atua natimi, va nohocred ura vai incaupda hat; is alupas acen nohocred vaig.